Read Goan Konkani AI 2 Bible Online

AI 2 - Goan Konkani bible

AI 2

¹Pon’nasvea Disachea Porbechea somoiar tim sogllim êkêch svater zomlelim aslim.

²Ovchituch zonnzonnit varea sarko sorga velo êk avaz aikunk ailo; hea avazan tim aslim tem ak’khem ghor bhòrlem.

³Ani ujeacheô koxeô jibô tankam dixtti poddleô; teô fanttleô ani tancher ek-ekleacher bosleô.

⁴Tim sogllim Povitr Atmean bhòrlim ani, Atmean tankam dil’lo ulovpacho gunn gheun, tim veg-veglleam bhasamnim ulounk laglim.

⁵Mollba khala aslelea dor-eka raxttrachim bhoktivont Judev mon’xam Jeruzaleak vostek ail’lim aslim.

⁶Ho avaz aikun khup lôk ekttaim zalo ani apli zonn ekleachi bhas tim uloitat tem aikun to lôk ghuspolo.

⁷Thottakon ani ojap zaun to lôk mhonnunk laglo: “Him uloitat tim sogllim Galileikaram nhoi?

⁸Amchê modlea zonn-ekleachê avoi-bhaxen tim uloitat mhonn ami aikotanv tem koxem tôr?

⁹Ami Parthi, Medi ani Elamit; ami Mezopotamientlo, Judeiantlo ani Kapadoxientlo lôk; ami Pontusant, Aziechea prantant,

¹⁰Frijient ani Panfilient, Ejiptant ani Sirena bhonvtim aslelea Libiechea prantant ravpi; ami Roma thaun-ui ail’lo

¹¹Judêv lôk ani tanchim novxisam; tea bhair Kretkaram ani Arbi. Tori Devachim xrextt kortutvam, amcheam zonn ekleacheam bhasamnim tim porgôtto, ami aikotanv tem koxem tor?!”

¹²Tim sogllim tthottaklim ani sarkinch ghuspon ekamekak mhonnunk laglim: “Hem anink kitem?!”

¹³Punn dusrim moskoreô korun mhonntalim: “Him mon’xam novo soro pieun borinch lal zaleant.”

¹⁴Tedna Pedru Ikram borabôr ubo ravun ani aplo tallo ubarun oso uloilo: “Judevamnô, ani Jeruzaleant vostek asleleam somestamnô, hem zanno zaiat ani hanv sangtam taka chit diat.

¹⁵Tumi somzotat toxem him mon’xam bebdim zaunk nant, kiteak atam sokallchim novuch voram zaleant.

¹⁶Punn Joel provadea vorvim jem Devan sanglelem tem atam ghoddon ieta:

¹⁷‘Nimanneam disamnim — uloita to Sorvespor — sogllea mon’xakullacher Hanv Mhozo Atmo ghaltolom, tumcheô put-dhuvô sondêx ditelim, tumchim tornnattim dorxonam dekhtelim, ani tumchim zanntim sopnam sopnetelim.

¹⁸Ani khorench team disamnim Mhojeam gulamancher porian, dadleancher toxem bailancher, Hanv Mhozo Atmo ghaltolom, ani tim sondêx ditelim.

¹⁹Voir mollbar Hanv vizmitam korun dakhoitolom ani sokla prithumer khunna-ojapam: rogot, uzo ani dhunvrachim kupam.

²⁰Xrêxtt ani tezvont Sorvesporacho Dis udeunchê adim suriacho zatolo kallôk ani chondrimachem zatolem rogot.

²¹Tedna Sorvesporachem Nanv ghetat team soglleank soddvonn mellteli.’

²²Israel-porjecheam bhavam-bhoinnimnô, him mhojim utram chitan aikat! Devan tumchê modem Nazaretkar Jezu Apnnak manovlolo monis mhonn dakhoilo: To tumchê modem aslo tedna, Tachê udexim Devan ochoriam ani vismitam ani khunna kelim — hi soglli khobor tumi zannont.

²³Aplê tharail’lê ievzonnê pormannem, sogllem adim-fuddench zanno zaun, Devan Jezuk poradhin kelo, ani tumi Taka Somurt-nasleleam mon’xanchê adhin korun khursar umkollailo ani jivexim marlo. Punn Devan Taka mornnachea bandpasantlo soddoun Taka punorjivont kelo.

