Read Goan Konkani AI 22 Bible Online

AI 22 - Goan Konkani bible

AI 22

¹“Mhojeam bhavam-bhoinnimnô, mhojeam vhoddilamnô, mhoji rakhônn korunk tumchê mukhar hanvem atam kitem sangchem asa tem chit diun aikat.”

²To Hebrêv bhaxen uloitalo tem aikun, lôk odikuch ogo ravlo ani Paulun aplem ulovp suru kelem.

³“Hanv êk Judêv; Xilixiechea Tarsusant hanv zolmolom, punn hea Xarant hanv lhan-vhôdd zalom. Amcheam purvozanchi Somurt Gamalielacheam pãiam-xim hanv bariksannen xiklam; zoxem tumi sogllim aiz hurba dakhoitat, toxench hanvem sogllê hurben Devachi seva kelea.

⁴Novê Vattecheam pattlavdarank hanvem mornnak pavoi-sôr dhumallo dila; dadleank toxem bailank sankllimnim bandun hanvem bondkhonnint ghaleant.

⁵Ani hachêch vixim porom’-iadnik ani zannteancho akho zomo mhaka govai diunk xoktat; kiteak tanchê koddchim, Damaskant asleleam Judev bhavank hanvem potram ghetlim ani heam mon’xank kheast lavchê pasot tankam dhorunk ani sankllimnim bandun Jeruzaleant haddunk mhonn hanv Damaskak vetalom.

⁶Provas kortanam ani Damaskak lagim pavtam-pavtam, don’parchea vellar sorgar thaun ovchit vhôdd uzvadd mhojê bhonvtim porzoll’lo; tedna hanv zomnir poddlom ani oxem sangto êk tallo hanvem aikolo:

⁷‘Saulu, Saulu, kiteak mhonn tum Mhaka dhumallo ditai?’

⁸Hanvem vicharlem: ‘Saiba, konn ga tum?’ Tannem mhaka zobab dilo: ‘Hanv Nazaretkar Jezu, ani Mhakach tum piddapidd ditai.’

⁹Mhojê borabôr asle tãnnim uzvadd pollelo, punn mhojê lagim uloitalo tacho tallo tãnnim aikunk na.

¹⁰Hanvem vicharlem: ‘Somia, kitem korum hanv?’ Somian mhaka sanglem: ‘Utth, Damaskant voch ani tunvem kitem korunk zai tem sogllem konn thõi tuka sangtolo.’

¹¹Tea uzvaddachea loklokan mhaka kãi ek dixtti poddona zalem, dekhun mhojeam sangateamnim mhaka hatak dhorun Damaskak vhelo.

¹²Thõi Ananias mhonnlolo konn-eklo Somurti pormannem bhoktivont monis jietalo ani taka tea xarantlo sogllo Judêv lôk man ditalo;

¹³to mhaka bhettunk ailo; mhojê-xim ubo ravun tannem mhonn’lem: ‘Saulu bhava, novean polleunk lag.’ Thõichê-thõich hanv taka polleunk laglom.

¹⁴Uprant tannem mhaka mhonn’lem: ‘Amcheam purvozanchea Devan tuka adim-fuddench nivddun kaddla: Apli ievzônn konn ti ollkhunk, Devak Manovleleak[5] polleunk, ani tacheach tonddantlim utram aikunk Devan tuka vinchla.

¹⁵Kiteak tunvem dekhlãi ani aikolãi tem sangun soglleam mon’xam mukhar tum Tacho sakxidar zatoloi.

¹⁶Ani atam anink ravchem kiteak? Utth ani batism ghe ani Tachem Nanv gheun tujim patkam dhuun kadd.’

¹⁷Hanv Jeruzaleak portotôch, Devmondirant magnnem kortana,

¹⁸Povitr Atmeacho bhar mhojer ailo ani hanvem Somiak pollelo. Tannem Mhaka oxem mhonn’lem: ‘Jeruzaleantlo vegim bhair sor; kiteak Mhojê vixim tum govai ditoloi ti tim mandun gheunchim nant.’

¹⁹Hanvem zobab dilo: ‘Somia, dor devsthanant bhonvun, Tujer bhavart dovorteleank hanv bondkhonnint ghaltalom ani mar-far kortalom mhonn tim borim zannont.

²⁰Tujea sakxidara Istevachem rogot varoilem tedna, hanv khud thõi aslom, tacho khun hanvem mandun ghetlo ani taka jivo marteleanchim angavlim hanvem rakhlim!’

²¹Tedna Tannem mhaka mhonn’lem: ‘Voch, Hanv tuka pois asleleam videxeam-xim dhaddtolom.’ ”

²²Itlo vêll porian tãnnim tachem aikolem; uprant, vhoddlea tallean tãnnim oxi huiêl marli: “Oslea mon’xak prithumê velo nanch korat! Taka anink jivo dovrunk favona.”

²³Lôk bobô-huieli martalo ani aplim avoronnam voir kaddun haloitalo ani dhull varear uboitalo.

²⁴Tedna sordaran taka kottant vhorunk formailem ani Judêv lôk oxeô bobô-huieli kiteak martat tem zanno zaunchê khatir, taka soitincho mar ghalun tachi chovkoxi korunk hukum’ ghalo.

²⁵Taka doramnim bandtôch, thõi ubo asto xotpotik Paulun mhonn’lem: “Tumchea kaidea pormannem, koslich zhôddti korinastana eka Romi nagrikacher tumchean jerbond marum-ietat?”

²⁶Hem aikun xotpoti sordara-xim gelo ani taka vicharlem: “Kitem mhonn kortai tum? To monis êk Romi nagrik!”

²⁷Paulu-xim vochun, sordaran mhonn’lem: “Tum Romi nagrik zalear mhaka sang.” Paulun zobab dilo: “Hôi.”

²⁸Sordaran mhonn’lem: “Khup duddu moddun hem nagrikponn mhaka mell’lam.” Paulun portun mhonn’lem: “Mhaka zalear, zolmanuch tem mhojem.”

²⁹Mhonntôch vichar korun Pauluchi chovkoxi korche asle te rokddea-rokdde pattim sorle, ani sankllimnim apnnem bandlolo to êk Romi nagrik mhonn lokak gomlea uprant, sordar-ui bhielo.

³⁰Dusrea disa, Judev Paulucher koslo arôp ghaltat to sarko zanno zaunk sôdtalo dekhun, sordaran Pauluk soddunk lailo ani mukhel iadnikanchi ani akhê Mha-Dhormsobhechi zomat apoili. Uprant Pauluk haddlo ani tanchê mukhar ubo kelo.