Read Goan Konkani AI 15 Bible Online

AI 15 - Goan Konkani bible

AI 15

¹Tedna Judeiak thaun kãi monis ieun amcheam bhavam-bhoinnink oxem xikounk lagle: “Moizesan sthaplelê chali pormannem tumi sunôt kelea xivai, tumi taronn gheunk xokonant.”

²Hê vixim he monis Paulucher ani Barnabasacher uprasle ani tanchê modem motto vad-vivad zalo. Xekim Paulun ani Barnabasan ani tanchê modleam thoddeam zannamnim Jeruzaleak vochun hea tonttea vixim apostlam ani zannteam kodde bhasabhas korchi mhonn tharav zalo.

³Mhonntôch povitr-sobhen tankam pattoile, ani Fenixientlean ani Samarientlean vetana, koxê bhaxen videxeamnim bhavart dhôrlo tem te sangit gele; ani hi khobor aikun, soglleam bhavam-bhoinnink vhôdd khuxalkai bhògli.

⁴Te Jeruzaleak pavle tedna, tankam povitr-sobhen, apostlam-nim ani zannteamnim ievkar dilo; ani tãnnim apnnam vorvim Devan kelem titleachi-i khobor sangli.

⁵Punn Farizevanchea pongddantleam kãi bhavarteamnim oxi addkhôll haddli: “Tanchi-i sunôt korunk zai ani tankam Moizesachi Somurt samballunk lavunk zai.”

⁶Hea tonttea vixim bhasabhas korunk apostl ani zannte ektthãi zale.

⁷Motto vad-vivad zalea uprant, ubo ravun Pedrun tankam mhonn’lem: “Bhavam-bhoinnimnô, videxeamnim mhojea tonddantlem xubhvhortoman aikunk ani bhavart dhorunk poileam disam thaun tumche modem Devan mhaka vinchun kaddlo mhonn tumi zannont.

⁸Ani soglleanchim kallzam ollkhota tea Devan amkam dil’lo tosoch tankam-i Povitr Atmo diun, tim-i Apnnak man’tat mhonn dakhoun dilem.

⁹Bhavarta vorvim tanchim kallzam nitoll korun, amchê ani tanchê modem koslich ontôr Tannem korunk na.

¹⁰Mhonntôch amchean, nhoi mhonn amcheam purvozamnim, vhorunk zaum naslam toslem zum xisanchê manir ghalun, tumi kiteak mhonn Devachi porikxa korunk sôdtat?

¹¹Punn Somia Jezuchea dennean amkam toxench tankam taronn mellta mhonn ami sotman’tanv.”

¹²Zomlolo sogllo lôk ogo ravlo; ani apnnam vorvim Devan videxeam modem kel’leam soglleam khunnanchi ani vizmitanchi ji khobor Barnabas ani Paulu sangtale, ti akhê sobhen aikoli.

¹³Tanchem ulovop zatôch, Jakoban oxem aplem mot sanglem: “Bhavam-bhoinnimnô, mhojem aikat:

¹⁴Aplea nanvak bhettoil’li videxeam modli êk porza survatek thaun vinchun kaddunk Devachi khuxi mhonn Simeianvan tumkam atanch sanglam.

¹⁵Ani hem provadeancheam utram pormannem asa, kiteak oxem boroil’lem asa:

¹⁶‘Hea uprant, Hanv portun ietolom, ani Davidacho moddon poddlolo tombu Hanv novean tanntolom. To Hanv ghorttannantlo ubo kortolom ani novean bandtolom.

¹⁷Tedna sogllim mon’xam Sorvesporak sôdtelim, Mhojea nanvak bhettoil’lim asat tim sorv raxttram.

¹⁸Zannem zaitea kalla thaun hem kollit kelam, to Sorvespor oxem sangta.’

¹⁹Mhonntôch mhojem mot oxem: Deva-xim portun ietat team videxeanchem jivit ami odik avghodd korchem nhoi.

²⁰Punn tankam oxem ami boroun dhaddchem: murtim-puttleank bhettoun bhoxttail’leô vostu tãnnim khauncheô nhoi, Somurticheam kaideam virudh logn korchem nhoi, ani gomtti pillun marlelê mon’zatichem mas khaunchem nhoi ani rogot xevchem nhoi.