²⁴Kiteak Taka aplea chopkeant dhorunk mornnak koxêch bhaxen podvi asum nozo asli.

²⁵Tôr Tachê vixim David oxem mhonnta: ‘Hanv Sorvesporak sodanch mhojeam dolleam mukhar dovortam, To mhojea uzveak asa mhonntôch, Hanv kodinch halonam.

²⁶Dekhun mhojem kalliz murgott’ta, mhoji jib ul’lasta, mhoji kudd porian bhorvanxean sust zateli,

²⁷kiteak Tum mhozo jiv Norkant sanddcho nãi ani Tujea visvaxi bhoktacho vinas zaunk diuncho nãi.

²⁸Tum mhaka jivitachi vatt dakhoitoloi, Tujê mukhar mhaka mellteli anondachi bhorti.’

²⁹Bhavam-bhoinnimnô, hem mhojean tumkam khatren amchea porzapoti Davida vixim sangum-ieta: to melo ani taka purlo ani tachi somadhi aichea disa porian amchê modem asa.

³⁰Mhonntôch, provadi zaun, apnnak Devan kel’lê bhasavnnechi Davidak khobor asli: tachê sonstichea ekleak tachea xinvasonar Apunn bosoitolo mhonn khud Devan taka soput dil’lo.

³¹Hea pasot tannem Kristachem punorjivontponn adim-fuddench pollelem ani oxem porgott kelem. Devan norkant sanddunk na to Hoch! Jicho Devan vinas zaunk diunk na, ti kudd Hachich!

³²Hea Jezuk Devan punorjivont kelo ani ami soglle Tache govai.

³³Devan Taka Aplê podven sorgar ubarun vhelea uprant, bhasail’lo Povitr Atmo Tannem Bapa koddlo ghetlo ani amcher dhaddlo. Tumi polletat ani aikotat tem hench!

³⁴Kiteak David sorgar choddunk na; tori tannem mhonn’lam: ‘Mhojea Somiak Sorvesporachem utor hem: Mhojea uzvea hatak bos, tujeam dusmanank Hanv tujeam pãiam tolla ghaltam.’

³⁵

³⁶Mhonntôch tumi khursar marlo tea Jezuk Devan Somi ani Krist kelo mhonn Israelachem ak’khem ghorannem sogllê khatren zanno zaunchem.”

³⁷Him utram aikolim tankam vhôdd khônt bhògli ani Pedruk ani heram Apostlank tãnnim mhonn’lem: “Bhavamnô, ami kitem korchem?”

³⁸Pedrun zap diun mhonn’lem: “Jivit-mon bôdlat, ani tumcheam patkanchem bhogsonnem gheunk zonn-eklean Jezu Kristachea nanvan batism gheuncho, ani tumkam Povitr Atmeachem dennem melltelem.

³⁹Kiteak ji Devan bhasavnni kelea, ti tumchê khatir ani tumcheam bhurgeam-ballam khatir ani pois asleleam somestam khatir, amcho Sorvespor Dev Apnna-xim apoun haddtolo titleam-i khatir.”

⁴⁰Zaitem her sangun tannem apli govaiki dili ani tankam oso ulo kelo: “Hê noxttê pinddkentli tumkam soddvonn mellun gheiat.”

⁴¹Tedna tãnnim tachem utor mandun batism ghetlo. Tea disa sumar tin hozar lôk tanchea zomeant bhitôr sorlo.

⁴²Tim apostlanchi xikovnn gheunk, bhavponnacho ekchar samballunk, toxench unddeachê môddnnent ani magnneannim vantto gheunk kodinch chukonaslim.

⁴³Sogllo lôk thottak zatalo, kiteak apostlam vorvim puskoll vismitam ani khunna ghòddtalim.

⁴⁴Bhavarti sogllim ekvottant jietalim ani tanchem sogllem bhaga aslem;

⁴⁵tim aplim bhattam-vit’tam viktalim ani vikrecho duddu zonn-ekleachê gorjê pormannem vantt’talim.

⁴⁶Ekach monan dispottim tim Devmondirant vetalim ani unddo moddunk tanchea eka-eka ghorant ektthãi zatalim, ani khuxalkaien ani kallzachea bholeponnan

⁴⁷tim Devak vakhanntalim ani sogllea lokak manovtalim. Zankam taronn mellchem aslem, tankam tanchea vangdda haddun, disan’dis Sorvespor tancho ank choddoitalo.