Read Goan Konkani AI 21 Bible Online

AI 21 - Goan Konkani bible

AI 21

¹Xekim tancho nirôp gheun tankam sanddtôch, tarvar bosun ami nitt geleanv ani Kosak pavleanv; dusrea disa Rodesak pavleanv ani thõi thaun Patarak geleanv.

²Fenixiek vetalem tem ek tarum hanga amkam mell’lem; tea tarvar choddun ami fuddem geleanv.

³Xiprus dixtti poddtôch, ho zunvo amchea dhaveak sanddun ami Siriek geleanv ani Tirachea bondrar utorleanv: thõi tea tarvantlo mal denvouncho aslo.

⁴Thõisôr thodde xis amkam gavle ani tanchea sangata ek satollem ami ravleanv. Jeruzaleak vochonaka mhonn Atmeachea preronnan tim portun-portun Pauluk sangtalim.

⁵Punn amcho vogôt pavtôch, ami amchi fuddli vatt dhôrli. Ami xara bhair pavo porian, dadle apleam bailank-bhurgeank gheun amkam pavounk aile. Veller pavtôch dimbier ravun ami magnnem kelem.

⁶Ekamekacho nirôp ghetôch ami tarvar choddleanv ani tim aplea ghora portolim.

⁷Tira thaun doriantlean amcho provas somptôch, ami Ptolemaisak utorleanv. Hanga ami bhavam-bhoinnink bhettleanv ani tanchê modem êk dis ravleanv.

⁸Dusrea disa ami bhair sorleanv ani Xezareiak pavleanv. Thõi xubhvhortoman porgôttnnara Filipager ravleanv; to team satam modlo eklo.

⁹Taka char ankvar dhuvô asleô ani hankam Devacho sondêx divpacho vorgunn aslo.

¹⁰Ami thõi borech-xe dis ravlea uprant, Agabos nanvacho Judeiantlo êk provadi thõi pavlo.

¹¹To amchê-xim ailo ani Paulucho pott’tto kaddun tannem aplech hat ani pãi bandle; magir to oso uloilo: “Povitr Atmo oxem mhonnta: hea pott’tteachea dhoniak Judev Jeruzaleant oxe bandtele ani taka videxeanchê adhin kortele.”

¹²Hem aikun, ami ani thõisorlea lokan Jeruzaleak vochonaka mhonn Paulu kodde vinoti korun maglem.

¹³Tedna Paulun oso zobab dilo: “Oxem roddun ani mhojem kalliz dukhoun, tumi kitem kortat? Hanv zalear, Somia Jezuchea nanva khatir Jeruzaleant bondkhonnint poddunkuch nhoi, punn morunk porian toiar asam.”

¹⁴Amchem aikunk to bilkul kobul zaina mhonn polleun, ami taka somzav-pachem sôddlem; ami mhonn’lem: “Somiachi khuxi zaum.”

¹⁵Thoddeam disam uprant, ami amchi toiari korun Jeruzaleak geleanv.

¹⁶Xezareiache thodde xis amchê borabôr aile; ami biddarak vetaleanv tea mon’xager tãnnim amkam pavoile. Ho êk Xipruskar aslo, poileam xisam modlo eklo; tachem nanv Mnason.

¹⁷Ami Jeruzaleak pavleanv tedna, bhavam-bhoinnimnim amkam khuxal-kaien ievkar dilo.

¹⁸Dusrea disa, amchê borabôr Paulu Jakobak bhett korunk gelo; soglle zannte thõi zomlele asle.

¹⁹Tankam noman kortôch, aplea vavra vorvim videxeam modem Devan kitem-kitem kelem, tem sogott Paulun tankam sanglem.

²⁰Hem aikun tãnnim Devak vakhannlo ani Pauluk mhonn’lem: “Polle, bhava, Judevam modem hozaramnim bhavart dhôrla ani tim sogllim Somurt hurben samballpi ani rakhpi mon’xam.

²¹Videxeam modem jieteleam soglleam Judevamnim Moizesak soddun diuncho, mhonngê apleam putanchi sunôt korchi nhoi ani Judevancheô chali-riti pallcheô nhoi, oxem tum xikoitai mhonn tãnnim tujê vixim aikolam.

