Read Goan Konkani AI 13 Bible Online

AI 13 - Goan Konkani bible

AI 13

¹Antiokiechê povitr-sobhent provadi ani xastri asle te he: Barnabas, Kallo mhonnlolo Simanv, Xirenacho Luxius, Herod up-razachea vangdda raznivasant lhan-vhôdd zal’lo Manaen, ani Saulu.

²Êk dis, te upas kortale ani Somiak bhozunk ektthãi asle tedna, Povitr Atmean tankam mhonn’lem: “Barnabasak ani Sauluk kuxin kaddat: eka kherit kama khatir Hanvem tankam apoileat.”

³Tedna upas ani magnnem korun, tãnnim tancher hat dovorle ani tankam dhaddle.

⁴Hê bhaxen Povitr Atmean tankam pattoitôch, te dog-ui Xeleuxiek gele ani thõi thaun, tarvar bosun, Xiprusachi vatt tãnnim dhôrli.

⁵Salamisak pavtôch, Judevancheam devsthanamnim Devachem utor tãnnim porgôttlem; aplea vavrant adhar diunk tãnnim Juanv Markuk bhaga ghetlolo.

⁶Te ak’kho zunvo bhonvle ani Pafosak pavtôch, Bar Jezu nanvacho êk Judêv tankam mell’lo; to ghaddi ani khotto provadi aslo.

⁷To razpalachê sevek aslo. Razpal tedna Sergius Paulu aslo, gineanan huxar monis. Devachem utor aikunk sôdtalo dekhun, hannem Barnabasak ani Sauluk apnna-xim apounk dhaddle.

⁸Bar Jezu ghaddi mhonnun, taka Elimas mhonntalim (kiteak ghaddi Grik bhaxen Elimas). To tankam addaunk vavurtalo kiteak to razpalak Kristi bhavarta thaun pois dovrunk proitn kortalo.

⁹Punn Saulun — haka Paulu-i mhonn nanv aslem — Povitr Atmean bhoron, nitt tea ghaddiak tellun

¹⁰mhonn’lem: “Arê todd’ddokea, arê fottinga, devcharachea pora, Devachê sogllê taronnik ievzonnechea dusmana, Sorvesporache nitt roste vankdde korchem kam’ tum sôddchoch nãi?

¹¹Ani atam Sorvesporachea hatak tum sampoddloi, tum kurddo zatoloi ani thoddo vêll tuka dixtti poddchem na.” Teach vellar, tacher kallôk-gidd poddlo ani apnnak hatak dhorunk konn mellot kai mhonn to sodunk laglo.

¹²Hem ghòddlem tem polleun, ani Somia vixim ji xikovnn taka mell’li tichê pasot soglloch ojap zaun, razpalan bhavart dhôrlo.

¹³Paulu ani tache sangati Pafosa thaun tarvar bosun Panfiliechea Pergak gele; punn tankam thõich dovrun, Juanv Mark Jeruzaleak portolo.

¹⁴Her, Pergantlean bhonvun, choltam-choltam Pixidiechê Antiokient pavle. Ani Sabbatha disa, devsthanant bhitôr sorun, te thõi bosle.

¹⁵Somurtintlim ani Provadeancheam pustokantlim vachpam zatôch, devsthanacheam vhoddilamnim tankam oso nirôp dhaddlo: “Bhavamnô, porjek dhir divpachim don utram sangunk tumkam khuxi zalear, upkar korun sangat.”

¹⁶Paulu ubo ravlo ani, ogim ravunk hatan khunna korun, ulounk laglo: “Israelacheam mon’xamnô, ani Devachi bhokti kortoleamnô, aikat!

¹⁷Amchê Israel porjechea Devan amcheam purvozank vinchun kaddle ani, te Ejiptant pordexi koxe asle tedna, tanchê thaun Tannem êk porza utpon keli; ani vhoddlê podven tankam thõisorlim bhair kaddlim ani

¹⁸challis vorsam oronneant tancho Tannem samball kelo.

¹⁹Saddê-charxim vorsam bhòrtat mhonnosôr, Khanaanant sat raxttrancho bhosm korun hanche ganv, daiz koxem Tannem tanchê adhin kele. Hea uprant, Samuel provadi porian, Tannem tankam fuddari dile.

²⁰

²¹Magir tãnnim êk raza maglo ani Devan Benjaminachea kullacho êk dadlo, Kixacho put Saulu, tankam dilo; hannem challis vorsam razvôtt choloili.

²²Taka nikllailea uprant, Devan Davidak tancho raza zaunk voir kaddlo ani tachê vixim govai diun mhonn’lem: ‘Mhojea Kallza sarko Mhaka David, Jes’secho put, mell’la; soglleô Mhojeô khuxeô to kortolo.’

²³Aplê bhasavnnê pormannem, Davidachê sonstintlo Devan Israelak Jezu Soddvonnar upzoilo.

²⁴Jezu ieunchê adim, akhê Israelachê porjek jivit-bodôlpacho batism Juanv porgott’talo.

²⁵Aplem kam’ sompounchea vellar, Juanv mhonntalo: ‘Tumi chint’tat to hanv nhoi; punn, polleiat, mhojê pattlean Konn-Eklo ieta ani Tacheam vhannancheô vadiô soddunk mhaka favonam.’

