Read Goan Konkani AI 16 Bible Online

AI 16 - Goan Konkani bible

AI 16

¹Magir Paulu Derbek ani uprant Listrak gelo. Thõi Timot nanvacho êk xis aslo; tachi avoi bhavart dhôrleli Judêv bail, punn tacho bapui Grik.

²Listrent ani Ikoniumant aslim tim amchim bhavbhoinn tachem borem uloitalim.

³Paulun taka apnna borabôr vhorunk ievjilem. Hea pasot thõi jieteleam Judevam pasot tannem tachi sunôt keli, kiteak tacho bapui Grik mhonn sogllim zanno aslim.

⁴Nogram-nogramnim bhonvtanam, Jeruzaleak apostlamnim ani zannteamnim tharav ghetlele tanchi khobor tannem tankam dili ani te pallunk zai mhonn sanglem.

⁵Hê bhaxen teô povitr-sobha odik-odik bhavartan mozbut zaleô ani disan’dis tancho ank-ui vaddon gelo.

⁶Frijient ani Galaxiechea prantant bhonvle punn Devachem utor Aziechea prantant porgott korunk Povitr Atmean tankam addvarle.

⁷Mixiechê ximer te pavle tedna, ti utrun te Bitinient vochunk kortale, punn Jezuchea Atmean tankam vochunk diunk na.

⁸Mhonntôch Mixientlean bhonvon te Troasak gele.

⁹Ani êkê rati Paulun êk dixttavo dekhlo: Maxedoniecho êk monis ubo aslo ani tachê lagim oxem magtalo: “Maxedoniek ieun amkam adar di.”

¹⁰Ho dixttavo dekhlea uprant, rokddench Maxedoniek vochunk ami bondabôst keli, karonn tankam xubhvhortoman diunk Dev amkam apoita mhonn amkam khatri zali.

¹¹Troasa thaun tarvar bosun ami nitt Samotraxiek geleanv ani dusrea disa Neapolik.

¹²Ani hanga thaun ami Filipik pavleanv; tea Maxedoniechea jilheachem tem mukhel xar aslem ani Romkarancho êk zomo thõi ravtalo. Hea xarant thodde dis ravlea uprant,

¹³Sabbatha disa ami tea xarachea darvonttea bhair nodi-xim geleanv; kiteak ti magnnem korchi svat mhonn ami aikol’lem. Ami thõi bosleanv ani zomatik ail’leam bailam kodde ulounk lagleanv.

¹⁴Tanchê modem Lidia nanvachi Devak bhôzpi êk bail amkam aikotali; ti Tiatira nograntli asli ani thõi zambllea-rongacheam lugttancho dhondo kortali. Paulu sangtalo tem aikunk Somian tichem kalliz ugôddlem.

¹⁵Tika ani tichea kuttumbak batism dilea uprant, tinnem amchê lagim oxem maglem: “Hanv khoreponnim Somiacher bhavart tthevtam mhonn tumi manun ghetlam zalear, amger ravunk ieiat.” Ani ami ieunkuch zai mhonn tinnem nêtt kelo.

¹⁶Êk dis ami magnnem korunk vetana, amkam ek gulam’-cheddum mell’lem; hea cheddvak parkhuncho gunn aslo. Ani noxib parkhun apleam dhoniank tannem khup duddu zôddlolo.

¹⁷Pauluchê ani amchê pattlean ieun tem bob marun mhonnunk laglem: “He monis Bhov-Vortea Devache chakor. Soddvonnechi vatt te tumkam porgôtt kortat.”

¹⁸Zaite dis tem oxem korit aslem. Xekim Paulu bejar zalo ani vollon tea atmeak mhonn’lem: “Jezu Kristachea nanvan hanv tuka hukum’ ghaltam, tachê velo bhair sor!” Ani teach vellar to bhair sorlo.

