Read Goan Konkani AI 25 Bible Online

AI 25 - Goan Konkani bible

AI 25

¹Prantant pavtôch tin disam uprant, Festus Xezareiak thaun Jeruzaleak choddun gelo.

²Thõi mukhel iadnik ani Judevanche fuddari Paulucher add apli firiad gheun aile.

³Pauluk Jeruzaleak dhaddun diun apnnank upkar kôr mhonn tãnnim Festusa lagim maglem. Khorem mhollear, ghatkeponnim vatteruch te tacho jiv kaddunk sôdtale.

⁴Festusan oso zobab dilo: “Pauluk Xezareiak koidi koso dovrunk zai ani hanvuch thoddeam disamnim thõi portun vetolom.

⁵Tumcheam fuddareank mhojê-xim ieum-di ani tea mon’xacho koslo guneanv asa zalear, tãnnim arôp manddcho.”

⁶Tanchê modem Festusan anink atth vô dha dis sarle ani uprant to Xezareiak gelo. Dusrea disa to neaisobhent aplê sodrer boslo ani Pauluk bhitôr haddunk lailo.

⁷Paulu pavlo tedna, Jeruzaleak thaun ail’leam Judevamnim taka veddho ghalo ani te tacher sobar gombhir guneanv thapunk lagle, punn heam guneanvanche tanchean purave diunk zaunk na.

⁸Tedna apli rakhônn korunk Paulun mhonn’lem: “Judevanchê Somurticher, Devmondiracher vô Somrazacher koslich chuk hanvem korunk na.”

⁹Festus Judevank manunk sôdtalo dekhun, tannem Pauluk mhonn’lem: “Hanvem heam aropam vixim tuji nit korunk Jeruzaleak vechi tuka khuxi asa?”

¹⁰Punn Paulun zobab dilo: “Somrazachea fuddeant hanv ubo ravtam, thõi ki mhoji nit zaunk zai. Judevank hanvem koslench vaitt korunk na mhonn tum boro zannoi.

¹¹Hanv khoro guneanvkar zalear, vô moronn favo toslo koslo-i oprad hanvem kela zalear, hanv morunk pattim sorona. Mhojer thaptat team aropamnim sot na zalear, fokot tankam man’chê pasot konnacheanuch mhaka tanchê adhin korum nozo. Hanv Somrazacho nirnnoi magtam.”

¹²Tedna, apleam budhvon-tanchê monddolli lagim gozal kortôch, Festusan zobab dilo: “Tunvem Somrazacho nirnnoi maglai, tôr Somraza fuddeant tum ubo ravtoloi.”

¹³Thoddeam disam uprant, Festusak bhett korunk Agripa raza ani Bernis Xezareiak ailim.

¹⁴Tim hanga zaite dis ravlim ani Festusan Paulucho proxn raza fuddean ghalun oxem mhonn’lem: “Hanga Feliksan koidi korun dovorlolo êk monis asa.

¹⁵Hanv Jeruzaleak aslom tedna, Judevancheam mukhel iadnikamnim ani zannteamnim tacher arop ghale ani kheastichem formonn mar mhonn mhojê lagim maglem.

¹⁶Guneanvkar ani aropi ekamekak mell’lea bogor ani zacher guneanv thaptat te xid’d korunk guneanvkarak sondhi dilea bogor, taka khastichem formonn diunk Romkaram modem sonvoi na mhonn hanvem tankam sanglem.

¹⁷Mhonntôch, te hanga mhojê boglek aile ani, vêll ibaddinastana, dusrea disa neaisodrer bosun hanvem tea mon’xak bhitôr haddunk lailo.

¹⁸Tacheam aropeamnim taka veddho ghalo, punn hanv ravtalom tosle arop tãnnim tacher thapunk nant.

¹⁹Punn tanchea dhorma vixim ani Jezu mhonnlelea konn-eklea mel’lea vixim tachê kodde tanchi huzôt zali, kiteak ho Jezu jivo asa mhonn Paulu khatren sangtalo.

²⁰Ho tontto koso suttavo korcho to nokllo zaun, hê vixim Jeruzaleak vochun thõi nit korun gheunchi khuxi asa gai mhonn hanvem Paulu kodde vicharlem.

²¹Punn bhovxrêxtt Somrazan apnna vixim choukoxi korun nirnnoi diuncho mhonn Paulun maglem dekhun, taka Somraza-xim dhaddi-sôr bondkhonnint dovrunk hanvem formailem.”

²²Agripan Festusak mhonn’lem: “Hea mon’xak aikunk mhaka-i khuxi asli.” Festusan zobab dilo: “Tum taka faleam aikotoloi.”

²³Tôr dusrea disa Agripa ani Bernis vhodda dobajean ailim ani, sordaram ani nogracheam mukhel mon’xam borabôr, neaisobhent bhitôr sorlim. Festusan Pauluk bhitôr haddunk lailo

²⁴ani mhonn’lem: “Agripa Raza, ani soglleam amchê borabôr asleleamnô, tumi hanga polletat tea mon’xa vixim Jeruzaleak toxem hangasôr-ui Judevanchi porza firiad gheun mhojê-xim aili. Taka anink jivo dovrunk favonam mhonn tãnnim huieli marun maglem.

²⁵Punn mornnachem formonn favo toslem tannem kel’lem kãi ek mhaka mellunk na. Punn bhovxrêxtt Somraza mukhar apli nit zaunchi mhonn tannem maglem dekhun, hanvem taka Somraza-xim dhaddun diunk ievjilem.

²⁶Tachê vixim sarkem kitem-kat amchea bhovxrêxtt Dhoniak borounchem mhollear mhaka kãich na: hea pasot hanvem taka tumchê mukhar ani kheritponnim, Agripa Raza, tujê fuddean haddla; tachi choukoxi kelea uprant, mhaka kitem-i tori borounk melltelem mhonn hanv ravtam.

²⁷Eka koideacher arop ghaltat te dakhoinastana taka dhaddun divop, hem ginean-naslelea mon’xachem kam’ mhonn mhaka dista.”