Read Goan Konkani AI 19 Bible Online

AI 19 - Goan Konkani bible

AI 19

¹Apol’lo Korintant astana, Paulu ut’toricheam desamnim bhonvun Efezak pavlo; hanga taka thodde xis mell’le.

²Tannem tanchê kodde vicharlem: “Tumi bhavart dhôrlo tedna, Povitr Atmo tumi gheunk na?” Tãnnim zobab dilo: “Na. Povitr Atmo asa mhonn porian ami aikunk na.”

³Tannem tankam vicharlem: “Tôr tumim koslo batism ghetlo?” Tãnnim portipall kelo: “Juanvacho,”

⁴Paulun mhonn’lem: “Apnna pattlean ieuncho asa Tacher, mhonngê Jezucher, porjen bhavart dovrunk zai mhonn sangun, Juanvan jivit-mon bodôlpacho batism dil’lo.”

⁵Him utram tãnnim aikolea uprant, Somia Jezuchea nanvan tankam batism dilo.

⁶Paulun tancher hat dovorle tedna, tancher Povitr Atmo denvlo ani te porkeô bhasô ani Devacho sondêx diunk lagle.

⁷Te soglle mellun sumar bara dadle asle.

⁸Devsthanant bhitôr sorun, tin mhoine to kalljidarponnan uloit aslo ani Devachea Rajea vixim tanchê lagim vad-vivad kortalo ani khatri diunk vavurtalo.

⁹Punn tantuntlim thoddim, aplea vadeachim zaun, bhavart dhorunk kobul naslim, punn sobhêmazar hê novê Vattê vixim vaitt ulounk laglim. Hea pasot, Paulun tankam sanddlim ani apleam xisank tanchê modle kuxin kaddle ani tankam gheun konn — eklea Tiranusachê xallent to dispottim vad-vivad kortalo.

¹⁰Hem oxem don vorsam tannem kelem ani hea pasot Aziechea prantant jietalo to lôk, zaum Judêv, zaum Grik, Somiachem utor aikunk pavlo.

¹¹Paulu udexim Dev itlim bhov vichitr vismitam kortalo, ki

¹²to vaportalo te rumal ani tachê katik laglolim vostram lokan piddevontank lailim tôr, tancheô pidda boreô zataleô ani mhelle atme bhair sorun vetale.

¹³Punn bhut kaddpi kãi vattsur Judev mhelle atme bosleleancher Somia Jezuchem nanv gheunk sôdtale; te oxem mhonntale: “Paulu porgôtt’ta tea Jezuchea nanvan tumkam hukum’ ghaltam.”

¹⁴Oxench kortale konn-eka Skiva nanvachea Judevanchea mha-iadnikache sat put.

¹⁵Punn mhellea atmean tankam mhonn’lem: “Jezuk hanv ollkhotam, Pauluk-ui hanv ollkhotam, punn tumi konn?”

¹⁶Ani mhello atmo boslolo to monis tancher upraslo ani eka pattlean ekak tannem tankam domaile ani itlea bollan tankam boddoile ki te sarkech vinglle zaun ani boroch mar khelea uprant gaiall zaun, tea ghorantle pollun gele.

¹⁷Efezant ravteleam soglleam Judevank ani Grikank hê ghòddnnechi khobor pavli tedna, tim sogllim bhirantin bhòrlim, ani Somia Jezuchea nanvak vhôdd man mell’lo.

¹⁸Bhavarti zal’lim tantlim puskoll zannam fuddem sorlim ani apunn kosleô-kosleô achari chali palltalim teô sobhêmazar sangunk laglim.

¹⁹Ani jadu korteleam modleam zaiteam zanna-mnim aplim pustokam punzaun haddlim ani soglleam hujir tankam uzo lailo. Heam pustokanchem mol pon’nas hozar rupeache nanne zatele mhonn odmas kelo.

²⁰Oxem vhodda nettan Somiachem utor odik-odik ximpodd-talem ani ghott zatalem.

²¹Heam soglleam ghòddnneam uprant, Atmeachea preronnan Paulun Maxedonientlean ani Akaientlean Jeruzaleak vochunk ievjilem. Tannem oxem mhonn’lem: “Thõi gelea uprant, hanvem Romak-ui bhett korunk zai.”

