Read Goan Konkani AI 12 Bible Online

AI 12 - Goan Konkani bible

AI 12

¹Teach kallar povitr-sobhe- cheam thoddeam vangddeank Herod raza piddapidd diunk laglo.

²Juanvachea bhava, Jakobak tannem torsadin jivexim marlo.

³Judevank hem man’lem mhonn polleun, tannem Pedruk-ui dhorunk lailo. Hem Fug-nasleleam Unddeanche Porbecheam disamnim ghòddlem.

⁴Pedruk dhôrlea uprant, tannem taka bondkhonnint ghalo ani chougam-chougam soinikanche char pongodd tacher paro korunk bosoile. Pask-Porbe uprant porjê mukhar to Pedruk ubo korunk sôdtalo.

⁵Pedru bondkhonnint aslo titlo-i vêll povitr-sobha tachê pasot thambonastanam Devak vinoti korit asli.

⁶Herod Pedruk porjê mukhar ubo korunk sôdtalo tea disachê adlê rati, Pedru dogam soinikam modem nhidlolo aslo; taka don sankllimnim bandlolo ani paredar bondkhonnichem dar rakhtale.

⁷Ovchituch Sorvesporacho êk dut ubo zalo ani tem bondkhonni-kudd uzvaddan bhòrlem. Pedrucheam bhuzancher hat marun devdutan taka utthoilo ani mhonn’lem: “Vegim utth!” Thõichê-thõich tacheam hatancheô sanklli bhuim poddleô.

⁸Tedna devdutan taka mhonn’lem: “Tuzo pott’tto band ani tujeô vhannô ghal.” Pedrun toxem kelea uprant devdutan taka mhonn’lem: “Tujem avoronn ghal ani mhojê pattlean ie.”

⁹Pedru tachê pattlean gelo, punn devdut kortalo tem khoreponnim ghòddta mhonn to nokllo aslo, kiteak apunn fokot êk dixttavo polleta mhonn to chint’talo.

¹⁰Pareachi poili ani dusri chouki utrun, Xarant pavoita tea lokhonddachea darvonttea-xim te pavle. To apxinch tankam ugto zalo. Ani bhair sorun te êk akho rosto chol’le ani thõichê-thõich devdut tachê thaun koddsorun gelo.

¹¹Tedna, soirannar ieun, Pedrun mhonn’lem: “Somian Aplea dutak dhaddlo ani Herodichea hatantlo ani Judevancho lôk ravtalo tantuntlo Tannem mhaka vattailo mhonn atam mhaka khorench kollon ailem.”

¹²Apunn khõi asa tem taka gomlea uprant, to nitt Marku-i mhonnlelea, Juanvachê avoi Mariechea ghora gelo; thõi zaito lôk ektthovl’lo ani magnnem kortalo.

¹³Pedrun darar marlem tedna, Roda nanvachem ek cheddum, konn darar marta tem polleunk dara-xim gelem.

¹⁴Tannem Pedrucho tallo ollkholo ani itlem khuxal tem zalem ki dar ugddinastanam bhitôr dhanvun vochun Pedru darar ubo asa mhonn tannem sanglem.

¹⁵Tãnnim taka mhonn’lem: “Tum pixem zalãi.” Punn to khoroch aila mhonn tem portun-portun sangunk laglem tedna, tãnnim mhonn’lem: “To tacho devdut zaunk zai.”

¹⁶Tea mhonnosôr Pedru darar marit ravlo. Xekim tãnnim dar ugôddlem ani taka polleun tim thottaklim.

¹⁷Ogim ravat mhonn tannem aplea hatan khunna keli ani koxê bhaxen Somian apnnak bonkhonnintlo bhair kaddlo tem sanglem, ani mhonn’lem: “Jakobak ani amcheam bhavam-bhoinnink hem kollit korat.” Magir to bhair sorun dusrê kodden gelo.

¹⁸Sokall zatôch soinikam modem boroch ghuspagondhôll zalo. Pedruk kitem ghòddlem tem tankam kãich somzona zalem.

¹⁹Taka sodun kaddunk Herodin hukum’ ghalo, punn to tankam mellunk na. Hea khatir paro korteleanchi tãnnim barik vaspus korunk ani tankam jivexim marunk laile. Magir to Judeia thaun Xezareiak gelo ani thõi ravlo.

²⁰Tir ani Sidon’chea lokacher Herod raza tiddlolo aslo dekhun, tantle kãi zann ek mot korun taka mellunk gele. Blastus hea raz-mhalantlea karbhareachi ixttagôt zoddun, tãnnim xanti korunk magli, kiteak tancho dês Herod razachea desantlo orôv vhortalo.

²¹Eka nemlolea disa Herodin aplim raiponnachim vostram ghalim ani eka xinvasonar bosun tannem porjek êk boli keli;

²²Lôk gorozlo: “Uloita to êk dêv, to monis nhoi.”

²³Punn teach vellar thõichê-thõich Sorvesporachea dutan taka xikxa dili, kiteak tannem Devak man diunk na; ani kiddeamnim khaun to melo.

²⁴Devachem utor ximpoddtalem ani vaddtalem.

²⁵Apli seva sompoitôch Barnabas ani Saulu Jeruzalea thaun portole ani Marku mhonnlelea Juanvak tãnnim apnnam borabôr haddlo.