Read Goan Konkani AI 24 Bible Online

AI 24 - Goan Konkani bible

AI 24

¹Panch disam uprant, Ananias porom’ — iadnik kãi zannteank ani vokila, Tertulak gheun Xezareiak gelo. Te razpala mukhar gele ani Paulucher add tãnnim aple arop manddle.

²Pauluk bhitôr haddlo ani Tertulan tacher add heam utramnim garannem suru kelem: “Bhov xrêxtt Feliksa, tuka ani tujea huxar karbharak lagun nirontôr xanti ami bhogunk pavleanv. Ani amchea raxttra khatir kel’leô khub sudharnneô teô tujeach durdorxiponnak lagun amkam favo zaleat. Hea sogtta pasot, sodanch ani sogllê kodden, ami tuka bhov abhari asanv.

⁴Tuzo chôdd vêll hanv kaddunk sodinam ani dekhun mhojim donuch utram upkar korun aik mhonn magtam.

⁵Ho monis êk noxtti pidda mhonn amkam gomun ailam. Akhea sonvsarar ximpoddleleam soglleam Judevam modem to bonddai upzoita ani Nazaretanchea pongddacho to mukhêl fuddari.

⁶Devmondir porian bhoxttaunk tannem proitn kele tedna, taka ami dhôrlo. [Ami amchê Somurti pormannem tachi nit korunk sôdtaleanv, punn

⁷Lixias sordar hea tontteant bhitôr sorlo ani bollan amcheam hatantlo taka kaddun ghetlo;

⁸tacher arôp ghaltat tãnnim tujê mukhar ieunk zai mhonn tannem hukum’ ghalo].[6] Tunch tachê lagim vicharxi zalear, amchea aropant sot asa mhonn tuka gomtelem.”

⁹Judevamnim Tertulak palôv dilo ani hem sogllem khorem mhonn sanglem.

¹⁰Paulun uloum-ieta mhonn razpalan khunna keli tedna, tannem mhonn’lem: “Khup vorsam thaun hea raxttracher mon’subidaracho odhikar tum choloit ailai mhonn hanv zannom, dekhun tujê mukhar visvasan mhozo khottlo manddtam.

¹¹Bara dis zaunk nant, Devak bhozunk hanv Jeruzaleak gel’lom, ani Devmondirant vô devsthan-amnim vô Xarant konnachêch kodde vad-vivad kortana vô lokak khubdaitana hanv tankam sampddonk na: hem sogott tujean ruzu korum-ieta.

¹³Mhojer atam thaptat team guneanvanche legun tuka purave diunk te xokonant.

¹⁴Punn ek mat khorem mhaka sangchem asa: Xastracher virodhi pôkx mhonn te sangtat tê Vattecho pattlav korun amcheam purvozanchea Devak hanv bhôztam. Somurtint ani provadean-cheam pustokamnim boroun dovorlelem asa tem sogllem hanv sotman’tam.

¹⁵Ani boream toxench vaitt mon’xanchem punorjivontponn astelem mhonn tanchê bhaxen hanv Devacher bhorvanso dovortam.

¹⁶Hea pasot Deva ani mon’xam mukhar sodanch nitoll ontoskornnan bhonvunk hanv bharim vavurtam.

¹⁷Atam khup vorsamnim mhojê porjek danam diunk ani iôdn bhettounk hanv ail’lom.

¹⁸Hench hanv kortalom tedna, hanv tankam Devmondirant mell’lom; mhoji xud’dhi hanvem kel’li; mhojê bhonvtim konn lôk naslo ani kosloch gollbôll zaunk naslo.

¹⁹Aziechea prantantle kãi Judev thõi asle. Tankam mhojer kitem-i aslem zalear, tech hanga tujê mukhar mhojer arôp ghalunk asche asle.

²⁰Hanv Mha-Dhormsobhê mukhar aslom tedna, mhojê vixim koslo guneanv tankam mell’la zalear, hanga hajir asat tãnnim sangchem.

²¹Tanchê modem aslom tedna, bob marun hem mat hanvem mhonn’lem dekhun zalear: ‘Mel’lim mon’xam punorjivont zatelim mhonn hanv sotman’tam dekhun, az tumi mhoji nit kortat.’ “

²²Feliksak hê novê Vattechi ekdom’ bori ollokh asli; tannem aikunchem fuddem vhelem ani mhonn’lem: “Lixias sordar hanga ietôch, hanv tumcho khottlo topastolom.”

²³Pauluk bondkhonnint dovorcho, punn ili sot’tea taka diunchi ani tacheam ixttantlea konnakuch tachi seva korunk addauncho nhoi mhonn Feliksan xotpotik hukum’ ghalo.

²⁴Thoddeam disam uprant, Feliks aplê bailê Druxil’lachea sangata ailo. Ti êk Judêv bail asli. Tannem Pauluk apounk lailo ani Jezu Kristacher bhavarta vixim Paulu uloilo tem tannem aikolem.

²⁵Punn promannik jivitachi chal, apdomavnni ani ieunchi asa ti zhôddti, hanchê vixim Paulu sangtalo tem aikun, Feliks bhielo. Tannem mhonn’lem: “Borem, sod’deak puro, tujean vochum-ieta; mhaka borem dista tedna, hanv tuka novean apounk dhaddtolom.”

²⁶Teach borabôr, Paulu apnnak duddu-i ditolo mhonn to ravtalo ani heach khatir sobar pavtti to taka apounk dhaddtalo ani tachê lagim gozal kortalo.

²⁷Don vorsam somplea uprant, Feliksachê svater Porxius Festus ailo. Judevank manunk sôdtalo dekhun, tannem Pauluk bondkhonnintuch dovorlo.