²²Hea pasot apleam dogam adaream, Timotak ani Erastusak, tannem apnna fuddem Maxedoniek dhaddle ani apunn thoddo kall Aziechea prantant ravlo.

²³Hea kallar, Somiachê Vattek lagun borech gollboll zale.

²⁴Demetrius mhonnlolo êk xêtt Artemis devichim rupeachim murti-pettulam kortalo, ani hea tachea dhondea vorvim tacheam kamdarank khup faido melltalo.

²⁵Soglleam apleam kamdarank ani tachê oslo dhondo korteleam herank tannem ektthãi kele ani mhonn’lem: “Ixttamnô, amchi zôdd hea dhondea vorvim ieta mhonn tumi zannont.

²⁶Jem kitem ho Paulu sangta, tem tumi pollelam ani aikolam. Mon’xancheam hatamnim kel’le dèv dèvuch nhoi mhonn sangun, Efezantuch nhoi, punn akhê Aziechea prantant Paulun zaiteam zannanchem mon bodôl’lam.

²⁷Amcho dhondoch poddot mhonn nhoi, punn xrêxtt Artemis devichea mondiracho dobazo buddon vochot mhonn bhirant asa. Ani oxem ak’khê Aziechea prantant ani akhea sonvsarant tika vhôdd man asa to ubon vetolo.”

²⁸Hem aikun te ragan bhòrle ani oxeô bobô marunk lagle: “Xrêxtt-vorti amchi Efezkaranchi Artemis!”

²⁹Akhem xar gollboll’lem. Xarant nattkancho ugto zago aslo; thõi sogllo lôk borabôr lotton gelo, ani Paulucheam bhonvddê-sangateam, Maxedoniekaram, Gaiusak ani Aristarkak tãnnim thõi porian borborit oddun vhele.

³⁰Zomlelea loka fuddem vochun, Paulu tankam ulo korunk sôdtalo, punn xisamnim taka addailo. Tannem nattkanchea zagear dixtti poddchench nhoi mhonn budh diun,

³¹Aziechea prantacheam odhikaream modleam tacheam thoddeam ixttamnim Pauluk nirôp dhaddlo.

³²Itlea mhonnosôr zoma zal’lea loka modem gondhôll odikuch vaddtalo: zonn-eklo veg-vegllê bhaxen huiêl martalo, ani tantlim zaitim zannam kiteak ektthovleant tem porian nokllo aslim.

³³Kãi zannam konn-eka Aleksandrak fuddem sorun uloi mhonn suchounk laglim; tedna Judevamnim taka mukhar lôttlo. Aple hat ubarun ogim ravat mhonn to lokak somzaunk sôdtalo.

³⁴Punn to Judêv mhonn lokak gomtôch, sogllim ekach tallean don voram sumar oxi huiêl marit ravlim: “Xrêxtt-vorti amchi Efezkaranchi Artemis! “

³⁵Xevttim xarachea karkunan urponjik somadhan korun oxem mhonn’lem: “Efezkaramnô, xrêxtt Artemixichea mondirachi ani sorgar thaun poddlelê tichê murtichi rakhônn, Efezkaranchem xar korta mhonn sonvsarant konn nokllo zait?

³⁶Konnacheanuch hem na mhonnum nozo. Mhonntôch tumi xant ravat ani uttavollaien kãich korinakat.

³⁷Heam mon’xank tumi hanga haddleat, punn tãnnim amchim mondiram chorunk nant, nhoi mhonn amchê devicher add kãi ninda te ulounk nant.

³⁸Demetriusacho ani tacheam kolakarancho konnacher virudh arôp asa zalear, neaisobha bhòrtat ani xarache odhikari asat thõi tãnnim arop dakhounche.

³⁹Hachê bhair tumkam anink kitem vicharpachem asa zalear, kaideaxir sobhent ho proxn tumchean voir kaddum ieta.

⁴⁰Aiz ghòddlam tea bonddachi zobabdari amcher poddunk xokta, kiteak ho oslo gollbôll korunk koslench karonn na.”

⁴¹Oxem sangun tannem zomlolea lokak portun dhaddlo.