Read Goan Konkani Ju 5 Bible Online

Ju 5 - Goan Konkani bible

Ju 5

¹Hachê uprant, Judevanchi êk porob asli ani Jezu Jeruzaleak choddun gelo.

²Jeruzaleak, Xelliam-Darvonttea-kodde ek tolloi asa; Hebrêv bhaxen tika Bethsaida mhonntat; hi tichi bandavôll: tika panch tarangnnam asat.

³Thôi kurddim, thonttim, aren dhòrlolim, oslim khup piddevont poddlelim astalim; [tim sogllim udok haltelem mhonn ravtalim.

⁴Kiteak Sorvesporacho dut kedna-kedna tollient denvtalo ani udok haloitalo; udok haltôch zo konn heram adim udkant bhitôr sortalo, to koslê-i piddentlo boro zatalo.][2]

⁵Thõi êk monis aslo, tachê piddek atthtis vorsam zal’lim.

⁶Jezun taka add poddlolo dekhlo ani, to thõi zaito kall oslê gotir aslo mhonn zanno zaun, taka mhonn’lem: “Tum boro zaunk sôdtai?”

⁷Piddevontan Taka zap dili: “Saiba, udok halta tedna mhaka tollient ghalunk mhozo konn na, ani hanv vetam mhonnosôr, dusro ieun apunn mhojê fuddem denvta.”

⁸Jezun taka mhonn’lem: “Utth, tujem antrunn ukôl ani chol.”

⁹Ani teach vellar to boro zalo ani aplem antrunn uklun cholunk laglo. To dis Sabbath aslo.

¹⁰Hea pasot, boro zal’lea mon’xak Judevamnim mhonn’lem: “Az Sabbath, tujean antrunn uklum nozo.”

¹¹Tannem tankam zap dili: “Zannem mhaka boro kela, tannem mhaka oxem mhonn’lem: ‘tujem antrunn ukôl ani chol. ’ ”

¹²Tãnnim tachê kodde vicharlem: “ ‘Tujem antrunn ukôl ani chol’, oxem tuka mhonn’lem to monis konn?”

¹³To konn to boro zal’lo monis nokllo aslo; kiteak thõi ji lokachi lutt zal’li, tichê modem Jezu nanch zal’lo.

¹⁴Uprant to Jezuk Devmondirant mell’lo, ani Jezun taka mhonn’lem: “Polle, tum atam boro zaloi; anink patok korinaka, na tôr tuka anink kitem-i paxtt zait.”

¹⁵To monis gelo ani apnnak boro kela to Jezu mhonn tannem Judevank sanglem.

¹⁶Ani Jezu osleô vostu Sabbatha disa kori dekhun, Judev Tachê pattlean laglele.

¹⁷Jezun tankam mhonn’lem: “Mhozo Bap ozun porian vavr korit asa, toso Hanv vavr korit asam.”

¹⁸Hea pasot Judev odikuch Taka jivexim marunk sôdtale; karonn, To nhoich Sabbath môddtalo, punn Devak Aplo Bap mhonnun, Apnnakuch Deva sarko kortalo.

¹⁹Jezun tankam mhonn’lem: “Khorench khorem Hanv tumkam sangtam: Apnnachêch osttongim Putachean kãich korunk zaina; punn Bap korta mhonn jem To polleta, tench To korunk xokta; ani jem Bap korta tench Put-ui korta.

²⁰Karonn Bap Putacho môg korta, ani Apunn korta titlem-i Putak dakhoita; ani tumi ojap zaunchê khatir hanchê-vôn vhodd kortutvam To Taka dakhoitolo.

²¹Zoso Bap mel’leank utthoita ani tankam Jivit dita, tosoch Put Apnnak zai tankam Jivit dita.

²²Zoso Bapak man ditat tosoch Putak soglleamnim man diuncho mhonn, Bap konnachich mon’subi korina, punn Tannem mon’subi korcho sogllo odhikar Putachea hatant dila. Jim konn Putak mandinant, tim Taka dhaddla tea Bapak mandinant.

