Read Goan Konkani AI 26 Bible Online

AI 26 - Goan Konkani bible

AI 26

¹Agripan Pauluk mhonn’lem: “Tuji rakhônn korunk tujean atam uloum-ieta.” Tedna, aplo hat soddun, Paulu apnna khatir ulounk laglo:

²“Judev mhojer arop ghaltat tancher add az tujê mukhar, Agripa Raza, mhoji rakhônn korunk mhaka darzonnem mhonn hanv somzotam.

³Kiteak Judevancheô chali ani tanche vad-vivad tum ekdom’ boro ollkhotai; tea pasot sosnnikaien mhojem aikun ghe mhonn hanv tujê lagim prarthun magtam.

⁴Bhurgeponnar thaun mhojem jivit koslem zalem tem, ani survatek thaun mhojea khaxa loka modem ani uprant Jeruzaleant hanv koso jielom tem, soglle Judev bore zannont.

⁵Zaitim vorsam porian tãnnim mhaka ollkhola ani amchea dhormachea soglleam poros odik khôr pokxa pormannem êk Farizêv koso hanv jielom mhonn tanchean govai diunk zata.

⁶Devan amcheam purvozank kel’lê bhasavnnecher hanvem bhorvanso dovorlo dekhun, hanv hanga zhôddtek ubo asam. Amchim bara kullam, hi bhasavnni xarti pavtoli mhonn bhorvanso dhorun, sogllê fikirin dis-rat Devak bhôztat. Bhovxrêxtt Raza, hea bhorvanxea pasot Judev mhojer arop ghaltat!

⁸Mel’leank Dev punorjivont korta, hem koxêch bhaxen sotmanunk zaina mhonn kiteak dista tumkam?

⁹Nazaretkara Jezuchea nanvacher add zata titlem zhuzunk mhozo kaido mhonn hanv ekdam somzotalom.

¹⁰Jeruzaleant astana hench hanvem kelam. Mukhel iadnikancho hukum’ gheun hanvem zaiteam bhoktank bondkhonnint ghaleant ani, tancher mornnachem formonn martale tedna, hanvem tancher virudh mot dilam.

¹¹Toxench khup pavtti soglleam devsthanamnim gelam ani, tankam piddapidd diun, Jezucher dovortalim to bhavart soddunk hanvem tankam boll kelam. Tancher mhozo rag itlo pettlolo ki porkeam nogramnim porian hanv tancheam pallank laglolom.

¹²Oso êk pavtt mukhel iadnikancho odhikar ani rojea gheun, hanv Damaskak vetalom.

¹³Ani don’parchea vellar, hanv mhojê vatten choltanam, Bhovxrêxtt Raza, suria poros loklokit sorgar thaun êk uzvadd hanvem pollelo; mhojê ani mhojeam sangateanchê bhonvtonnim to jhigjhiglo.

¹⁴Ami soglle zomnir xevttoleanv; tedna hanvem êk tallo aikolo, to mhojê kodde Hebrêv bhaxen oxem uloilo: “Saulu, Saulu, kiteak mhonn tum Mhaka piddapidd ditai? Eka kantteacher khôntt marun tunch dukhovtai.”

¹⁵Hanvem vicharlem: ‘Tum konn Saiba?’ Somian zobab dilo: ‘Hanv Jezu, ani Mhakach tum piddapidd ditai.

¹⁶Punn utth atam ani tujeam pãiancher ubo rav! Hea dorxonant tunvem Mhaka pollelai ani fuddleam-i dorxonamnim tum Mhaka polletoloi, tôr Mhozo sevôk ani sakxidar tuka nemchê khatir, Hanv tuka dixtti poddlam.

¹⁷Tujech porjecheam hatantlo ani videxeancheam hatantlo Hanv tuka vattaitolom ani heanch raxttram-xim Hanv tuka dhaddunk vetam:

¹⁸kallokantlim bhair sorun tim uzvaddak ieunchim ani Soitanachea rajeantlim sutton Deva-xim portun ieunchim mhonn, tanche dolle ugddunk Hanv tuka dhaddtam: Mhojer bhavart dovrun ki tim apleam patkanchem bhogsonnem ghetelim ani bhoktanchem daiz bhogunk pavtelim.’

¹⁹Mhonntôch, Agripa Raza, hea sorginchea dorxonak pallo dinastana mhojean ravunk zaina zalem.

²⁰Hea pasot, poilim Damaskachea lokak, uprant Jeruzaleant ravteleank ani Judeiachea akhea prantachea lokak, ani toxench videxeank hanv ho sondêx porgottunk laglom. Tãnnim jivit-mon bodôlchem ani Deva-xim portun ieunchem ani bodôl’lelea jivitachim purtim kamam korchim mhonn hanv tankam updês ditalom.

²¹Hea pasot Judevamnim mhaka Devmondirant dhôrlo ani te mhozo jiv kaddunk sôdtale.

²²Punn Devacho adar mhaka favo zal’lean, aiz porian lhanank toxem vhoddank hanv sakxi diit asam ani provadeamnim ani khud Moizesan ghòddtelem mhonn sanglam, tachê bhair hanv kãich sanginam:

²³mhonngê Krist koxtt sôscho aslo ani, mel’leantlo soglleam-vôn poilo punorjivont zaun, amchê porjek ani videxi raxttrank-ui uzvadd fanklo mhonn to porgott korcho aslo.”

²⁴Oxi Paulu apli rakhônn kortana, Festusan vhoddlean mhonn’lem: “Paulu, tum piso zalai. Chôdd xiklai mhonn tuji môt firlea.”

²⁵Paulun zobab dilo: “Bhovxrêxtt Festusa, hanv piso zaunk na, punn sot tem uloitam, ok’kol aslim utram mhojim.

²⁶Kiteak raza heô vostu boro zanno ani dekhun sogllea visvasan hanv tachê lagim uloitam; hantlem kitench taka liplelem na mhonn mhaka khatri asa, kiteak heô vostu khõichea eka konnxeak ghoddonk nant.

²⁷Agripa Raza, provadeancher tum bhavart dovortai? Tum dovortai mhonn hanv zannom.”

²⁸Agripan Pauluk mhonn’lem: “Thoddea bhitôr tum mhaka Kristanv kortoloi mhonn dista tuka?” Paulun zobab dilo:

²⁹“Thoddea bhitôr mhonn vô chodda bhitôr mhonn, tukach nhoi, tôr aiz mhaka aikoteleam soglleank Dev mhojê sarkim korum; punn mhojeô sanklli mat konnak sõsunk poddcheô nhoi!”

³⁰Tedna raza, razpal ani Bernis, ani tanchê borabôr bosun aslim tim utthlim.

³¹Ani kuxin sorun, apnnam modem tim oxem ulounk laglim: “Moronn vô bondkhônn favo zaunk hea mon’xan kãich korunk na.”

³²Agripan Festusak mhonn’lem: “Hea mon’xan Somrazak ulo marunk naslo zalear, taka soddum-ietalo.”