Read Goan Konkani AI 23 Bible Online

AI 23 - Goan Konkani bible

AI 23

¹Paulun Mha-Dhormsobhek tellun polleun mhonn’lem: “Mhojeam bhavamnô, aiz porian Deva mukhar nitoll ontoskornnan hanv chol’lam.”

²Hea vellar Ananias porom’-iadnikan apleam sevokank Pauluchea tonddar thapott marunk lailem.

³Paulun taka mhonn’lem: “Chunno kaddloli vonnôt tum! Dev tuka martoloch! Somurti pormannem mhoji nit korunk tum boslai ani Somurticheruch add mhaka marunk laitai?”

⁴Sevokamnim taka mhonn’lem “Kitem? Devachea porom’ — iadnikak okman kortai tum?”

⁵Paulun zobab dilo: “Bhavamnô, to porom’ — iadnik mhonn mhaka khobor nasli, kiteak oxem boroil’lem asa: ‘Tujê porjechea fuddareacher tum xirap ghalcho nãi.’ “

⁶Tanchê modem êk pôkx Sadukincho ani dusro Farizevancho aslo mhonn zanno zaun, Paulun Mha-Dhormsobhent mhonn’lem: “Bhavamnô, hanv êk Farizêv, Farizevancho put hanv. Mel’lim mon’xam punorjivont zatat mhonn hanv bhorvanso dhôrtam dekhun, mhoji aiz zhôddti zata.”

⁷Oxem mhonnona fuddem Farizevam ani Sadukim modem vad-vivad suru zalo ani sobha don vantteamnim futtli.

⁸Punorjivontponn, devdut ani atmo asat mhonn Saduki sotmaninant, punn Farizev tin-ui manun ghetat.

⁹Haka lagun motti bobatt zali ani Farizevam modle thodde xastri ube ravun nettan nixêd marunk lagle: “Hea mon’xa sovem amkam kãich vaitt mellonam. Tachê kodde êk atmo vô êk devdut uloila zalear konn zanno!”

¹⁰Huzôt odikuch vaddli ani Pauluche pinzun kuddkean’-kuddke kortit mhonn sordar bhielo dekhun, apleam soinikank dhaddun, Pauluk tanchê modlo bollan kaddun kottant vhorat mhonn tannem formailem.

¹¹Dusrê rati, Somi Paulu-xim ieun ubo zalo; Tannem mhonn’lem: “Ghôtt rav, tunvem Mhojê vixim Jeruzaleant sakxi dileai, toxich atam Romant-ui diunk zai.”

¹²Dis uzvaddtôch, Judevamnim guddmêll kelo ani Paulucho jiv kaddlea xivai apunn jevche nant, nhoi mhonn pieunche nant mhonn tãnnim soput ghetlo.

¹³Ho soput ghetlele te sumar challis-am voir asle.

¹⁴Uprant mukhel iadnikam-xim ani zannteam-xim vochun, tãnnim mhonn’lem: “Pauluk jivexim marlea xivai ami kãich chakche nanv mhonn ami khôr soput ghetla.

¹⁵Pauluchi sarki topasnni korchê khatir mhonn nib dhorun, taka tumchê-xim dhadd mhonn tumi Mha-Dhormsobhê borabôr sordarak sangunk dhaddat. To hanga pavchê adinch tacho jiv kaddunk ami amchê pallien toiar asanv.”

¹⁶Punn Pauluchê bhoinnichea putan hi moslôt aikoli ani kottant vochun soglli khobor Pauluk sangli.

¹⁷Tedna Paulun eka xotpotik apnna-xim apounk dhaddlo ani taka mhonn’lem: “Hea tornnatteak sordara-xim vhor, to taka kitem sangunk sôdta.”

¹⁸Xotpotin taka sordara-xim vhorun mhonn’lem: “Bhondkhonnint aslelea Paulun mhaka apounk dhaddlo ani hea tornnatteak tujê-xim vhor mhonn mhojê lagim maglem; ho tuka kitem sangunk sôdta.”

¹⁹Sordaran tachea hatak dhôrlo ani kuxin vhorun vicharlem: “Kitem sangunk sôdtai tum mhaka?”

²⁰Tannem mhonn’lem: “Pauluchi odik bori choukoxi korchi mhonn nib dhorun, taka faleam Mha-Dhormsobhê fuddeant tunvem dhaddun diuncho mhonn tujê lagim magunk Judevamnim tharailam.

²¹Punn tum tanchem aikum naka, kiteak tanchê modem challis-am voir monis tacho ghat gheunk sôdtat ani taka jivexim marlea xivai apunn jevche nant nhoi mhonn pieunche nant mhonn tãnnim soput ghetla. Hem korunk te toiar asat ani tujê maniotaiek ravtat.”

²²Apnnak gomoilea ti khobor anink konnakuch tannem sangchi nhoi mhonn sordaran taka formailem ani taka dhaddlo.

²³Magir sordaran dogam xotpotink apoile ani mhonn’lem: “Ratcheam tin vorancher thaun, Xezareiak vochunk don’xim soinikank, sot’tôr ghoddes-varank ani don’xim bhalekarank toiar korat.

²⁴Pauluk bosunk thodde ghodde toiar korat ani taka Feliks razpala fuddeant borê bhaxen vhorat.”

²⁵Ani tannem oxem ek potr boroilem:

²⁶“Klaudius Lixias xrêxtt Feliks razpalak noman korta.

²⁷Judevamnim hea mon’xak dhôrlo ani te taka jivexim marunk asle. To êk Romi nagrik mhonn mhaka khobor pavli mhonnun, mhojeam soinikank gheun hanv taka tancheam hatantlo soddunk gelom.

²⁸Te tacher kosle arop ghaltale te hanv zanno zaunk sôdtalom dekhun, hanvem tanchê Mha-Dhormsobhê mukhar taka vhelo.

²⁹Tacher mornnachem formonn marunk vô taka bondkhonnint ghalunk koslench karonn na mhonn mhaka gomlem; tacher arôp aslo to fokot tanchê Somurticheam proxnam vixim.

³⁰Taka jivexim marunk Judev moslôt kortat mhonn mhaka khobor pavli, dekhun taka tujê-xim dhaddun diunk hanvem tharailem. Tacher koslem garannem asa zalear, tem tujê mukhar dokhol korat mhonn tancheam aropeank-ui hanvem sanglam. Noman.”

³¹Apnnank ghal’lo hukum’ soinikamnim pall’lo. Ratiam tãnnim Pauluk Antipatris porian vhelo.

³²Dusrea disa ghoddesvarank Paulu borabôr vochunk dovrun soinik porte kottant aile.

³³Xezareiak pavtôch tãnnim tem potr razpala kodde dilem ani Pauluk tachea fuddeant ubo kelo.

³⁴Razpalan potr vachlem ani to khõichea prantantlo kai mhonn Paulu kodde vicharlem; to Xilixiecho mhonn taka gomtôch,

³⁵tannem taka mhonn’lem: “Tuje aropi ietôch hanv tuka aikotolom.” Ani Pauluk Herodin bandlolea razvaddeant dovrunk tannem formailem.