Read Goan Konkani AI 11 Bible Online

AI 11 - Goan Konkani bible

AI 11

¹Videxeamnim-i Devachem utor mandun ghetlem mhonn Judeiant asleleam apostlamnim ani bhavam-bhoinnimnim aikolem ani,

²Pedru Jeruzaleak ailo tedna, sunôt kel’leamnim tachi ttika korun mhonn’lem:

³“Sunôt korunk naslo-leanger kiteak ravloi tum, ani tanchê borabôr kiteak mhonn jevloi?”

⁴Tedna, zobab diun, Pedrun ekan-ek viskuttaun sanglem:

⁵Êk dis hanv Jop’pa nogrant aslom tedna, magnnem kortam astana Povitr Atmeacho bhar mhojer ailo; tedna eka dorxonant char-ui konnxeamnim dhôrleli sorgar thaun zomni porian denvoil’li êk vhoddli ôl koxi kitem hanvem dekhlem. Hem nitt mhojê-xim denvun ailem.

⁶Hanvem tancher barik nodor marli ani sonvsarantleô mon’zati, zonavoram ani jivannim ani varea velim suknnim hanvem pollelim.

⁷Tedna oxem mhaka mhonntalo to êk tallo hanvem aikolo: ‘Pedru, utth, mar ani kha!’

⁸Punn hanvem mhonn’lem: ‘Na, Saiba! Koxench na! opovitr ani mhellem kodinch mhojea tonddant bhitôr sorunk na!’

⁹Anink êk pavtt tea sorga velea tallean mhaka mhonn’lem: ‘Devan nitoll kelam tem tum opovitr mhonn lekhinaka.’

¹⁰Hem oxem tin pavtti ghòddlem ani uprant sogllem portun sorgar ubaron gelem.

¹¹Tednanch ovchit hanv ravtalom tea ghorachea umbrea-xim teg monis ube zale. Xezareia thaun mhaka mellunk tankam dhaddlele.

¹²Ani tanchê borabôr vochunk pattim-fuddem soronaka mhonn Povitr Atmean mhaka sanglem. Tedna sô bhav mhojê borabôr aile ani ami tea mon’xachea ghora geleanv.

¹³Aplea ghorant êk devdut ubo aslolo apnnak dixtti poddlo ani apnnak oxem mhonn’lem mhonn tannem amkam sanglem: ‘Jop’pak Pedru mhonnlelea Simanvak apounk dhadd;

¹⁴to uloitolo team utram vorvim tuka ani tujea akhea kuttumbak taronn melltelem.’

¹⁵Hanvem ulounk suru kelem tedna, survatek amcher denvlolo toch Povitr Atmo tancher denvlo.

¹⁶Tedna mhaka Somiacheam heam utrancho ugddas ailo: ‘Juanvan udkan batism dilo, punn tumkam Povitr Atmeacho batism melltolo.’

¹⁷Somia Jezu Kristacher ami bhavart tthevlo tedna Devan amkam dilam tench dennem Tannem tankam-i dilem zalear, Devak addkhôll ghalunk hanv konn?”

¹⁸Hem aikun te oge poddle ani Devak vakhannun tãnnim oxem mhonn’lem: “Mhonntôch, Jivitak pavoita toslem jivit-mon bodlop videxeank-ui Devan dilem.”

¹⁹Isteva pasot piddapidd diunk suru kelem tedna zollim-mollim ximpoddlo to bhavarti lôk Fenixiek, Xiprusak ani Antiokiek porian pavlo, punn, Judevam bhair, tim anink konnankuch Devachem utor porgottinaslim.

²⁰Tantle thodde Xiprusache ani Xirenache dadle Antiokiek gele ani thõi Grikank-ui Somia Jezuchem xubhvhortoman porgottunk tãnnim suru kelem.

²¹Somian tankam adar dilo ani zaitim zannam bhavart dhorun Somia-xim portolim.

²²Hi tanchi khobor Jeruzaleachê povitr-sobhechea kanar poddli ani tãnnim Barnabasak Antiokiek dhaddlo.

²³Thõi pavtôch, Devachem dennem polleun, to kuxal zalo ani kallzant thaun Somiak visvaxi ravunk tannem tankam hurba dili.

²⁴Kiteak to êk boro ani Povitr Atmean ani bhavartan bhòrlolo monis aslo. Ani Somiacho pattlav korteleancho ank zaito choddlo.

²⁵Uprant Barnabas Pauluk sodunk Tarsusak gelo ani,

²⁶to mell’lea uprant, tannem taka Antiokiek haddlo. Ek akhem voros thõichê povitr-sobhê modem te jiele ani puskôll lokak tãnnim xikovnn dili. Ani oxem Antiokient xisank poilêch pavtti “Kristanv” mhonn addnanv poddlem.

²⁷Tedna thodde provadi Jeruzaleak thaun Antiokiek aile.

²⁸Tanchê modlo eklo, Agabus mhonnlolo, utthlo ani akhea sonvsarar dukôll poddtolo mhonn Atmeachea preronnan sangunk laglo. Ani Klaudius somrazachea kallar toxem ghòddlem.

²⁹Zonn-ekleak tankta tea pormannem Judeiant ravteleam bhavam-bhoinnink modôt diunchi mhonn xisamnim tharav ghetlo.

³⁰Ani tãnnim oxem kelem ani Barnabasachea ani Sauluchea hatant ghalun tãnnim zannteank adar pattoun dilo.