Read Goan Konkani Ju 6 Bible Online

Ju 6 - Goan Konkani bible

Ju 6

¹Magir Jezu Galileiachea vô Tiberiasachea Doriachê poltoddi gelo.

²Ani lokachi urpônz Tachê pattlean geli, kiteak piddevontam khatir To kortalo teô khunna tãnnim dekhleleô.

³Jezu dongrar choddlo ani Apleam xisam sangatim thõi boslo.

⁵Aple dolle uklun ani lokachi vhôdd urpônz Apnna-xim ieta ti polleun, Tannem Filipak mhonn’lem: “Hea lokak khaunk diunk khõiche mhonn ami undde gheunche?”

⁶Tachi porikxa korunk Tannem hem mhonn’lem, kiteak Apunn kitem korto aslo tem To boro zanno aslo.

⁷Filipan Taka zobab dilo. “Ek-ekleak ilo-so kuddko poddtolo zalear, don’xim dinaranche undde tankam pavche nant.”

⁸Tacheam xisam modlea eklea, Simanv Pedruchea bhava, Andren Taka mhonn’lem:

⁹“Hangasôr konn-eklea bhurgea lagim panch undde ani don maslleo asat; punn itlea lokak hem khõi pavta?”

¹⁰Jezun mhonn’lem: “Lokak bosoiat.” Tê svater zaitem tonn aslem; mhonntôch lôk boslo: dadlech sumar panch hozar asle.

¹¹Tedna Jezun undde ghetle ani Devak dhin’vasun bosleleank te vanttle; têch porim maslleô-i vanttleô. Tankam zai titlem vanttun dilem.

¹²Ani tim dhadoxi zatôch, Tannem Apleam xisank mhonn’lem: “Kuddke urleat te ektthãi korat; kãich ibadd zaum noiê.”

¹³Hea pasot, tanchem khaun zatôch, zovacheam panch unddeanche urlele kuddke tãnnim ektthãi kele, ani oxeô bara panttleô bhòrleô.

¹⁴Hi Tannem kel’li khunna lokan dekhli tedna, tãnnim mhonn’lem: “Sonvsarant ieuncho asa to Provadi dubhava virêt hoch to!”

¹⁵Tim ieun Apnnak bollan dhorun raza korunk sôdtalim mhonn Jezu zanno aslo, dekhun To koddsorun Apunn eklo novean dongrar gelo.

¹⁶Sanz zatôch Tache xis doria-xim denvun gele,

¹⁷eka hoddear choddle, ani Kapernauma vochunk doria utrunk lagle. Jezu tanchê sorxem pavchê adim kallôk zalo.

¹⁸Zhonnzhonnit varo suttlo ani doria uchambôll zaunk laglo.

¹⁹Sumar tin ki char kilometranchi vatt tanddun kaddtôch, tãnnim Jezuk doriacher cholta ani hoddea lagim pavta to dekhlo. Tankam bhem dislem,

²⁰punn Tannem tankam mhonn’lem: “Hanv to, bhienakat!”

²¹Tedna te Taka hoddeant gheunk kortale, punn, thõichê-thõich, te vetale tê toddik hoddem laglem.

²²Dusrea disa, thõi ekuch hoddem aslem ani Jezu Apleam xisam sangatim tea hoddear choddunk naslo, punn fokot Tache xis gel’le: hem sogllem poltoddi ravlelea lokan pollelem.

²³Somian Devak dhin’vaslea uprant tãnnim undde khel’le tea zagea lagim anink hoddim Tiberiasa thaun pavlelim.

²⁴Jezu thõi naslo mhonn lokan dekhlem, ani Tache xis-ui thõi nant mhonn polleun, to lôk hoddeamnim choddun Jezuchê sodik Kapernauma ailo.

²⁵To tankam toddir mell’lo; tedna tãnnim Taka mhonn’lem: “Guruji, Tum hanga kedna ailoi?”

²⁶Jezun tankam zap diun mhonn’lem: “Khorench Hanv tumkam sot tem sangtam, tumi khunna dekhleô mhonn nhoi, punn undde khaun dhadoxi zaleant dekhun tumi Mhojê sodik aileant.

