Read Goan Konkani Ju 9 Bible Online

Ju 9 - Goan Konkani bible

Ju 9

¹Vetam-vetam Jezun eka zolmachea kurdd’deak dekhlo.

²Ani Tacheam xisamnim Tachê kodde vicharlem: “Guruji, konnachea patkak lagun ho monis kurddo zolmolo? tachea vô tachea avoibapaichea patkak lagun?”

³Jezun zobab dilo: “Hea mon’xan vô tachea avoibapain patok kelem mhonn nhoi, punn Devachim kortutvam tachê sovem porgott zaunchim mhonn to oso zolmolo.

⁴Disacho uzvadd astana, Zannem Mhaka pattoila, Tachim kamam Hanvem korunk zai; rat ieta tedna konnachean vavr korunk zaina.

⁵Hanv sonvsarant aso-sôr, Hanv sonvsaracho Uzvadd.”

⁶Oxem uloun Tannem zomnir luti uddoili, lutien chiktti keli, ani ti chiktti kurdd’deachea dolleank kaddli,

⁷ani taka mhonn’lem:” Voch ani Siloamachê tollient dhu (Siloam’ mhonngê ‘Dhaddlolo’).” Kurdd’dean vochun dhulem, ani taka nodor aili, magir to portun ailo.

⁸Tachim xeza-samarim ani taka adim bhik magtana pollel’lo tim mhonnunk laglim: “Bhik magunk bostalo to ho nhoi?”

⁹Konn-konn mhonntalim: “Hoch to”. Dusrim mhonntalim : “Na; punn ho tachê bhaxen dista.” Tannem mhonn’lem: “Hanvuch to.”

¹⁰Tãnnim taka vicharlem: “Tuje dolle koxe ugòddle?”

¹¹Tannem zobab dilo: “Jezu nanvachea mon’xan chiktti keli ani mhojeam dolleank kaddli ani mhaka mhonn’lem: ‘Siloam’ tollient vochun dhu. ’ Mhonntôch hanv gelom, hanvem dhulem ani mhaka nodor aili.”

¹²Tãnnim taka mhonn’lem: “To khõi asa?” Tannem zap dili: “Hanv nokllom.”

¹³Adim kurdd’do asleleak tãnnim Farizevam-xim haddlo.

¹⁴Jezun chiktti korun tache dolle ugôddlele to dis Sabbath aslo.

¹⁵Taka nodor koxi aili kai mhonn Farizevamnim novean vicharlem. Ani tannem tankam mhonn’lem: “Tannem chiktti mhojeam dolleank kaddli, hanvem dhulem ani atam mhaka dixtti poddta.”

¹⁶Farizevantleam kãi zannamnim mhonn’lem: “Ho monis Devacho khoro bhokt nhoi. To Sabbath pallina.” Punn dusreamnim mhonn’lem: “Patki monis osleô khunna koxeô korunk xokot?” Tanchê modem veg-vegllim motam zalim.

¹⁷Hea pasot adim kurdd’do asleleak anink êk pavtt tãnnim mhonn’lem: “Tuje dolle ugôddleat tachê vixim tum kitem mhonntai?” Tannem sanglem: “To êk provadi.”

¹⁸To kurdd’do aslolo ani magir taka nodor aili mhonn Judev sotmaninam zale; hea pasot nodor ail’leachea avoibapaik apoun haddun,

¹⁹tãnnim tanchê kodde vicharlem: “Ho tumcho put? To kurddo zolmol’lo mhonn tumi sangtat, to atam koso polleta tôr?”

²⁰Tachea avoibapain zap dili: “Ho amcho put ani to kurdd’do zolmol’lo mhonn ami zannonv;

²¹punn to atam koso polleta tem ami nokllonv, ani konnem tache dolle ugôddleat tem-i bi ami nokllonv. Tachê kodde vicharat; taka apli pirai asa; to aplem sangtolo.”

²²Tacho avoibapui Judevank bhietalo dekhun tãnnim oxem sanglem; kiteak Jezu Krist mhonn konnem-i mandun ghetlem zalear, taka devsthanantlo bhair ghalcho mhonn tãnnim tharail’lem.

²³Tea pasot tachea avoibapain mhonn’lem: ‘Taka apli pirai asa, tachê kodde vicharat. ’

²⁴Tedna, adim kurdd’do aslelea mon’xak tãnnim dusrê pavtti apoilo ani taka sanglem: “Devak mhoima di. To monis patki mhonn ami zannonv.”

²⁵Tannem zobab dilo: “To patki zalear mhaka khobor na; hanv zannom tem itlench: hanv adim kurddo aslom, punn atam mhaka dixtti poddta.”

²⁶Tãnnim taka novean vicharlem: “Tannem tuka kitem kelem? Tuje dolle tannem koxe ugôddle?”

²⁷Tannem tankam zap dili: “Hanvem tumkam atanch sanglam, ani tumi tem kanar ghenant. Anink êk pavtt kiteak aikunk sôdtat? Tumi-i tache xis bi zaunk sôdtat?”

²⁸Te taka oxe hinddsunk lagle: “Tum za tacho xis! Ami zalear Moizesache xis!

²⁹Dev Moizesa kodde uloilo mhonn ami zannonv, punn ho monis khõicho to ami nokllonv.”

³⁰Tea mon’xan zobab diun mhonn’lem: “Ojap tem hem! To khõicho to tumi nokllot, ani tori tannem mhoje dolle ugôddle.

³¹Dev patkeanchem aikona mhonn ami zannonv, punn konn Devachi bhokti kortat ani Tachi khuxi palltat zalear, Dev tanchem aikota.

³²Sonvsar ghôddleleak konnem kurddo zolmol’leache dolle ugôddleat mhonn kodinch konnench aikunk na.

³³Ho monis Devacho khoro bhôkt nhoi aslo zalear, tachean kitench korunk zaunchem naslem.”

³⁴Tãnnim taka portipall kelo: “Tum nibêl patkant zolmolai ani amkam xikounk ailai?” Ani tãnnim taka bhair ghalo.

³⁵Tãnnim taka bhair ghalo mhonn Jezuchea kanar poddlem, ani Taka to mell’lo tedna Jezun taka vicharlem: “Tum Mon’xachea Putacher bhavart dovortai?”

³⁶Tannem portun zap dili: “Saiba, hanvem Tacher bhavart tthevunk, To konn To mhaka sang.”

³⁷Jezun mhonn’lem: “Tunvem Taka dekhlai ani tujê lagim uloita Toch To.”

³⁸Tannem mhonn’lem: “Saiba, hanv bhavart dhôrtam.” Ani pãiam poddun, tannem Jezuk nomoskar kelo.

³⁹Jezun mhonn’lem: “Nit korunk Hanv hea sonvsarant ailam: zankam dixtti poddona tankam nodor mellchê khatir, ani zankam dixtti poddta tim kurdd’dim zaunchê khatir Hanv ailam.”

⁴⁰Tachê sorxim asleleam thoddeam Farizevamnim hem aikun Taka mhonn’lem: “Ami-i kurdde bi?”

⁴¹Jezun tankam mhonn’lem: “Tumi kurdd’de zal’leat zalear, tumkam guneanv ascho naslo; punn atam ‘amkam dixtti poddta, ’ oxem tumi mhonntat dekhun, tumi patkantuch asat.