Read Goan Konkani AI 10 Bible Online

AI 10 - Goan Konkani bible

AI 10

¹Xezareiant Kornel nanvacho êk monis aslo. Romi loskorachê “Italiani” mhonnlolê Polttonnecho to xotpoti aslo.

²To bhoktivont monis aslo ani aplea ghorabeacheam soglleam mon’xam borabôr Devak bhôztalo. Lokak to zaito adar ditalo ani sodanch Devak magnnem kortalo.

³Êk dis, sanjecheam sumar tin vorancher, Devacho êk dut aplea ghorant bhitôr sortalo ani “Kornel” mhonnun apnnak ulo kortalo to tannem dorxonant sarko dekhlo.

⁴Devdutak polleun to koddkoddlo. Tannem mhonn’lem: “Kitem ga, Saiba?” Devdutan portipall kelo: “Tuzo ugddas koso, tujim magnnim ani tujim danam Deva mukhar choddun pavleant.

⁵Atam Pedru mhonnlolea konn-eka Simanvak apounk Jop’pa nogrant mon’xank dhadd.

⁶To eka Simanv chamarager vostek asa ani hachem ghor doriachê kinarer asa.”

⁷Tachê lagim uloilo to devdut vetôch, Kornelan dogam chakrank ani aplê sevek asleleantlea eka bhoktivont soinikak apoile,

⁸ani, kitem ghòddlelem tem tankam sangun, tankam Jop’pak dhaddle.

⁹Dusrea disa, te apli vatt cholun, nogra lagim pavtana, don’parchea vellar prarthon korunk Pedru pattosar choddlo.

¹⁰Taka bhuk lagli ani to jevnnak ravtalo, punn jevonn toiar zatanam, Povitr Atmeacho bhar tacher ailo.

¹¹Sôrg ugto zal’lo tannem dekhlo ani char-ui konnxeamnim dhôrloli ani sorgar thaun zomni porian denvoil’li êk vhoddli ôl koxi kitem tannem dekhlem.

¹²Ticher asleô sonvsarantleô char pãiancheô soglleô mon’zati ani jivannim ani ontralla velim suknnim ticher aslim.

¹³Tedna taka oxem mhonntalo to êk tallo tannem aikolo: “Pedru, utth, mar ani kha.”

¹⁴Punn Pedrun zobab dilo: “Na, Saiba, kodinch na! Opovitr ani mhellem kitench hanvem kednanch khaunk na.”

¹⁵Anink êk pavtt tea tallean taka mhonn’lem: “Devan xud’dh kelam tem tum opovitr mhonnonaka.”

¹⁶Hem oxem tin pavtti ghòddlem ani rokddench sogllem portun sorgar ubaron gelem.

¹⁷Hea dorxonachi somzonni kitem kai mhonn to chintunk poddlo. Itlea mhonnosôr, Kornelan dhaddlele monis pavle. Simavachem ghor khõi asa tem sodun kaddlem ani te darachea umbrear thamble.

¹⁸Ani ulo korun Pedru mhonnlolo Simanv thõi vostek asa kai mhonn tãnnim vicharlem.

¹⁹Pedruchem lokx ozun dorxonacher astana, Atmean taka mhonn’lem: “He polle, teg monis tuka sôdtat.

²⁰Utth, sokol denv ani tanchê borabôr voch; pattim-fuddem sorum naka, kiteak Hanvench tankam dhaddleat.”

²¹Sokla denvun vochun, Pedrun team mon’xank mhonn’lem: “Tumi sôdtat to monis hanvuch; kiteak aileat tumi?”

²²Tãnnim zobab dilo: “Kornel xotpoti êk promannik ani Devachi bhokti korpi monis; taka Judevanchi akhi porza man dita. Tuka apnnager apoi mhonn ani tunvem taka kitem sangchem asa tem aikun ghe mhonn Devan taka Aplea povitr duta vorvim sanglam.”

²³Pedrun team mon’xank bhitôr apoile ani tankam vostek dovorle. Dusrea disa to tanchê borabôr vattek laglo ani tanchê sangatim Jop’pache thodde bhav-ui gele.

²⁴Anink eka disan te Xezareiak pavle. Apleam soiream ani lagxileam ixttam sangatim Kornel tankam ravtalo.

²⁵Ani Pedru ghorachea umbrea-xim pavtôch, Kornel taka mellunk gelo ani pãiam poddun taka nomoskar kelo.