¹⁹Tea cheddva vorvim anink duddu zomouncho aplo bhorvanso somplo tem polleun, tacheam dhoniamnim Pauluk ani Silasak dhôrle ani chouker odhikariam-xim oddun vhele ani

²⁰tankam mon’subidaram mukhar ube korun mhonn’lem: “He monis Judev ani xarant te uchambollai kortat.

²¹Ani ami Romkar mhonntôch, amchean mandun gheunk zainant, nhoi mhonn pallunk zainant, tosleô riti-sonvoiô xikoitat.”

²²Urpônz Pauluchea ani Silasachea angar aili; mon’su-bidaramnim tanchim vostram pinzun kaddlim ani tankam jerbond marunk laile.

²³Khup mar dilea uprant, tankam bhondkhonnint ghale ani tanchi borê bhaxen rakhônn korunk bondkhon-nichea rakhonndarak formailem.

²⁴Hukuma pormannem tannem tankam bondkhonnichea bhitorlea kuddant dovorle ani tanche pãi lankdda-khoddeamnim ghalun ghott kele.

²⁵Sumar modianir Paulu ani Silas magnnem kortale ani gaionam korun Devak vakhanntale tem dusream koideamnim aikolem.

²⁶Ovchit êk vhôdd dhornnkamp zali ani bondkhônn buniadi soit hal’li. Rokddinch sogllim daram ugtim zalim ani soglleancheô sanklli poddleô.

²⁷Bondkhonnicho rakhonndar zago zalo ani bondkhon-nichim daram ugtim zal’lim polleun ani koidi pollun gele mhonn somzun, torvar bhair kaddun to aplo jiv kaddunk sôdtalo.

²⁸Punn Paulun vhoddlea tallean mhonn’lem: “Tuka kãich vaitt korinaka, ami soglle hangach asanv.”

²⁹Rakhonndaran dive haddunk laile; magir to taktin bhitôr gelo ani soglloch koddkoddun Paulucheam ani Silasacheam pãiam poddlo.

³⁰Ani tankam bhair haddun, tannem mhonn’lem: “Saibamnô, mhaka taronn mellunk hanvem kitem korunk zai?”

³¹Tãnnim taka sanglem: “Somia Jezucher bhavart dovor ani tuka ani tujea kuttumbak taronn melltelem.”

³²Tedna taka ani tachea ghorant asleleam soglleank Somiachem utor tãnnim porgôttlem.

³³Ratchea teach vellar tankam vhorun tannem tanchim chovnnam dhulim; ani thõichê-thõich tannem ani sogllea tachea kuttumban batism ghetlo.

³⁴Uprant tannem tankam aplea ghora vhele ani jevonn vaddlem ani, Devacher bhavart dovrunk apnnak favo zalem dekhun, sogllea aplea kuttumba borabôr sontoslo.

³⁵Dusrea disa mon’subidaramnim ho hukum’ diun naikank dhaddle: “Team mon’xank sôddat.”

³⁶Rakhonndaran Pauluk sanglem: “Tumkam sôddat mhonn sangun mon’subidaramnim hukum’ dhaddla, mhonntôch atam bhair sorun tumi xantin vochat.”

³⁷Punn Paulun tankam mhonn’lem: “Ami Romi nagrik zaun-ui, tãnnim amkam sobhêmazar mar dilo, nit korinastana amkam bondkhonnint ghale, ani atam guptim amkam soddunk sôdtat? Oxem zaum nozo! Apunnuch ieun tãnnim amkam bhair kaddche.”

³⁸Naikamnim hem mon’subidarank kolloilem; ani Paulu ani Silas Romi nagrik mhonn tankam gomtôch, te bhiele.

³⁹Ani, apunn khaxa ieun, tãnnim tankam bondkhonnintle bhair kaddle ani tem xar soddun vochat mhonn maglem.

⁴⁰Bondkhonnintle bhair sorun, Paulu ani Silas Lidiechea ghora gele. Thõi bhavam-bhoinnink te mell’le ani tankam dhir diun tãnnim apli vatt dhôrli.