Read Goan Konkani AI 17 Bible Online

AI 17 - Goan Konkani bible

AI 17

¹Anfipolisantlean ani Apolon- ientlean vatt dhorun, te Tesalonikek pavle; hanga Judevanchem ek devsthan aslem.

²Aplê sodanchê sonvoiê pormannem, Paulu tanchê zomatik gelo. Ani tin Sabbatha porian tannem tanchê lagim Povitr Pustok dhorun bhasabhas keli;

³ani Kristan sõsunk zai aslem ani To mel’leantlo punorjivont zaunk zai aslo mhonn tankam somzonni diun tannem dakhoilem. To oxem sangtalo: “Hanv tumkam porgôtt kortam to Jezu, hoch To Krist!”

⁴Tantleam thoddeam zannamnim hem mandun ghetlem, ani Pauluk ani Silasak tim ektthovlim; hanchê bhair, Devak bhôztelea Grik lokachea eka vhoddlea chombean ani unch kulliecheam zaiteam bailamnim toxench kelem.

⁵Punn Judev nirddukaien bhòrle, rostea veleam kãi noxtteam mon’xank tãnnim ektthãi kele ani êk chumbo toiar korun akhea nogrant uchambollai ximpddaili. Pauluk ani Silasak sodunk ani uprant tankam loka fuddem ube korunk mhonn te Jasonachea ghora gele.

⁶Punn te tankam thõi mellunk nant dekhun, Jasonak ani thoddeam amcheam bhavank nogracheam mon’subidaram-xim haddle ani oxi bobatt marli: “He monis akho sonvsar uchambollaitat ani atam hangasôr pavleat.

⁷Tankam Jasonan apnnager biradd dilam, ani Jezu mhonnlolo anink eklo raza asa mhonnun, Somrazache soglle kaide te môddtat.”

⁸Him utram aikun lôk ani nograche mon’subidar challvole,

⁹punn Jasonachi ani heranchi zamin’ki ghetlea uprant tãnnim tankam sôddle.

¹⁰Kallôk zatôch, bhavam-bhoin-nimnim Pauluk ani Silasak rokddech Bereiak dhaddle. Thõi pavtôch te Judevanchea devsthanant gele.

¹¹Hea ganvcho Judêv lôk Tesalonikecheam Judevam poros odik ugtea monacho aslo; tãnnim sondêx vhoddê utsuktaien aikolo, ani to khoro zalear polleunk tim dôr-disa Povitr Pustok barkaien topastalim.

¹²Tanchê modleam zaiteam zannamnim bhavart dhôrlo ani Grik lokantleam unch kulliecheam bailamnim ani puskoll dadleamnim toxench kelem.

¹³Bereiant-ui Paulu Devachem utor porgôtt’ta mhonn Tesalonikecheam Judevank gomtôch, lokak challvounk ani uchamboll korunk te thõi gele.

¹⁴Tedna bhavam-bhoinnimnim rokddoch Pauluk doriachê kinarer dhaddun dilo, punn Silas ani Timot thõi pattim ravle.

¹⁵Pauluk vatter rakhunk gel’le tãnnim taka Aten porian pavoilo, ani Silasan ani Timotan zata titlê vegim apnna-xim ieunchem mhonn Paulucho nirôp gheun te porot aile.

¹⁶Paulu apunn Atenant tanchi vatt polleun ravlo, ani hem xar puttleam-murtimnim bhòrlelem polleun, to soglloch kanttall’lo.

¹⁷Judevam lagim ani Devak bhôzteleam kodde to devsthanant toxench ttintteamnim ieto-veto loka kodde bhasabhas kortalo;

¹⁸Thodde Epikuri ani Istoiki totvgineani tachê lagim huzôt kortale. Kãi zann oxem mhonntale: “Ho boddboddio kitem sangunk sôdta?” Dusre konn mhonntale: “To porkeam devam vixim porgott korta dista.” Karonn Paulu Jezucho ani punorjivontponnacho tankam prochar kortalo.

¹⁹Tãnnim Pauluk dhorun Areiopagachê Mha-Sobhê fuddem vhelo ani tachê lagim vicharlem: “Tum novê xikovnnecho prochar kortai: ti kosli ti amkam sangxi?

²⁰Tum sangtai tantleô thoddeô vostu amkam atveôch lagtat, mhonntôch ami tancho ôrth kitem to zanno zaunk sôdtanv.”

²¹Sogllim Aten’karam ani xarant vostek ravpi bhailo lôk noveam-noveam kolponanchi khobor sangun vô aikun aplo vêll sartalo.

²²Paulu Areiopagachê Mha-Sobhê fuddem ubo ravlo ani oso uloilo: “Aten’karamnô, sogllêch vatten tumi ekdom’ dhormik mon’xam mhonn hanv polletam.

²³Tôr tumchea xarant bhonvtana ani tumcheô dharmik iadgiri ekan-êk polletana, ‘Onollkhi devak’ ho boroil’lo namlêkh asleli êk vedi-i hanvem dekhli. Borem tôr: tumi ollkhonastanam bhôztat toch Dev hanv tumkam porgôtt kortam.

²⁴Sonvsar ani tachê bhitôr asa titlem-i rochlam to Dev, sorgacho ani prithumecho Dhoni zaun, mon’xancheam hatamnim bandlelea mondirant ravona,

²⁵nhoi mhonn kiteachich Apnnak goroz asa mhonn mon’xanchi sevachakri To ghena; ufrattim, soglleank jivit ani svas ani soglleô vostu dita to Toch.

²⁶Akhi prithum’ bhorunk ekach mon’xa thaun sogllem mon’xakull Tannem utpon kelem. Hea bhair, ek-ek raxttr kitlo kall togchem tem Tannem tharailam ani tea-tea raxttrachea desak ximô ghaleat.

²⁷Heam vostum vorvim sanspun-sanspun zal’lê porim mon’xamnim Apnnak sodun kaddunk Devan oxem kelam. Tori To amchê thaun pois na,

²⁸kiteak ‘Tachê sovem ami jietanv, bhonvtanv ani asanv’. Oxench tumchê-modleam kãi koveamnim sangun dovorlam: ‘Ami sogllim khoreponnim Tachim bhurgim.’

²⁹Ami Devachim bhurgim mhonntôch, Dev mon’xanchê kolen ani hikmotin kel’lê bhangarachê, rupeachê ani fatrachê murti sarko mhonn ami somzunk favona.

³⁰Oslea nennar-ponnachea kallacher Devan lokx ghalunk na, punn atam sogllê kodden asleleam soglleam mon’xamnim jivit -mon bodôlchem mhonn To porgott korta.

³¹Kiteak sonvsarachi nitivont-ponnan nit korunk Tannem êk dis tharaila ani eka Mon’xak Nitidar nemla; ani hea Mon’xak mel’leantlo punorjivont korun, tachi khatri Tannem amkam soglleank dilea.”

³²Mel’leanchea punorjivontponnachi khobor aikona fuddem, thoddeamnim tacheô moskoreô keleô, ani dusreamnim mhonn’lem: “Hê vixim ami dusrê pavtti tujem aikunk sôdtanv.”

³³Oso Paulu tanchê modlo koddsorlo.

³⁴Tori kãi zannamnim taka ektthovon bhavart dhôrlo. Hanchê modem aslo Dioniz nanvacho Areiopagachê Mha-Sobhecho êk vangddi, Damaris nanvachi êk bail ani tanchê borabôr anink-ui dusrim.