Read Goan Konkani Ju 8 Bible Online

Ju 8 - Goan Konkani bible

Ju 8

²Ani bhov sokallim To novean Devmondirant ailo; sogllo lôk Tachê-xim zomlo ani bosun To tankam xikounk laglo.

³Dhormxastreamnim ani Farizevamnim pordvarant sampoddlelê êkê bailek haddli ani tancheam soglleam modem ubi keli.

⁴Tãnnim Taka mhonn’lem: “Guruji, hi bail atanch pordvar korta thõich astana sampoddlea.

⁵Xastrant Moizesan osleam bailank fatraun marunk amkam formailam. Tôr tum kitem mhonntai?”

⁶Jezuk Tachea zobabant dhorun Tacher arôp manddchê khatir tãnnim oxem vicharlem. Voddôv ghalun Jezu Aplea bottan zomnir borounk laglo.

⁷Ani te Tachê kodde vicharit ravle dekhun, ubo ravun Tannem tankam mhonn’lem: “Tumchê modem zaka patok na, to ticher fatôr marunk poilo zauncho.”

⁸Anink êk pavtt voddôv ghalun To zomnir boroit ravlo.

⁹Hem aikun, te soglle, eka pattlean êk, koddsorunk lagle; odik zannte te poile gele. Ekloch urlo Jezu ani modem, ubi asli thõich, ti bail.

¹⁰Novean, nitt zaun, Jezun tika mhonn’lem: “Bai, te khõi asat? Konnench tujer khastichem formonn marunk na mum?”

¹¹Tinnem mhonn’lem: “Konnench na, Saiba.” Ani Jezun mhonn’lem: “Hanv-ui tuka atam guneanvkarnn mhonnona. Voch ani hea fuddem anink patok korinaka.”][3]

¹²Uprant Jezun novean loka kodde uloun mhonn’lem: “Hanv sonvsaracho Uzvadd. Mhozo pattlav kortat tim kallokant cholchim nant, punn tankam Jivitacho Uzvadd astolo.”

¹³Tedna Farizevamnim Taka mhonn’lem: “Tum Tujêch vixim govai dita; Tujê govaikek mol na.”

¹⁴Jezun portipall kelo: “Hanv Mhojêch vixim govai ditam zalear-ui, Mhoji govaiki osôl-khori; karonn Hanv khõicho ailam ani khõi vetam tem Hanv zannom; punn Hanv khõicho ailam ani khõi vetam tem tumi nokllot.

¹⁵Tumi mon’xasoimbachê nodren mon’subi kortat; Hanv konnachich mon’subi korina.

¹⁶Punn mon’subi korin zalear, Mhoji mon’subi osôl-khori; kiteak Hanv ekloch na: Zannem Mhaka pattoila to Mhozo Bap Mhojê borabôr asa.

¹⁷Dogam mon’xanchê govaikek mol asa, oxem tumchea xastrant boroil’lem asa.

¹⁸Hanv Mhojêch vixim govai ditam, ani Zannem Mhaka pattoila to Mhozo Bap Mhojê vixim govai dita.”

¹⁹Tea pasot tãnnim Taka mhonn’lem: “Tuzo bap? Khõi asa rê to?” Jezun zap diun mhonn’lem: “Tumi Mhaka ollkhonant ani Mhojea Bapak-ui ollkhonant; tumi Mhaka ollkhol’lo zalear, Mhojea Bapak-ui ollkhoto aslet.”

²⁰Him utram Devmondirant xikoitana dananchê pettê-xim To uloilo; punn Tacho vêll ozun pavunk naslo dekhun, konnench Taka dhôrlo na.

²¹Anink êk pavtt Jezun tankam mhonn’lem: “Hanv chol’lom, ani tumi Mhaka sôdtelet ani tumchea patkant tumi mortelet. Hanv vetam thõi tumchean ieunk zaina.”

²²Judevamnim mhonn’lem: “ ‘Hanv vetam thõi tumchean ieunk zaina’, oxem to sangta mhonntôch, to aploch jiv ditolo mhonn to sangunk sôdta gai?”

²³Tannem tankam mhonn’lem: “Tumi sokoilim, Hanv voilo; tumi hea sonvsarantlim, Hanv hea sonvsarantlo nhoi.

²⁴Tumi tumcheam patkamnim mortelet mhonn Hanvem tumkam sanglam, kiteak ASAM TO HANVUCH mhonn tumi bhavart dhorina zaxeat zalear, tumcheam patkamnim tumi mortelet.”

²⁵Tãnnim Taka mhonn’lem: “Tum konn tôr?” Jezun tankam zobab dilo: “Poilinch thaun Hanvem tumkam sanglam Toch.

²⁶Tumchê vixim zaitem sangchem ani nivaddchem asa; punn Mhaka pattoila To sotevont, ani jem Hanvem Tachê koddsun aikolam tench Hanv sonvsarak sangtam.”

²⁷To Bapachi khobor sangta mhonn tim somzunk nant.

²⁸Tea pasot Jezun mhonn’lem: “Tumi Mon’xachea Putak ubartelet tedna, tumkam hem kollon ietelem, ki ASAM TO HANVUCH. ani Mhojêch osttongim Hanv kãi korina, punn zoxem Bapan Mhaka xikoila toxem Hanv uloitam.

²⁹Ani Zannem Mhaka pattoila To Mhojê sovem asa; Tannem Mhaka eklo sanddunk na, kiteak Taka man’ta tench Hanv sodam kortam.”

³⁰To oxem uloilo tedna, zaiteamnim Tacher bhavart dovorlo.