²⁷Khaun sorta toslea khanna khatir tras gheum nakat, punn sasnnik jivitak togta toslea khanna khatir tras gheiat; oslem khann Mon’xacho Put tumkam ditolo; karonn khud Deva, Bapan, Tacher Aplo xik’ko marla.”

²⁸Tedna tãnnim Taka mhonn’lem: “Devak zai toslim kamam korunk ami kitem korchem?”

²⁹Jezun tankam mhonn’lem: Zaka Devan dhaddla, Tacher bhavart dovrat: hench tem Devak zai tem kam’ ”.

³⁰Tãnnim Taka mhonn’lem: “Toxem zalear, khunna polleun Tujer ami bhavart dovorchê khatir kosli khunna korun amkam dakhoixi? Kitem kortoloi Tum?

³¹Amcheam purvozamnim oronneant man’na khelo; ‘Tannem tankam sorgincho unddo khaunk dilo’, oxem Povitr Pustokar boroil’lem asa.”

³²Jezun tankam mhonn’lem: “Khorench Hanv tumkam sot tem sangtam, Moizesan tumkam sorgincho unddo diunk na; Mhozo Bap ki tumkam khoro sorgincho unddo dita,

³³Kiteak zo sorga thaun denvta ani sonvsarak jivit dita, toch Devacho unddo.”

³⁴Tãnnim Taka mhonn’lem: “Saiba, ho unddo amkam sodam di.”

³⁵Jezun tankam mhonn’lem: “Jivitacho Unddo To Hanv; Mhojê-xim ietat tankam kodinch bhuk lagchi na, ani Mhojer bhavart dovortat tankam kodinch tan lagchi na.

³⁶Punn Hanvem tumkam oxem sanglam: tumi Mhaka dekhla, tori Mhojer tumi bhavart dovrinant.

³⁷Mhozo Bap Mhaka dita tim sogllim Mhojê-xim ietelim; ani Mhojê-xim ietat tankam Hanv poro ghalcho na.

³⁸Mhoji khuxi korunk nhoi, punn Mhaka pattoila Tachi korunk Hanv sorgar thaun denvlam;

³⁹ani Mhaka pattoila Tachi khuxi hi: jim sogllim Tannem Mhaka dileant tantlea konnakuch Hanvem ibaddcho nhoi, punn nimannea disa tankam soglleank Hanvem punorjivont korchim.

⁴⁰Hich ti Mhojea Bapachi khuxi: jim konn Putak polletat ani Tacher bhavart tthevtat, tankam soglleank sasnnik jivit mellchem, ani nimannea disa Hanvem tankam punorjivont korchim.”

⁴¹‘Hanv sorgar thaun denvlolo unddo’, oxem Tannem mhonn’lem dekhun, Judev Tachê vixim gunngunnunk lagle.

⁴²Tim mhonntalim: “Ho Jezu nhoi rê, Juzecho put?! Tachea avoibapaik ami ollkhonanv kitem? ‘Hanv sorgar thaun denvlam’, oxem tachean koxem mhonnum-ieta?”

⁴³Jezun tankam zap diun mhonn’lem: “Tumchêch modem gunngunnum nakat.

⁴⁴Bapan Mhaka dhaddla, ani, Tannem konnak Mhojê-xim oddun haddlea xivai, konnacheanuch Mhojê-xim ieunk zaina; ani Mhojê-xim ieteleank Hanv nimannea disa punorjivont kortolom.

⁴⁵‘Tim sogllim Devan xikoil’lim mon’xam zatelim’, oxem provadeancheam pustokamnim boroil’lem asa. Jim konn Bapachem aikotat ani xiktat, tim sogllim Mhojê-xim ietat.

⁴⁶Konnem Bapak dekhla mhonn nhoi, punn Zo Deva thaun aila, Tannem mat Bapak dekhla.

⁴⁷Khorench Hanv tumkam sot tem sangtam, jim konn bhavart tthevtat, tankam sasnnik jivit mellta.

⁴⁸Jivitacho unddo To Hanv.

⁴⁹Tumcheam purvozamnim oronneant man’na khelo ani tim morun gelim.

⁵⁰Punn sorgar thaun denvta to unddo ho, osle torecho ki to khatit tim morchim nant.

⁵¹Sorgar thaun denvlolo to jivo unddo Hanv; ho unddo khatat tim sasnnak jivim astelim; ani sonvsarak jivit mellchê khatir Hanv ditolom to unddo Mhojench mas.”

⁵²Tedna team Judevam modem vad-vivad zalo; tim ekamekak mhonnunk laglim “Arê, ho anink amkam aplem mas khaunk koso ditolo rê?”

⁵³Hea pasot Jezun tankam mhonn’lem: “Khorench Hanv tumkam sot tem sangtam, tumi Mon’xachea Putachem mas khelea bogor ani Tachem rogot pielea xivai, tumchê sovem jivit asum nozo.

⁵⁴Jim konn Mhojem mas khatat ani Mhojem rogot pietat, tanchê sovem sasnnik jivit asa, ani tankam nimannea disa Hanv punorjivont kortolom.

⁵⁵Kiteak Mhojem mas khorem khann ani Mhojem rogot khorem pivonn.

⁵⁶Mhojem mas khatat ani Mhojem rogot pietat tim Mhojê sovem jietat ani Hanv tanchê sovem jietam.

⁵⁷Jivea Bapan Mhaka dhaddla ani Bapa thaun Hanv jivit ghetam; toxench mhaka khatat tim Mhojê thaun jivit ghetelim.

⁵⁸Sorgar thaun denvlo to unddo ho; tumcheam purvozamnim khelo toslo unddo nhoi ho; tim morun gelim. Ho unddo khaun jietat tim sasnnak jivim astelim.”

⁵⁹Hem Tannem Kapernaumachea devsthanant xikovnn ditana mhonn’lem.

⁶⁰Hem aikun, Tacheam xisantleam zaiteam zannamnim mhonn’lem: “To sangta tem kotthin lagta; konnachean toslem aikun gheunk zait?”

⁶¹Aple xis oxe gunngunntat mhonn Apnna bhitôr zanno zaun, Jezun tankam mhonn’lem: “Hem mandun gheunk tumkam zodd lagta?

⁶²Ani Mon’xachea Putak poilo aslo thõi choddtana tumi dekhxeat zalear, tedna kitem mhonntelet tumi?

⁶³Atmo ki jiv dita, mas kiteakuch upkarona. Tumkam hanv uloilam tim utram Atmo ani Jivit.

⁶⁴Punn tumchê modem bhavart dhorinant toslim kãi zannam asat.” Konn-konn bhavart dhôrchim naslim, ani konn Aplo ghat gheto aslo, tem Jezu poilinch thaun zanno aslo.

⁶⁵Ani Tannem mhonn’lem: “Dekhunuch Hanvem oxem sanglam: Bapan hem dennem favo kelea bogor, konnuch Mhojê-xim ieunk xokona.”

⁶⁶Hea uprant, Tacheam xisantlim zaitim zannam koddsorun gelim, ani Tachea sangata anink bhonvona zalim.

⁶⁷Jezun bara zannank mhonn’lem: “Tumi-i vochunk sôdtat bi?”

⁶⁸Simanv Pedrun Taka zobab dilo: “Saiba, konna-xim mhonn vetelenv ami? Tujim utram sasnnik jivitachim!

⁶⁹Ami bhavart dhôrtanv, ani Tum Devan sonvskarlolo mhonn amkam khatri zalea.”

⁷⁰Jezun tankam zobab dilo: “Tumkam bara zannank Hanvem vinchun kaddleat ki na? tori tumchê modlo eklo devchar.”

⁷¹Simanv Iskariotacho put Judas, hachê vixim Tannem oxem mhonn’lem, kiteak ho, barantlo eklo zaun-ui, Tacho ghat gheuncho aslo.