Read Goan Konkani AI 1 Bible Online

AI 1 - Goan Konkani bible

AI 1

¹Jezun Aplo vavr suru kelo tedna thaun Devan Taka sorgar ubarun vhelo tea disa porian Tannem kelem ani xikoilem titleachi-i khobor, mogall Teofila, mhojea poilea pustokar hanvem boroun dovorlea; toxench Apnnem vinchun kaddleleam apostlank Povitr Atmeachea bollan Tannem dil’leam updesanchi-i khobor thõi hanvem dilea.

³Aplea koxttam-mornna uprant Apunn jivo asa mhonn jin’nsavar purave diun Tannem tankam dakhoilem; challis dis To tankam dixtti poddlo ani Devachea Rajea vixim tanchê kodde uloilo.

⁴Tanchê sangatim jevnnar astana, Jeruzaleantle koddsoronam zaunk, punn Bapan kel’lê bhasavnnek ravunk Jezun tankam formailem. Jezun sanglem: “Hi bhasavnni kosli ti Mhojeach tonddantli tumi aikolea:

⁵Juanvan udkan batism dila, punn thoddeanch disamnim tumkam Povitr Atmean batism melltolo.”

⁶Te zomlele astana, tãnnim Jezu kodde vicharlem: “Somia, atam Israel-raxttrachi razvoddki Tum novean sthapun ditoloi to vêll pavlo kai?”

⁷Jezun tankam zobab dilo: “Bapan Aplea odhikaran nemlole kall ani ghoddiô zanno zaunk tumkam poddlem na.

⁸Punn tumcher denvun ietolo tea Povitr Atmeachem boll tumi ghetelet ani Jeruzaleant, akhea Judeiant ani Samarient ani sonvsaracheam ximam porian tumi Mhoje govai zatelet.”

⁹Hem sanglea uprant, te polletat thõich astana, Jezuk Devan voir-voir ubarun vhelo ani tancheam dolleam mukhavelo eka kupan Taka lipoilo.

¹⁰To choddun veta astana, te aple dolle sorgak lavunuch asle. Ovchit dhovim vostram ghalun dog dadle tanchê kuxik ube zale.

¹¹Tãnnim mhonn’lem: “Galileikaramnô, tumi oxe sorgak nodor lavunuch kiteak ube asat? Tumchê modlo Devan voir ubarun vhela toch Jezu, tumi sorgar vetana pollelo tosoch, porto ietolo.”

¹²Olivet mhonnlelea dongrar thaun te Jeruzaleak portole; ho dongôr sumar êk kilometr Jeruzalea thaun pois asa.[1]

¹³Xarant bhitôr sortôch, apunn ravtale tea unchlea vosreant te gele. Te mhonn’lear he: Pedru, Juanv, Jakob, Andre, Filip, Tomas, Bartolomêv, Matêv, Alfevacho put Jakob, krantikar Simanv ani Jakobacho put Judas.

¹⁴Te soglle ekach monan magnnem korit asle; tanchea vangdda aslo êk bailancho zomo; hanchê modem Jezuchi avoi Maria, ani tea bhair Tache bhav.

¹⁵Hachê uprant kãi disamnim, sumar ekxem-vis bhavarteam modem ubo ravun, Pedrun mhonn’lem:

¹⁶“Bhavam-bhoinnimnô, Judasa vixim Povitr Atmean Davidachê tonddim adim-fuddench sangun dovorlelem Povitr Pustokantlem utor pallon ieunk zai aslem. To amchea vangdda aslo ani he sevent taka-i vantto mell’lolo; punn Jezuk dhorunk aile tankam vatt dakhounk to fuddem sorlo.

¹⁸Aplea khotteponnachi mozuri gheun tannem ek xet viktem ghetlelem; ani tondd zomnir apttota toxem to xevttolo, ani pott futton tacheô soglleô antkiddiô bhair sorun ximpoddleô.

¹⁹Jeruzaleant ravteleam soglleank hachi khobor pavli, ani oxem hea xetak tanchê khaxa bhaxen ‘Hakeldama’ mhonngê ‘Rogtachem Xet’ mhonn nanv poddlem.

²⁰Stotranchea Pustokar oxem boroil’lem asa: ‘Tachem ghor padd zaum ani tantum ravunk konnuch urona zaum.’ Hea bhair oxem-i boroil’lem asa: ‘Tachi zutti anink konn gheum.’

²¹Hea pasot, Somi Jezu punorjivont zala mhonn amchea vangdda sakxi divpi dusro eklo amkam zai. Somi Jezu amchê modem dixtti poddlo ani bhonvlo team disamnim, mhonngê Juanv batism ditalo tedna-san, Jezuk amchê thaun Devan ubarun vhelo to dis porian, hea sogllea kallar amchea vangdda asle team dadleam modlo eklo to zaunk zai.”

²³Tedna tãnnim doganchim nanvam suchoilim: Barsab’bas mhonnlolo Juze, addnanvan Nitivont, ani Matias.

²⁴Magir tãnnim oxem magnnem kelem: “Somia, soglleanchim kallzam Tum ollkhotai; tôr aplea khaxa zagear vochunk Judasan soddun dilo te sevecho vavr ani apostlanchem kam’ korunk heam dogam bhitorlea konnak Tunvem vinchun kaddlai to amkam dakhoi.”

²⁶Tedna tãnnim sorti ghaleô ani sort Matiasacher poddli. Ani ikra apostlam modem taka lêkhlo.