Read Goan Konkani AI 27 Bible Online

AI 27 - Goan Konkani bible

AI 27

¹Tarvar bosun ami Italiek vechem mhonn tharav zatôch, Pauluk ani ieram thoddeam koidiank Juliusachê adhin kele. “Somrazachi Polttonn” mhonnlelê polttonnecho ho xotpoti aslo.

²Adramitiuma thaun ail’lea tarvar ami choddleanv ani vattek lagleanv; hem tarum Aziechea prantacheam bondrank lagchem aslem. Amchê borabôr Tesalonikecho Maxed-oniekar Aristark aslo.

³Dusrea disa ami Sidonak pavleanv. Juliusan Pauluk moipas dakhoilo ani apleam ixttank mellunk vochunk ani tanchi seva-chakri gheunk tannem Pauluk rojea dili.

⁴Thõiche bhair sortôch, amcher virudh varo martalo dekhun, ami Xiprusachê asro-ditolê kinarê vatten fuddem geleanv;

⁵tea uprant, Xilixia ani Pamfilia heam prantanchê kinarê bhailea doriantlean vochun, Lixiechea prantachea Mirak ami pavleanv.

⁶Thõi ek Aleksandriechem tarum xotpotik gavlem, tem Italiek vetalem; tantum amkam tannem choddoile.

⁷Khup dis amchem tarum bhov sovkas chol’lem ani oxem Knidusachea bondra samkar porian pavunk amkam kotthin zalem. Varo amkam fuddem vochunk dinaslo dekhun, Salmona samkar pavtôch ami Kretachi asro-dito kinari dhorun fuddem chol’leanv,

⁸ani vhoddê avghoddaien kinari dhorunuch Laxeia nogra-xim Surokxit Bondram mhonnlelea zagear ami pavleanv.

⁹Oxem amcho khup vêll ibaddon gel’lo, ani tarvar bosun poinn korop hea kallar surokxit nhoi aslem, kiteak patkanchem bhogsonnem mellchê khatir bhettoil’lo Judevancho upas porian bollandlolo: voros itlem fuddem pavlelem. Hea pasot Paulun tankam oxe xiddkaile:

¹⁰“Ixttamnô, hem poinn atam amkam chodd sonkoxttachem mhonn hanv polletam; amchea samonnak ani amchea tarvakuch nhoi, punn amchea jivak porian mottem nuksann zatelem.”

¹¹Punn xotpotin Pauluchê xiddkavnnê poros kopitacher ani tarvacher odik visvas dovorlo.

¹²Ani hinvallo sarunk tem bondir upkaronaslem dekhun, Feniksak hinvallo kaddunk zatolem mhonn bhorvanso dhorun, fuddem vechem mhonn chôdd lokachem mot zalem. Feniks bondir Kretachê dokhinn-ostomtek ani ut’tôr-ostomtek fuddo korun aslem.

¹³Oxem dokhinnechem xitoll varem suttlem tedna, apli ievzônn xarti pavtolich mhonn somzun, nangor uklun tãnnim tarum sôddlem ani tem Kretachê kinarê kuxik vochunk laglem.

¹⁴Punn rokddem tea zunveantlean “Ut’tôr-Udenticho Varo” nanvachem ek mottem vadoll suttlem.

¹⁵Tarum vadollak sampoddlem, ani oslea vareak amchean fuddo korunk zaina zaun, tarum ami vadollak soddun dilem, ani varean amkam lottun vhelim.

¹⁶Kauda mhonnlelea eka dhakttea zunveachê kuxik ami dhanvleanv ani kotthin proitn korun tarvacho ponêll ghôtt dhorunk ami pavleanv.

¹⁷To tãnnim tarvacher voir kaddlo ani tarva bhonvtonnim razu ghott bandle. Libiê samkar renvecheam battiamnim tarum rombon xirkon urot mhonn te bhiele ani xiddam denvoun tãnnim tarvak varean lotton vochunk dilem.

¹⁸Tufan tarvak itlea bollan lottun vhortalem dekhun, tantlem thoddem samon doriant uddoilem ani

¹⁹tisrea disa apleanch hatamnim tarvachim thoddim autam legun doriant uddoilim.

²⁰Zaite dis porian suria ani noketram dixtti poddonaslim ani varem têch khoraien martalem; xekim jivim urpacho sogllo bhorvanso ami sôddlo.