²²Tôr atam kitem korum-ia? Lôk ektthãi zalea bogor ravcho na, kiteak tum hanga pavlai mhonn tankam khobor pavtelich.

²³Tôr ami tuka sangtanv toxem tum kôr. Amchê modem apnnam vixim Somurti pormonnem Devak bhas dil’le choug dadle hanga asat.

²⁴Tankam tujê borabôr vhor, tanchea sangata tuji xud’dhi kôr ani tãnnim aple kens tasunk tum poixe farik kôr. Tedna tujê vixim tãnnim aikolam tem sarki fôtt mhonn ani tunch tujeam kornneamnim Somurt samballtai mhonn soglleank kollon ietelem.

²⁵Punn bhavart dhôrla team videxeamnim murtim-puttleank bhettoil’lem mas, rogot ani gomtti pillun marleleô mon’zati khauncheô nhoi; Somurticheam kaideam virudh logn korchem nhoi: oxem ami tharailam tachi khobor diun tankam boroun dhaddlam.”

²⁶Tedna Paulun team chougam dadleank apnna borabôr ghetle ani dusrea disa tanchê sangatim xud’dhichi rit pall’li. Uprant to Devmondirant gelo ani xud’dhiche dis sompoun khõichea disa ek-eklean apnna khatir iôdn somorpunk zai mhonn tannem sanglem.

²⁷Te sat dis somptat mhollear, Aziecheam prantantleam Judevamnim Pauluk Devmondirant pollelo. Tãnnim sogllê urponjik khubdaili ani Pauluk dhorun bob marli:

²⁸“Israelkaramnô, pavat! Sogllê kodden ani soglleank amchê porjecher, Somurticher ani hea zageacher add xikoita to monis ho! Itlench nhoi, videxeank tannem Devmondirant bhitôr haddle ani ho Povitr Zago bhoxttailo.”

²⁹Tãnnim oxem mhonn’lem, kiteak Efezkara, Trofim’ak Paulu borabôr tãnnim Xarant pollel’lo ani Paulunuch taka Devmondirant bhitôr kaddlolo mhonn te somzole.

³⁰Sogllem xar uchamboll zalem ani sogllê koddcho lôk dhanvun ailo; tãnnim Pauluk dhôrlo ani taka bôrbôrit ôddun Devmondira bhair kaddlo ani rokddinch Devmondirachim daram dhamplim.

³¹Pauluk jivo marunk toiar zatale tedna, akhem Jeruzalem uchamboll zalam mhonn polttonnechea sordarak khobor pavli.

³²Kãi xotpotink ani soinikank gheun sordar porjê-xim dhanvun gelo. Sordarak ani soinikank polleun, Pauluk boddoitale te thamble.

³³Tedna sordar Paulu-xim ailo, tannem taka dhôrlo, ani doddeam sankllimnim taka bandunk lailo; magir to konn ani kitem kelam kai mhonn to vicharunk laglo.

³⁴Chombeantlo lôk bob marun veg-vegllem sangtalo. Ani hea gondhollant taka sarkich mhaiti mellona zaun, sordaran Pauluk kottant vhorunk formailem.

³⁵Paulu panvddeancher pavlo tedna, urpônz itli uchambôll zali ki soinikamnim taka uklun vhorcho poddlo.

³⁶Soglli urpônz tanchê pattlean vetali ani oxi bob martali: “Taka jivexim marat!”

³⁷Pauluk kottant bhitôr kaddchê adim, tannem sordarak mhonn’lem: “Tujê kodde mhojean ek utor uloum-ieta?” Sordaran zobab dilo: “Tum Grik bhas zannoi tôr?

³⁸Thoddo kall adim, ek bondd upzoun, char hozar punddank oronneant vhel’le to Ejiptkar nhoi tum?”

³⁹Paulun zobab dilo: “Hanv êk Judêv, Xilixientlea Tarsus ganvcho; hea fanki xaracho hanv nagrik. Hea loka kodde ulounk mhaka porvangi di mhonn hanv tujê kodde magtam.”

⁴⁰Sordaran rojea ditôch, Paulu panvddeancher ubo ravlo ani aplo hat ubarun tannem lokak ogi ravpak khunna keli. Sogllim sarkim ogim ravlim tedna, tannem Hebrêv bhaxen oxem ulounk suru kelem: