Read Goan Konkani AI 20 Bible Online

AI 20 - Goan Konkani bible

AI 20

¹Uchambollai thambtôch, xisank ektthãi korun ani tankam xiddkavnni diun, Paulun tancho nirôp ghetlo ani Maxedoniek vochunk to bhair sorlo.

²Thõisorleam ganvam-ganvamnim bhonvddi martôch ani zaitem sangun tankam dhir ditôch, to Akaiek portolo ani

³hanga tin mhoine to ravlo; thõi thaun Siriek tarvan vochunk to toiari korta mhonnosôr, Judev aplo ghat gheunk sôdtat mhonn taka gomlem. Tea khatir tannem Maxedonientlean porot vochunk ievjilem.

⁴Tachê borabôr gele te he: Bereiecho Sopater, Pirrucho put; Tesalonikeche Aristark ani Sekundus; Derbecho Gaius; Timot; ani Aziechea prantantle Tikikus ani Trofim’.

⁵Te amchê mukhar gele ani Troasant amkam ravle.

⁶Fug-nasleleam Unddeanche dis zatôch, Filipi thaun tarvar bosun ami bhair sorleanv ani panch disam uprant tankam Troasant mell’leanv; hanga ami ek satollem sarlem.

⁷Satolleachea poilea disa ami ekchara-jevnnak ektthovleanv. Paulun tankam êk boli keli ani to sokallim vecho aslo dekhun modianir porian tannem aplem ulovop chalu dovorlem.

⁸Ami ektthãi zal’leanv tea unchlea vosreant zaiteô ponntteo lail’leô.

⁹Eutik nanvacho êk tornnatto zonelacher boslolo; Paulu uloitam-uloitam, taka borich nhid poddli ani nhidechê bhormen to tisrê malloier thaun zomnir poddlo ani tankam melolo mell’lo.

¹⁰Paulu sokol denvlo ani tacher add poddun ani taka vengoun mhonn’lem: “Bhienakat, taka ozun jiv asa.”

¹¹Uprant voir vochun tannem unddo môddlo ani khelo. Magir tanchê lagim khup uloilo ani fantear thõicho bhair sorun gelo.

¹²Jivo kel’lea tornnatteak tãnnim ghora vhelo ani tankam zaiti khuxalkai bhògli.

¹³Ani amchi fuddli vatt dhorun doriantlean ami As’sosak geleanv; hanga Paulu amchea tarvar choddcho aslo, kiteak tannem adim oxem tharail’lem ani to thõi porian ganvantlean cholun ieuncho aslo.

¹⁴To amkam As’sosant mell’lea uprant, taka ami tarvar ghetlo ani Mitilenak vochunk ami bhair sorleanv.

¹⁵Thõi thaun amchem tarum fuddem gelem ani Khiosa mukhar thamblem. Dusrea disa ami Samosak pavun thambleanv, ani tisrea disa Miletak pavleanv.

¹⁶Aziechea prantant thambun vogôt korina zaunk, Efez soddun Paulun fuddem vochunk tharailem, karonn Pon’nasvea Disache Porbek, zata zalear, Jeruzaleak pavunk to takit kortalo.

¹⁷Mileta thaun Paulun Efezachê povitr-sobhecheam zannteank apounk dhaddle ani,

¹⁸te pavle tedna, tannem tankam oxem mhonn’lem: ‘Aziechea prantant hanvem pãi dovorlo tea poilea disa thaun hanv tumchê modem aslom titlo-i vêll koso vaglam tem tumi zannont;

¹⁹Judevancheam addkam-naddkank lagun mhojer ail’leam koxttam modem dukam golloun, sogllê lhan’vikaien hanvem Somiachi seva kelea.

²⁰Tumkam kitench boreak poddta tem porgott korunk hanv kednanch pattim sorunk nam. Hanvem tumkam nirop porgôtt kela ani sobhêmazar ani tumcheam ghoramnim hanvem tumkam xikovnn dilea.

²¹Deva-xim portun ieiat ani amchea Somia Jezucher bhavart dovrat mhonn Judevank ani Grikank hanvem ulo marla.

²²Ani atam, polleiat, Atmo mhaka Aplo koidi korun vhorta mhonn hanv Jeruzaleak vetam; thõi mhaka kitem ghòddtelem tem hanvuch nokllom,

²³punn mhaka bondkhônn ani koxtt ravtat mhonn Povitr Atmo dor-eka xarant mhaka kolloit asa.

²⁴Punn mhojea jivak koslench mol na mhonn hanv dhôrtam. Devachê doiallaiechea xubhvhortomanak sakxi diunchi seva Somia Jezu koddchi hanvem ghetlea ti xarti pavounk ani oxem mhojem jivit sompounk — hi êkuch mhoji axa.

²⁵Hanvem tumchê modem bhonvun Raj porgôttlam khorem, tori atam tumi sogllim novean mhojem tondd polleunchim nant mhonn hanv boro zannom.

²⁶Hea pasot aichea disa hanv tumkam khochit sangtam: tumam-soglleam modem konnacho-i ibadd zalo zalear, hanv zobabdar nhoi,

²⁷kiteak Devachi akhi ievzônn tumkam kollit korunk hanv pattim sorunk na.

²⁸Devachê povitr-sobhecho samball korunk Povitr Atmean tumkam odhikari keleat, tôr tumchê vixim ani akhea hindda vixim tumi zagrut ravat; hi povitr-sobha Tannem Apleach Putachea rogta vorvim Apli kelea.

²⁹Hanv gelea uprant tumchê modem krur landdge rigtele ani hindd ibadd korun sôddtele mhonn hanv borem zannom.

³⁰Apnnam pattlean xisank oddun vhorchê pasot, khotti xikovnn diunk tumchêch bhitorle monis upzotele.

³¹Tea khatir zagrut ravat, ani hanvem dukam varoun tin vorsam porian thambonastanam dis-rat tumchê modlea zonn-ekleak budh dilea ani xiddkaila mhonn ugddas dhôrat.

³²Ani atam Devachea hatant tumkam ghaltam ani Tachê doiallaiechea utrak tumkam patietam; tumkam bandun haddunk ani soglleam povitr kel’leam borabôr tumkam daiz diunk tea utrak podvi asa.

³³Hanvem konnacheach rupeachi, vô bhangarachi, vô nhesnnechi axa dhorunk na.

³⁴Heam mhojeam hatamnim vavr korun mhojeam ani mhojeam boraborcheancheam gorzank hanv pavlam mhonn tumkam khobor asa.

³⁵‘Dusream koddchem gheunchê poros dusreank divop odik vhodd sontosachem — heam Somia Jezucheam khaxa utrancho ugddas dhorun, koxtt korun osoktank adar diunk zai mhonn sogllê bhaxen hanvem tumkam dakhoilam.”

³⁶Hem uloilea uprant, tanchê borabôr dimbier ravun Paulun magnnem kelem.

³⁷Te soglle dukamnim roddunk lagle ani Pauluk veng marun tacho umanv ghetlo.

³⁸Te anink kednanch tachea tonddar nodor ghalunk pavche nant mhonn tannem sangil’lean, tankam bhov vhôdd khônt bhògli. Uprant tarvar porian te taka pavounk gele.