²³

²⁴Khorench Hanv tumkam sot tem sangtam; jim konn Mhojem utor aikotat ani Mhaka dhaddla Tacher bhavart dovortat, tanchê sovem sasnnik jivit asa; osleank anink khastichem formonn na, punn tim mornnantlim jivitak utorlim.

²⁵khorench Hanv tumkam sot tem sangtam: mel’lim mon’xam Devachea Putacho tallo aikotelim, ani jim konn to aikotat tankam jivit melltelem, oslo vêll ieuncho zalo - hoch to vêll!

²⁶Karonn, zoxem Bapak jivit Apnnachêch sovem asa, toxench Putak-ui jivit Tachêch sovem aschem mhonn Bapan Taka dennem kelam,

²⁷ani mon’subi korchi Taka podvi dilea, kiteak To Mon’xacho Put.

²⁸Hachê vixim ojap zaum nakat: somadhimnim asat tim sogllim Tacho tallo aikun tantlim bhair sortelim:

²⁹zãnnim borem kelam tim jivit bhogunk, ani zãnnim vaitt kelam tim khast sõsunk utt’telim — oslo vêll ieuncho zalo!

³⁰Mhojêch podven Mhojean kãich korunk zaina; zoso Hanv aikotam toso Hanv nirnnoi ditam; ani Mhozo nirnnoi niticho, kiteak Hanv Mhoji khuxi nhoi punn Mhaka pattoila Tachi khuxi korunk sôdtam.

³¹Hanvuch Mhojê vixim govai diin zalear, Mhojê govaikek mol na.

³²Mhojê vixim govai ditolo dusro konn asa, ani ji govai To Mhojê vixim dita tika purnn mol asa mhonn Hanv zannom.

³³Tumi tumcheam niropiank Juanva- xim pattoile, ani tannem sota vixim govai dili.

³⁴Hanv mon’xanchê govaikecher dhòrlolo na; punn Hanv oso uloitam zalear, tumchea taronna pasot uloitam.

³⁵Juanv êk zollti ani loklokit ponntti zaun aslo ani tachea uzvaddak ilo vêll murgottunk tumkam borem dislem.

³⁶Punn Mhaka asa ti govaiki Juanvachê govaikê poros vhôdd: jim kamam Bapan Mhaka sompadunk dileant — Hanv kortam tinch kamam — Bapan Mhaka pattoila mhonn Mhojê vixim govai ditat.

³⁷Bapan Mhaka pattoila ani Tannench Mhojê vixim govai dilea. Tacho tallo tumi kodinch aikunk na, Tachem rup-ui tumi kodinch polleunk na,

³⁸ani Tacho Sôbd tumchê bhitôr riglolo na, kiteak Zaka Tannem dhaddla Tacher tumi bhavart tthevinant.

³⁹Dhormxastracheam borovpamnim sasnnik jivit asa mhonn somzun, tumi tim chit ghalun xiktat; khorem mhonn’lear tinch Mhojê vixim sakxi ditat;

⁴⁰toripunn tumkam jivit mellchê khatir Mhojê-xim ieunk tumi raji nant.

⁴¹Mon’xancho zo man Mhaka mellot, tachi Hanv porva korich na.

⁴²Punn Hanv tumkam pok’kim ollkhotam: Devacho môg tumchê sovem nanch.

⁴³Mhojea Bapachea nanvan Hanv ailam, tori tumi Mhaka mandun ghenant; dusro konn apleach nanvan ailo tôr, taka tumi mandun ghetelet.

⁴⁴Tumkam bhavart koso asum-iet? Kiteak mhollear tumi ekamekacho man gheun khuxi zatat, punn ekleach Deva koddcho zo man ieta tachi tumi porva korich nant.

⁴⁵Bapa mukhar Hanv tumkam lavun ditolom mhonn somzonakat; Moizesacher tumi bhorvanso dovortat, tôr toch Moizes tumkam lavun ditolo.

⁴⁶Tumi Moizesacher bhavart dovorlolo zalear, Mhojer-ui tumi bhavart dovorto aslet, karonn tannem boroilam tem Mhojê vixim boroilam.

⁴⁷Punn tacheam borovpancher tumkam bhavart na zalear, Mhojeam utrancher koso mhonn tumkam bhavart asum-iet?”