²¹Karonn adlea kallar thaun soglleam nogramnim Moizesachi Somurt porgôtt korpi asat ani dôr Sabbatha devsthanamnim ti vachtat.”

²²Tedna apnnam modleam thoddeam mon’xank vinchun kaddunk ani Paulu ani Barnabasa sangatim Antiokiek dhaddunk apostlamnim ani zannteamnim akhê povitr-sobhê borabôr tharav ghetlo. Judas, add-nanvan Barsab’bas ani Silas, hankam tãnnim vinchun kaddle; he bhavarteam modem mhotvache monis asle.

²³Tanchê kodde diun oxem ek potr tãnnim dhaddlem: “Apostl ani zannte, tumche bhav, Antiokient, Sirient ani Xilixient videxeam modlim amchim bhavbhoinn zaleant tankam noman kortat.

²⁴Amchê modleam thoddeam bhavamnim aplê xikovnnen tumkam ghuspailim ani tumchim monam uchamboll kelim mhonn ami aikolam. Oxem korunk tankam amchi rojea nasli.

²⁵Hea pasot ami êk sobha apoili, ani amchê-modleam thoddeank vinchun kaddun amcheam mogacheam Barnabasa ani Paulu borabôr tumchê-xim dhaddunk ami soglleamnim tharailem.

²⁶Jezu Kristachea, amchea Somiachea, nanva khatir Barnabas ani Paulu aplo jiv sonkottant ghalunk pattim sorle nant.

²⁷Mhonntôch tanchê borabôr Judasak ani Silasak ami tumchê-xim dhaddtanv: hea potrar ami boroilam tench te tumkam tonddan sangtele.

²⁸Heam gorjecheam kaideam bhair anink koslench vozon tumcher ghalina zaunk Povitr Atmeak ani amkam borem dislem:

²⁹murtim-puttleank bhettoil’lem jevonn tumi jevchem nhoi, rogot xevchem nhoi, ani gomtti pillun marlelê mon’zatichem mas khaunchem nhoi; Somurticheam kaideancher add logn korchem nhoi. Heam vostunk patt korun tumi borea rostear astelet. Noman.”

³⁰Tedna tankam dhaddle ani te Antiokiek gele; hanga sobhek apoun tãnnim tem potr dilem.

³¹Sobhen tem vachlem ani tachê vorvim apnnak ghottai mell’li mhonn khuxal zali.

³²Judasan ani Silasan, apunnuch provadi zaun, loka lagim zaitem uloun bhavam-bhoinnink ghottai ani thirai dili.

³³Thõi thodde dis kaddlea uprant, bhavam-bhoinnincho nirôp gheun, apnnank dhaddlele tanchê-xim te xantin portun gele.[4]

³⁵Punn Paulu ani Barnabas Antiokiek ravle ani thõi zaiteam dusream borabôr tãnnim xikovnn dili ani Somiachem utor porgôttlem.

³⁶Thoddeam disamnim Paulun Barnabasak mhonn’lem: “Atam ami portun vochun Somiachem utor porgôttlelem team soglleam nogramnim amcheam bhavam-bhoinnink bhett korum-ia ani tim koxim-kat choltat tem polleum-ia.”

³⁷Tanche borabôr Marku mhonnlelea Juanvak-ui vhorunk Barnabasan khuxi dakhoili.

³⁸Punn tanchê borabôr vavr soddun Panfilient tanchê thaun koddsorlolo teach mon’xak novean bhagak gheuncho nhoi mhonn Pauluchem mot aslem.

³⁹Tôr hê vixim tanchê bhitôr huzôt zali ani te ekameka thaun koddsorle, ani Markuk gheun Barnabas tarvar bosun Xiprusak gelo.

⁴⁰Paulun Silasak aplea bhagak ghetlo ani, bhavam-bhoinnimnim tachê khatir Somiachi mozôt maglea uprant, to bhair sorlo.

⁴¹Povitr-sobhank ghottai diun to Xirientlean ani Xilixientlan bhonvot gelo.