²⁶Mhojeam bhavam-bhoinnimnô, Abrahamachê kulliecheam putam-dhuvamnô, ani Devachi bhokti kortoleam heramnô, ho soddvonnecho nirôp Devan tumkam dhaddla.

²⁷Jeruzaleachea lokan ani tancheam fuddariamnim Jezuk ollkhonastanam, nhoi mhonn Sabbathachea Sabbatha vachtat tim provadeanchim utram somzonastanam, Tacher mornnachem formonn marlem ani tim ghoddon ie-xim kelim.

²⁸Taka jivexim marunk tankam koslench karonn mellunk na, tori tãnnim Tacher mornnachem formonn Pilata kodde marun ghetlem.

²⁹Tachê vixim boroil’lem aslem titlem-i xarti pavoilea uprant, tãnnim Taka lankdda velo denvoilo ani êkê somadhint dovorlo.

³⁰Punn Devan Taka mel’leantlo utthoilo.

³¹Ani Galileia thaun Tachê borabôr Jeruzaleak gel’lim tankam zaite dis To dixtti poddlo; ani porjê mukhar him ozun Tachim sakxidaram.

³²Devan amcheam purvozank bhasavnni kel’li, tich ti bori khobor tumkam ami porgôtt kortanv.

³³ti Tannem, Jezuk punorjivont korun, amam, tancheam bhurgeam thãi pallun dili. Khoreponnim oxem Dusrea Stotrant boroil’lem asa: ‘Tum Mhozo put: Hanvem Tuka aichea disa zolm dila.’

³⁴Taka Devan mel’leantlo punor-jivont korun Tacho kednanch vinas zauncho na mhonn khud Devan heam utramnim adinch sangun dovorlelem: ‘Davidak bhasail’lim khorim ani povitr dennim Hanv tumkam ditolom.’

³⁵Heach khatir anink êkê svater oxem mhonnlelem asa: ‘Tujea visvaxi bhoktacho vinas zaunk diuncho nãi.’

³⁶Aplea jivitant Devachi ievzônn pall’lea uprant, David melo; tacheam purvozank to ektthovlo ani tachê kuddicho vinas zalo.

³⁷Punn Zaka Devan punorjivont kela, Tacho vinas zaunk na.

³⁸Tôr, mhojeam bhavam-bhoinnimnô, Jezu vorvim tumkam patkanchem bhogsonnem porgott zata mhonn tumi zanno zaiat; Moizesachê Somurti vorvim team soglleam patkanchem bhogsonnem tumchean gheunk zaunk na,

³⁹punn atam Tacher bhavart dovortat tim sogllim Devak manovlelim zatat.

⁴⁰Jem provadeamnim sanglam tem tumchê-xim ghoddonam zaunk chotrai dhôrat:

⁴¹‘Moskoriô kortoleamnô, polleiat, ojapat, ani nanch zaiat! Tumcheam disamnim, Hanv kitem korunk fuddem sorlam, tachi ollokh legun tumkam dilear, tem tumi sotman’cheak nant!’

⁴²Paulu ani Barnabas devsthanantle bhair sorun vetana, fuddlea Sabbathak heam vostum vixim novean uloiat mhonn lokan tanchê lagim maglem.

⁴³Sobha utthlea uprant, Judêv lokantlim ani Devak bhôzpi novxisantlim zaitim zannam Paulu ani Barnabasa pattlean gelim, ani hãnnim tanchê kodde uloun Devachea denneak visvaxi ravunk tankam nettan ulo kelo.

⁴⁴Dusrea Sabbatha ogllem-unnem akhem xar Devachem utor aikunk ektthãi zalem.

⁴⁵Itli urpônz polleun Judêv lôk nattkaien bhòrlo ani ninda korun Paulu sangtalo tacher addvem-tiddvem ulounk laglo.

⁴⁶Tedna Paulun ani Barnabasan kalljidarponnan mhonn’lem: “Devachem utor ami poilem tumkam porgott korunk zai aslem, punn tumi tem manun ghenant dekhun ani Sasnnik Jivit tumkam favo nhoi mhonn tumich nivaddo ghetat dekhun, atam ami videxeanchê vatten chol’leanv.

⁴⁷Kiteak oxem amkam Sorvesporan formailam: ‘Prithumecheam ximam porian Mhojem taronn pavchê khatir, raxttrancho uzvadd Hanvem tuka nemla.’ ”

⁴⁸Hem aikun videxi khuxal zalim ani Somiachea sondexak lagun tãnnim Taka vakhannlo, ani sasnnik jivit gheunk adim-fuddem nemlelim aslim titleamnim bhavart dhôrlo.

⁴⁹Hê porim Somiachem utor soglleam ganvamnim ximpoddtalem.

⁵⁰Punn Judevamnim unch kulliecheam kãi bhoktivont bail-novxisank ani xarantleam vhoddam-vhoddam mon’xank uchambollailim ani Pauluk ani Barnabasak piddapidd diunk fuloilim, ani tankam apleam prantantle bhair ghale.

⁵¹Punn tancher add aplea pãiancho dhul’lo fafddun te Ikoniumak gele.

⁵²Punn xis khuxalkaien ani Povitr Atmean bhòrle.