Read Goan Konkani AI 18 Bible Online

AI 18 - Goan Konkani bible

AI 18

¹Tea uprant, Atenantlo bhair sorun Paulu Korintak gelo.

²Thõi zolman Pontusacho, Akuila nanvacho, êk Judêv taka mell’lo; to aplê bailê Prixil’la borabôr niktoch Italiê thaun ail’lo, kiteak soglleam Judevamnim Roma xarantle bhair sorchem mhonn Klaudiusan hukum’ ghal’lo. Paulu tankam bhett diunk gelo.

³Ani aplea sarko tim dhondo kortalim dekhun, tanchea sangata to ravlo ani tanchê borabôr vavr kortalo, kiteak tim-i tachê bhaxen tombu-korpi.

⁴Dôr Sabhata devsthanant to vad-vivad choloitalo ani Judevank toxem Grikank bhavartak jikun gheunk sôdtalo.

⁵Silas ani Timot Maxedoniê thaun pavle tedna, sogllo vêll Devachem utor to porgottit aslo ani Jezu Krist mhonn Judevank govai ditalo.

⁶Punn te tacher kolpole ani taka nindechim utram ulounk lagle tedna, aplim vostram fafddun tannem mhonn’lem: “Tumi zôr Deva thaun koddsorun poddxeat, hi tumchich zobabdari; mhaka zalear, hantum koslich zobabdari na. Atam thaun hanv videxeank sondêx diunk vetolom.”

⁷Thõisorlo bhair sorun, to Tixius Justus mhonnlelea konn-ekleager gelo. Ho Devak bhôztalo ani tachem ghor devsthana lagim aslem.

⁸Devsthanachea vhoddila, Krispan ani tachea akhea kuttumban Somiacher bhavart dovorlo. Korintkarantleam zaiteam zannamnim Pauluchem aikun bhavart dhôrlo ani batism ghetlo.

⁹Êkê rati, Somian Pauluk dorxonant mhonn’lem: “Bhienaka, punn uloi ani ogo ravonaka,

¹⁰kiteak Hanv tujea sangata asam. Hea xarant Mhojê vatten khup lôk asa, mhonntôch tuka vaitt korunk konn fuddem sorcho na.”

¹¹Oso Paulu Korintant dedd voros ravlo ani Devachem utor tanchê modem porgottit aslo.

¹²Punn Galion Akaiecho odhikari aslo tedna, soglle Judev ekmotan Paulucher kolpole ani taka neaisobhê mukhar ubo kelo.

¹³Tãnnim mhonn’lem: “Ho monis lokak Somurticheam nemancher add Devak bhôzat mhonn aplê xikovnnen ôddta.”

¹⁴Paulu ulounk vetalo, punn tea adinch Galionan Judevank mhonn’lem: “Judevamnô, aikat: Koslea khotteponnacho vô opradacho proxn zal’lo zalear, tumcho arôp hanv favo tê porim aikoto aslom;

¹⁵punn ho tontto utrancho ani nanvancho ani tumchê somurti vixim dekhun, tumich to suttavo korat. Osleam vostunchi nit korunk mhaka khuxi na.”

¹⁶Uprant tannem tankam neaixallentle bhair sorunk laile.

¹⁷Tãnnim soglleamnim devsthanachea vhoddila, Sostenesak ghôtt dhôrlo ani neaixallê mukhar taka boddoilo. Ani team gollbollanchi Galionan porva keli na.

¹⁸Borech-xe dis Korintant ravlea uprant, bhavam-bhoinnincho nirôp gheun, Prixil’la ani Akuila borabôr tarvan Paulu Siriek gelo. Kenkresak pavtôch, apnnem êk angovnn kel’li ti pallunk, Paulun aple kens tasle.

¹⁹Efezak pavtôch, Paulun tankam thõi sanddlim ani devsthanant vochun Judevam kodde to bhasabhas korunk laglo.

²⁰Thõi anink thodde dis rav mhonn tãnnim tachê lagim maglem tedna, tannem hem mandun gheunk na,

²¹punn tancho nirôp ghetanam mhonn’lem: “Devak zai zalear, hanv portun ietolom.” Oso to tarvar bosun Efezantlo bhair sorun gelo.

²²Xezareiak pavlo tedna, povitr-sobhek bhett kortôch to Antiokiek gelo.

²³Hanga thoddo vêll ravtôch, Galaxiechea prantantlean ani Frijientlean bhonvun Paulu soglleam xisank ghottai ditalo.

²⁴Zolman Aleksandriecho, Apol’lo nanvacho, êk Zudêv Efezak pavlo. To ulovpant bhov huxar aslo ani Povitr Pustokam vixim bori zannvai aslolo.

²⁵Somiachê Vattechi taka bori xikovnn mell’leli ani to kallzachê vhoddê hurben uloitalo ani barkaien Jezu vixim xikovnn ditalo; punn taka fokot Juanvachea batismachi khobor asli.

²⁶Devsthanant to vhodda kalljidarponnan xikounk laglo; Prixil’lan ani Akuilan taka aikolo tedna, tãnnim taka apnnam-xim vhelo ani Somiachê Vattechi taka odik barik somzonni dili.

²⁷Akaiek vochunk Apol’lon khuxi dakhoili tedna, bhavam-bhoinnimnim taka hurba dili ani taka borê bhaxen gheiat mhonn xisank boroilem. To thõi pavlo tedna, Devachea dennean bhavarti zal’leank tannem khup adar dilo.

²⁸Sobhêmazar to Judevam kodde bollan vad-vivad choloitalo ani Jezu To Krist mhonn to tankam Povitr Pustokantlean dakhoitalo.