Read Goan Konkani Ju 7 Bible Online

Ju 7 - Goan Konkani bible

Ju 7

¹Tea uprant, Apnnak Judev jivexim marunk sôdtale dekhun, mud’dom Judeiant bhonvonastana, Jezu Galileiant bhonvunk laglo.

²Judevanchea Tombunchi Porob lagim pavleli,

³hea pasot Tacheam bhavamnim Taka mhonn’lem: “Hangasorlo bhair sor ani Judeiant voch, ani Tum kortai tim kamam thõisorleam-i Tujeam xisank polleum-di.

⁴Konn apli ollokh ugddapim diunk sôdta tôr, to aplim kamam guptim korina. Tum oslim kamam kortai zalear, Tum khaxa sobhêmazar dixtti podd.”

⁵Tacheam bhavamnim porian Tacher bhavart dhorunk na.

⁶Jezun tankam mhonn’lem: “Mhozo vêll ozun pavunk na, punn tumcho vêll sodanch pavlolo asa.

⁷Sonvsarachean tumcho dvês korunk zaina, punn to Mhozoch dvês korta, kiteak Hanv tachim kortubam vaitt mhonn sakxi ditam.

⁸Tumi Porbek choddun vochat; Hanv hea Porbek choddun vochona, kiteak Mhozo vêll ozun pavunk na.”

⁹Oxem mhonnun, To Galileiant ravlo.

¹⁰Punn Tachim bhav Porbek choddun vetôch, Jezu Apunn-ui gelo, ugteponnim nhoi, punn konnak kollonastana.

¹¹Porbechea somoiar Judev Taka sôdtale ani mhonntale: “To khõi asa?”

¹²Ani Tachê vixim lôk zaitem futfut’talo. Konn-konn mhonno: “To boro monis.” Ani konn-konn mhonno: “Na, to lokak fosoita.”

¹³Toripunn, Judevanchê bhirantin konn Tachê vixim ugteponnim uloinaslo.

¹⁴Porob modem-xi pavtôch, Jezu Devmondirant choddun gelo ani xikounk laglo.

¹⁵Hem polleun, Judev ojap zaun mhonntale: “Haka zannvai khõichi rê? Xikxonn kãi na taka.”

¹⁶Jezun tankam portipall kelo: “Mhoji xikovnn Mhoji nhoi, punn Mhaka pattoila Tachi;

¹⁷konn Tachi khuxi korunk raji asat zalear, Mhoji xikovnn Devachi vô Mhojeach monantli, tem tankam kollon ietelem.

¹⁸Apleach monantlem kaddun uloitat tim aplich vhoddvik sôdtat; punn apnnank dhaddla tachi vhoddvik sôdtat tim sota pormannem choltat; osleam mon’xam sovem lottikponn na.

¹⁹Moizesan tumkam Somurt dilea ki na? Toripunn tumchê modlo konnuch Somurt samballina. Kiteak mhonn Mhaka jivexim marunk sôdtat tumi?”

²⁰Lokan mhonn’lem: “Tujer devchar bosla! Konn Tuka jivexim marunk sôdta ?”

²¹Zap diun, Jezun tankam sanglem: “Hanvem ek kam’ kelam ani tem polleun tumi sogllim ojap zatat.

²²Chintun polleiat: Moizesan tumkam sunôt korcho kaido ghalo (ti Moizesa koddchi mhonn nhoi, punn purvozam koddchi ailea) ani Sabbatha disa tumi mon’xachi sunôt kortat.

²³Moizesachi Somurt môddina zaunk konn-eka mon’xachi Sabbatha disa sunôt zata zalear, Hanvem Sabbatha disa eka mon’xachem sogllem ang borem kelam dekhun, kiteak mhonn tumi Mhaka zolltat?

²⁴Voilea-voir polleun nit korinakat, punn nitivontponnan nit korat.”

²⁵Jeruzaleantleam kãi zannamnim mhonn’lem: “Jivexim marunk sôdtat to monis ho nhoi?

²⁶Ani ho polle To sot’ten uloita ani te Taka kãich mhonnonant! Khoreponnim Krist To Hoch mhonn amcheam vhoddilank kollon ailam kai?

²⁷Tori Ho khõicho To ami zannonv; punn Krist ietolo tedna, To khõicho To konnak kollchem na.”