³¹Apnnacher bhavart dovorlo team Judevank Jezun mhonn’lem: “Tumi Mhojem utor tumchê bhitôr rigun dovorxeat zalear, tumi khoreponnim Mhoje xis zatelet.

³²Ani tumkam sot kollon ietelem ani sot tumkam svotontr kortelem.”

³³Tãnnim Taka mhonn’lem: “Ami Abrahamachi sonsôt, ani konnachinch gulamam ami kednanch zaunk nanv. ‘Tumi svotontr zatelet’, oxem tum koso mhonntai tôr?”

³⁴Jezun tankam portipall kelo: “Hanv tumkam sot sangtam, patok kortat tim patkachim gulam.

³⁵Gulam’ sodanch ghorabeant urona; put to sodanch ghorabeachoch.

³⁶Hea pasot Put zôr tumkam svotontr korit, tôr tumi khoreponnim svotontr zatelet.

³⁷Tumi Abrahamachi sonsôt mhonn Hanv zannom; tori Mhojem utor tumchê bhitôr rigona dekhun, tumi Mhozo jiv kaddunk sôdtat.

³⁸Jem Hanvem Mhojea Bapa sovem dekhlam tem Hanv sangtam, ani jem tumi tumchea bapaichem aikolam tem tumi kortat.”

³⁹Tãnnim Taka portipall kelo: “Abraham’ amcho bap.” Jezun tankam mhonn’lem: “Tumi Abrahamacheô put-dhuvô zal’leat zalear, jem Abrahaman kelem tem tumi korto aslet.

⁴⁰Punn Deva koddsun aikol’lem sot Hanvem tumkam sanglam, tori astana tumi Mhozo jiv kaddunk sôdtat. Abrahaman oxem korunk na.

⁴¹Tumi kortat tim kamam tumchea bapaichim.” Tãnnim Taka mhonn’lem: “Kamcharan ami zolmak ieunk nanv; amkam ekloch Bap asa, to mhollear Dev.

⁴²Jezun tankam mhonn’lem: “Dev tumcho Bap zal’lo zalear, tumi Mhozo môg korto aslet, kiteak Hanv Deva thaun upzolam ani ailam; Mhojêch khuxen Hanv ieunk na, punn Tannem Mhaka dhaddla.

⁴³Hanv sangtam tem tumi kiteak somzun ghenant? Kiteak Mhojem utor tumchean kanar gheunk zaina.

⁴⁴Tumcho bap devchar, ani tumchea bapaik zai tem korunk tumchi khuxi. Mullak thaun to prannghatki, to kednanch sotant riglo na, kiteak tachê sovem sot na. To lottikponnam sangta tedna aplea soimba pormannem uloita, kiteak to fottkiro ani fottincho bapui.

⁴⁵Punn Hanv sot uloitam dekhunuch, tumi Mhojer bhavart dovrinant.

⁴⁶Tumchê bhitorlo konn-ui Mhaka patok asa mhonn dakhoit? Hanv tumkam sot sangtam zalear, kiteak Mhojer tumi bhavart dovrinant?

⁴⁷Jim konn Devachim, tim Devachim utram aikun ghetat; tumi Devachim nhoi dekhun, tumi tim aikun ghenant.”

⁴⁸Judevamnim Taka portipall kelo: “Tum Samariekar ani tujer devchar bosla, oxem ami mhonntanv tem sarkem zalem na?”

⁴⁹Jezun portipall kelo: “Mhojer devchar na, punn Mhojea Bapak Hanv man ditam ani tumi Mhaka beman kortat.

⁵⁰Tori Hanv Mhoji khaxachi vhoddvik sodina; ti sôdtolo ani nit kortolo Eklo Konn asa.

⁵¹Khorench Hanv tumkam sot tem sangtam: jim konn Mhojem utor samballtat, tim kodinch morchim nant.”

⁵²Judevamnim Taka mhonn’lem: “Tujer devchar asa mhonn atam amkam sarkench koll’lem. Abraham’ melo ani provadi-i morun gele; ani tum amkam sangtai: ‘jim konn mhojem utor samballtat, tim kodinch morchim nant! ’

⁵³Amcho bap Abraham’ morun gelo; tachê poros tum vhôdd kitem? Ani provadi-i morun gele. Tum apunn konn mhonn sangunk sôdtai?”

⁵⁴Jezun portipall kelo: “Hanv Mhojich vhoddvik korin zalear Mhoji vhoddvik kãich nhoi; Mhoji vhoddvik korpi Mhozo Bap asa, tumi tumcho Dev mhonntat Toch;

⁵⁵tori tumi Taka ollkhunk na. Punn Hanv Taka ollkhotam; Taka ollkhonam mhonn Hanvem mhonnlelem zalear, tumchê bhaxen Hanv-ui fottkiro zato aslom. Punn Hanv Taka ollkhotam ani Tachem utor samballtam.

⁵⁶Mhozo Dis polleunchê axen Abraham’ tumcho bap khuxal zalo; tannem to dekhlo ani taka khup anond zalo.”

⁵⁷Tedna Judevamnim Taka mhonn’lem: “Tuka ozun pon’nas vorsam zaunk nant, ani tunvem Abrahamak dekhloi?”

⁵⁸Jezun tankam portipall kelo: “Khorench Hanv tumkam sot tem sangtam: Abraham’ aschê adim HANV ASAM!”

⁵⁹Hea pasot tãnnim Tacher fator marunk ukôl’le; punn Jezu liplo ani Devmondirantlo bhair sorun gelo.