²¹Zaite dis porian tãnnim kãich jevunk-khaunk na; tedna tanchê modem ubo ravun, Paulun mhonn’lem: “Ixttamnô, tumi khorench mhojem aikunk zai aslem ani Kreta thaun tarum soddunk favo naslem. Oxem ho sogllo sonkoxtt ani nuksann tumchean vattaunk zatalem.

²²Punn zalem tem zalem, atam hanv tumkam sangtam tem aikat, kalliz soddum nakat. Tumchê modlea konnacheach jivacho ibadd zauncho na, punn fokot tarvacho.

²³Jea Devacho hanv bhôkt ani Zachi hanv seva kortam, Tachea dutan kal rati mhaka dixtti poddun sanglem:

²⁴“Paulu, bhienaka, Somraza fuddean tum ubo ravunk zai. Tujê borabôr poinn kortoleam soglleancho jiv Devan tujê pasot vhoddê korunnaien samball’la.’

²⁵Tôr, ixttamnô, kalliz ghott dhôrat, mhaka sanglam toxem zatelem mhonn mhaka Devacher bhavart asa.

²⁶Punn ami eka zunvear poddche asanv.”

²⁷Chovdavê rati hevtten-tevtten ami Adriatik doriant lottot asleanv tedna, sumar modianir eka ganvak apunn lagim pavtat mhonn tarvotteank dubhav poddlo.

²⁸Tãnnim kholaiecho tthav ghetlo ani sumar sat’tis metr mell’le; ile fuddem vetôch, novean tthav gheun sumar otth’tthavis metr mell’le.

²⁹Ami êkê khoddpi kinarer vochun poddunk asanv mhonn bhieun, tãnnim tarvachê pattlê vatten char nangor sôddle ani dis vegim uzvaddum mhonn te axetale.

³⁰Jedna tarvotti, tarvachê fuddlê vatten nangor ghaltat mhonn nib diun, tarvacho ponêll denvoun pollun vochunk sôdtale, tedna

³¹Paulun xotpotik ani tacheam soinikank sanglem: “He monis tarvar ravonant zalear, tumi vattavonchech nant.”

³²Tedna soinikamnim ponellachim doram katorlim ani ponêll poddunk sôddlo.

³³Jhenzunttear, soglleamnim kitem-i khaunchem mhonn Paulun oxem prarthun maglem: “Chovda dis legun tumi zagrut ravleat, kãich khainastana tumi upas kela.

³⁴Hea pasot hanv tumchê lagim magtam, tumi kitem-i tori jevat, kiteak tem tumche jiv vanchounk gorjechem. Konnachêch toklecho êk kens porian ibadd zauncho na.”

³⁵Hem mhonnun, tannem unddo ghetlo, soglleam hujir Devak dhin’vaslo ani to moddun to khaunk laglo.

³⁶Tankam boll mell’lem ani te-i jevunk lagle.

³⁷Tea tarvar soglleank dhorun ami don’xim xeastôr lôk asleanv.

³⁸Zai titlem jevlea uprant, gonv doriant uddoun tem tarum tãnnim hollu kelem.

³⁹Dis uzvaddtôch to ganv khoincho to tãnnim ollkhunk na, punn vêll asleli doriachi êk khaddi tankam dixtti poddli.

⁴⁰Ani thõi ghòddta zalear tarum toddik kaddunk tãnnim ievjilem. Tea khatir tãnnim nangor doriant soddun dile, teach borabôr vereanchim doram sôddlim. Magir mukhailem xidd vareak voir kaddun tarum kinarechê vattek lailem.

⁴¹Punn tarum renvechê êkê battient romblem ani zomnik laglem. Tarvacho fuddlo bhag ghôtt rombon halona zalo, punn futt’to lharamnim boddovon-boddovon tacho pattlo bhag mòddlo.

⁴²Koidi penvun pollun vochtit mhonn soinikamnim tankam jivexim marunk ievjilem.

⁴³Punn xotpoti Paulucho jiv samballunk sôdtalo dekhun, tanem tankam addaile. Penvunk zata tãnnim poili doriant uddki marchi ani thoddik vechem mhonn tannem hukum’ ghalo.

⁴⁴Punn urleleam konn-konn mòddlelea tarvacheam veg-veglleam kuddkeancher bosun toddik vechim mhonn tannem formailem; hê porim sogllim solamoti toddik pavlim.