²⁶Punn Pedrun taka oxem mhonnun utthoilo: “Utth, tôr hanv-ui êk monis.”

²⁷Uloit-uloit te bhitôr gele ani hanga ektthãi zal’lo to khup lôk tankam mell’lo.

²⁸Tannem tankam oxem mhonn’lem: “Eka Judêv mon’xan eka videxeak ektthovunk ani tanger ravunk kitlem vittechem tem tumi zannont. Punn khõicheach mon’xak hanvem opovitr ani mhello mhonncho nhoi mhonn Devan mhaka dakhoilam.

²⁹Heach pasot tunvem mhaka apounk dhaddtôch hanv pattim-fuddem soronastana ailam. Tôr hanv tujê lagim vichartam: tunvem mhaka kiteak mhonn apounk dhaddlai?”

³⁰Kornelan zobab dilo: “Tin dis zale, hêch ghoddier, mhojea ghorant sanjecheam tin voranchem hanv magnnem kortalom; ovchit zhogzhogit vostr ghalun êk monis mhojea fuddeant ubo zalo.

³¹Tannem mhaka oxem mhonn’lem: ‘Kornel, Devan tujem magnnem aikun ghetlem ani tujeam danancho Deva mukhar ugddas zalo.

³²Tôr Jop’pak aslelea Simanv mhonntat tea Pedruk apounk dhadd. To Simanv chamarager ravta ani tachem ghor doriachê kinarer asa.’

³³Tea pasot hanvem tuka rokddoch apounk dhaddlo ani tunvem ieun borem kelem. Tôr polle, hanga ami tujê mukhar ektthãi zal’lim asanv, Sorvesporan tuka kitem sangunk formailam tem aikunk ami toiar asanv.”

³⁴Tondd ugddun Pedrun ulounk suru kelem. Tannem mhonn’lem: “Dev tonddak polleun mon’xam modem ontôr korina: hem sot mhonn mhaka tthavem zalem;

³⁵punn konn-ui monis, khõichea-i raxttracho to zaum, Devachi bhokti korta ani Devachê khuxê pormannem cholta tôr, to ki Devak manovta.

³⁶Devan Jezu Krista vorvim xantichem xubhvhortoman porgottunk Israelacheam putam-dhuvank nirôp dhaddlo; Toch soglleancho Somi.

³⁷Akhea Judeiant kitem ghòddlam tem tumi zannont: Juanvan batism porgôttlo tethun thaun, Jezun Galileia-sun Aplem kam’ suru kelem.

³⁸Devan hea Nazaretchea Jezuk Povitr Atmean ani xoktin makhlo. Veta thõi Tannem borem kelem ani devcharachê podvê khal asleleank suttka dili, kiteak Dev Tachê sovem aslo.

³⁹Judeikaranchea prantant ani Jeruzaleant Tannem keleô team soglleam vostunche ami govai. Eka lankddar umkollaun tãnnim Taka jivexim marlo.

⁴⁰Punn tisrea disa Devan Taka punorjivont kelo ani To dixtti poddunk nirmilem:

⁴¹Sogllea lokak nhoi, punn Devan adim-fuddem nemleleam govaiank; amich te govai, To mel’leantlo punorjivont zatôch Tachê borabôr jevleanv ani pieleanv te.

⁴²Jiveam ani mel’leancho Mon’subidar Apnnak Devan nemla mhonn lokak porgottunk ani haka govai diunk Tannem amkam adnea dilea.

⁴³Tacher bhavart dovortat tim sogllim Tachea nanvan patkanchem bhogsonnem ghetat mhonn soglle provadi govai ditat.”

⁴⁴Pedru oxem uloita thõich astana, tachem utor aikoteleam soglleancher Povitr Atmo denvun ailo.

⁴⁵Videxeank porian Devan Povitr Atmeachem dennem favo kelem mhonn Pedru borabôr ail’le te sunôt kel’le soglle bhavarti thottakle.

⁴⁶Kiteak tim atveô bhasô uloitalim ani Devak vakhanntalim mhonn tankam aikum ietalem.

⁴⁷Tedna Pedrun mhonn’lem: “Amkam mell’lo toch Povitr Atmo tankam-i mell’lo mhonntôch, tankam udkacho batism diunk konnachean addaum-ieta?”

⁴⁸Tannem tankam Jezu Kristachea nanvan batism diunk formailem. Uprant, thodde dis apnnam-xim rav mhonn tãnnim tachê kodde maglem.