²⁸Hea pasot Devmondirant xikoitana Jezun arddun mhonn’lem: “Tumi Mhaka ollkhotat khorem? ani Hanv khõicho ailam, tem-i tumi zannont? Khorem mhollear, Hanv Mhojêch osttongim ieunk na; Mhaka pattoila To sotevont, ani Taka tumi ollkhonant.

²⁹Hanv zalear Taka ollkhotam, kiteak Hanv Tachê thaun ailam ani Tannem Mhaka pattoila.”

³⁰Te Taka dhorunk sôdtale; punn konnench Tacher hat ghalunk na, kiteak Tacho vêll ozun pavunk naslo.

³¹Tori loka modlean zaiteamnim Tacher bhavart dovorlo; tim mhonntalim: “Krist ietolo tedna, hannem keleat tanchê-vôn odik chodd khunna kortolo kai?”

³²Tachê vixim futfutun lôk osleô gozali korta mhonn Farizevamnim aikolem. Mukhel iadnikamnim ani Farizevamnim Taka dhorun haddunk chovkidarank pattoile.

³³Tedna Jezun mhonn’lem: “Anink ilo vêll Hanv tumchê modem asam ani uprant Mhaka pattoila Tachê-xim vetam;

³⁴tumi Mhaka sôdtelet, punn Hanv tumkam mellcho na. Hanv astolom thõi tumchean ieunk zaina.”

³⁵Judevamnim ekamekak mhonn’lem: “Amkam mellona zaunk Ho khõi vochunk korta kai? Zõi videxeam modem amcho lôk ximpoddla, thõi videxeank xikovnn diunk vetolo kai?

³⁶‘Tumi Mhaka sôdtelet ani hanv tumkam mellcho na’, ani ‘hanv astolom thõi tumchean ieunk zaina’, oxem to mhonnta tacho ôrth kitem?”

³⁷Porbechea nimannea ani dobajik disa, ubo ravun Jezun arddun mhonn’lem: “Konnank zôr tan laglea, tãnnim Mhojê-xim ieunchem,

³⁸ani Mhojer bhavart tthevtat tãnnim pieunchem.” Povitr Pustok oxem mhonnta: “Tachê bhitorleô jivea udkacheô zhori ghosghoxit vhanvteleô.”

³⁹Jim konn Jezucher bhavart tthevto aslim, tankam Atmo mellcho aslo, hachê vixim Tannem oxem mhonn’lem. Jezu ozun mhoimevont zaunk naslo, dekhun Devan ozun Atmo diunk naslo.

⁴⁰Him utram aikun, kãi zannamnim mhonn’lem: “Khorench ho êk provadi.”

⁴¹Dusreamnim mhonn’lem: “Hoch to Krist.” Punn heramnim mhonn’lem: “Krist Galileiantlo ievpacho na, oxem nhoi?

⁴²Krist Davidachê sonstintlo ani Davidachea Bethlehem’ nograntlo ietolo mhonn Povitr Pustok sangina?”

⁴³Oxi Tachê vixim loka modem futt poddli.

⁴⁴Kãi zann Taka dhorunk sôdtale, punn konnench Tacher hat ghalunk na.

⁴⁵Tedna chovkidar mukhel iadnikam ani Farizevam sorxim portun gele. Hãnnim tankam mhonn’lem: “Tumi taka kiteak dhorun haddunk na?”

⁴⁶Chovkidaramnim mhonn’lem: “Ho monis uloita tê bhaxen kodinch konn ulounk na!”

⁴⁷Farizevamnim tankam zobab dilo: “Tumi-i fosovleat kitem?

⁴⁸Vhoddilantlea ani Farizevantlea konnem tori tacher bhavart dovorlo mhonn asa?

⁴⁹Punn hi zat Xastrachi ollokh nasleli, xirap poddleli!”

⁵⁰Tanchê modlea eklea, Jezu-xim adim ail’lo, tea Nikodeman, tankam mhonn’lem:

⁵¹“Eka mon’xachem poilem aikolea bogor, ani to kitem korta tachi ollokh ghetlea xivai, amchem Xastr tachi mon’subi korta zait?”

⁵²Tãnnim mhonn’lem: “Tum-i bi Galileikar kitem? Chovkoxi korun polle ani eklo-i provadi Galileiantlo upzona mhonn tuka kollon ietelem.” [

⁵³Te ap-aplea ghora portole.