Read Goan Konkani AI 14 Bible Online

AI 14 - Goan Konkani bible

AI 14

¹Ikoniumant pavtôch, Paulu ani Barnabas borabôr Judevan-cheam devsthanamnim gele ani itlea nettan uloile ki Judevanchea ani Grikanchea puskôll lokan bhavart dhôrlo.

²Punn bhavart dhorunk na team Judevamnim videxeank uchambollailim ani tanchem mon amcheam bhavam-bhoinnincher add vikailem.

³Tori Paulu ani Barnabas borech-xe dis thõi ravle, ani, Somia koddcho dhir gheun, bhiranti vinnem tãnnim apli sakxi dili. Tãnnim dil’lo sondêx khoro mhonn dakhounk, Somian tanchê vorvim ojapam ani khunna kelim.

⁴Nograntlea loka modem futt poddli: konn-konn Judevanchê vatten ani konn-konn Apostlanchê vatten ravlim.

⁵Tedna odhikareancho tenko gheun, apostlank[3] piddapidd diunk ani fatraun marunk Judevanchi ani videxeanchi ucham-bollai zali.

⁶Apostlank hem gomtôch, te Likaoniek pollun gele, ani thõicheam Listra ani Derbe nogramnim ani bhonvtonncheam ganvamnim

⁷tãnnim xubhvhortoman porgôttlem.

⁸Listrant êk opangull monis bosun aslo; to zolman thontto zaun kednanch cholunk naslo.

⁹Paulu provochon kortalo tem tannem aikolem. Paulun apli nodor tacher laili ani, boro zaunk taka bhavart asa to polleun,

¹⁰tannem vhoddlea tallean mhonn’lem: “Tujeam pãiancher nitt ubo rav!” Ani uddi marun to cholunk laglo.

¹¹Paulun kelem tem lokanchê urponjin pollena fuddem, Likaoniechê bhaxen tãnnim vhoddlean mhonn’lem: “Mon’xanchea rupan dèv amchê modem denvleat.”

¹²Barnabasak tãnnim Zeus mhonn nanv ghalem ani, Paulu mukhêl ulovpi dekhun, taka Hermes mhonn nanv dilem.

¹³Xara fuddem aslelea Zeusachea mondirachea iadnikan har ghalun nettoil’le padde darvonttea-xim haddle ani loka sangatim to iôdn bhettounk sôdtalo.

¹⁴Hem aikun, Barnabasan ani Paulun aplim avoronnam pinzlim ani, loka-xim dhanvun vochun, tãnnim arddun mhonn’lem:

¹⁵“Ixttamnô, tumi kitem mhonn korunk fuddem sorleat? Ami-i fokot monis, tumchêch mon’xagotiche. Punn tumkam ami bori khobor gheun aileanv; heam polkeam vostunk patt korun, jivea Deva-xim tumkam vollun haddunk ami aileanv: tôr sôrg ani sonvsar ani somdir ani tanchê bhitôr asa titlem-i Tannench rochlam.

¹⁶Adleam pinddkamnim soglleam videxeank ap-apli vatt dhorunk Tannem nirmilem.

¹⁷Tori astana, bholeponnan tumkam zaite upkar korun, Apnnakuch govai dinastana To ravunk na: sorgar thaun To paus dhaddta, somoiam pormannem follam utpon korta, tumkam jevunk-khaunk dita ani tumchim kallzam dhadoxi korta.”

¹⁸Itlem sangun-ui, apnnank iôdn korinam zaunk, lokak addaunk tankam bhov avghodd zalem.

¹⁹Tedna Antiokiê and Ikoniuma thaun kãi Judev aile; lokak khubdaun, tãnnim Pauluk fatrailo ani to melo mhonn somzun taka xara bhair oddun vhelo.

²⁰Punn xis ieun tachê bhonvtim extthovle tedna, to utthlo ani portun xarant gelo. Ani dusrea disa to Barnabasa borabôr Derbek gelo.

²¹Tea xarant xubhvhortoman porgottun zaite xis kelea uprant, Paulu ani Barnabas Listrek, Ikoniumak ani Antiokiek portole.

²²Tãnnim xisank ghottai dili ani bhavartant thir ravat mhonn sanglem. “Devachea Rajeant bhitôr sorunk zaite koxtt-dogd ami sõsunk zai”, oxem te mhonntale.

²³Dôr-êkê povitr-sobhek tãnnim zannte nemle ani, magnnim ani upas korun, jea Somiak tãnnim bhavartan mandun ghetlolo, tea Somiachê adhin tankam kele.

²⁴Pixidia prantantlean te Pamfiliek pavle.

²⁵Pergant Devachem utor porgôtt’tôch, te Ataliek denvun gele.

²⁶Ani thõi thaun tarvar bosun te Antokiek pavle. Hea xara thaun te bhair sorlele tedna, Paulun ani Barnabasan atam sompoil’lea vavra pasot thõichea bhavarteanchea zomean tankam Devachi mozôt magun, Tacheach hatant ghal’le.

²⁷Hanga pavtôch, thõichi povitr-sobha tãnnim zomoili ani apnnam vorvim Devan kelem titleachi-i khobor tankam dili, ani koxê bhaxen videxeank Tannem bhavartachem dar ugôddlem, tem bi tankam sanglem.

²⁸Xisam borabôr te thõi zaito kall ravle.