Read Goan Konkani AI 28 Bible Online

AI 28 - Goan Konkani bible

AI 28

¹Ami surokxit suttlea uprant hea zunveachem nanv Malta mhonn amkam gomun ailem.

²Tea ganvchea lokan amkam khup moipas dakhoilo. Paus poddtalo ani hinv khatalem dekhun, tãnnim ek agttem pettoilem ani tachê bhonvtonnim amkam soglleank soniman kelo.

³Paulun xirputtanchi êk bhori haddun ujeant ghaltalo tedna, gormek lagun tantlem ek furxem bhair sorlem ani tachea hatak chablem.

⁴Tachea hata thaun tem jivannem umkolltalem tem polleun, tea ganvcheam mon’xamnim ekamekak mhonn’lem: “Khorench, ho monis êk khuni; to doriantlo suttlo khoro, tori Devachi nit taka jieunk dina.”

⁵Punn tannem tem ujeant fafuddlem ani taka kãich vaitt zaunk na.

⁶To suztolo vô ovchit bhi poddun mortolo mhonn tim somzotalim. Punn zaito vêll ravlea uprant ani taka kãich vaitt zaina tem polleun, tãnnim aplem mot bodôl’lem ani to êk dêv mhonn tim sangunk laglim.

⁷Thõi laginch tea zunveachea odhikariachim bhattam-vit’tam aslim. Tachem nanv Publius. Tannem amkam soniman kelo ani tin dis porian ixttagotin amcho poramôs kelo.

⁸Publiusacho bapui zoran foddfoddtalo ani taka rogtachim bhairam zatalim. Paulun taka bhett keli ani magnnem korun tacher hat dovorle ani taka boro kelo.

⁹Tea uprant tea zunveachim sogllim piddevontam ailim ani tim borim zalim.

¹⁰Tea lokan amkam zaiteam bhasamnim man dakhoilo ani tarvan provas korchea vellar goroz teô vostu tãnnim amkam dileô.

¹¹Tin mhoineam uprant, ami eka tarvar choddleanv; hem tarum tea zunvear hinvallo sartalem; tem Aleksandriechem aslem ani tacher asli “Zonvlleam Devanchi” khunna.

¹²Ami Sirakusak thambleanv ani tin dis thõi ravleanv.

¹³Uprant, kinarê bhonvtonnim vochun, ami Rejiumak pavleanv; eka disa uprant dokhinnchem varem marlem ani don disamnim ami Puteolisak pavleanv.

¹⁴Hanga amkam amchim thoddim bhavbhoinn mell’lim ani apnnanchea sangata sat dis ravunk amchê lagim maglem. Xekim ami Romak pauleanv

¹⁵Thõi amcheam bhavam-bhoinnink amchi khobor mell’li ani tim Ap’piusacho Bazar ani Tin Khannavolli hanga porian amkam mellunk ailim. Tankam polleun Paulun Devak dhinvasun dhir ghetlo.

¹⁶Ami Romak pavtôch eka khasgi ghorant ravunk Pauluk rojia mell’li ani taka rakhunk êk soinik dovorlo.

¹⁷Tin disam uprant, tannem Judevancheam fuddareank apoile. Te ektthãi zatôch tannem tankam mhonn’lem: “Bhavamnô, amchea lokacher ani amcheam purvozancheam chalim-ritincher add hanvem kãich korunk na, tori Jeruzaleant mhaka koidi kelo ani Romkaranchea hatant ghalo.

¹⁸Tãnnim mhoji choukoxi kortôch mhojer mornnachem formonn marunk mhojê sovem tankam kãich mellunk na dekhun, te mhaka soddunk sôdtale.

¹⁹Punn Judevamnim ozun virôdh kelo; dekhun, zori mhojê porjecher add mhojem koslench garannem naslem, tori hanvem mhoji zhôddti korunk Somrazak ulo marcho poddlo.

²⁰Ani heach pasot tumkam polleunk ani tumchê kodde ili-xi gozal mhaka korunk diat mhonn hanvem maglem, kiteak Israelachea bhorvanxeak lagun heam sankllimnim hanv bandlolo asam.”

²¹Tãnnim taka zobab dilo: “Judeiak thaun tujê vixim amkam koslinch potram ieunk nant ani amcheam bhavam-bhoinnim modlea konnench thõi thaun hanga ieun tujê vixim kosloch vaitt nirôp haddunk na vô koslich vaitt gozal amkam sangunk na.

²²Toripunn tujea monant asa titlem-i amkam sang: tem tujê koddchem ami aikunk axetanv, kiteak hea pokxacher veta thõi virôdh asa, hem ami zannonv.”

²³Tedna tãnnim êk dis tharailo and Paulu ravtalo tea ghorant zaitim zannam taka mellunk ailim. Tanchê kodde uloun, tannem Devachea Rajeak sakxi dili ani Moizesachê Somurtint ani provadeancheam pustokancher jem Jezu vixim boroil’lem asa, tachi to sokallim thaun sanjê porian tankam khatri diunk proitn korit ravlo.

²⁴To sangtalo tem thoddeamnim mandun ghetlem, punn heramnim tem mandun gheunk na.

²⁵Tanchê modem ek mot zaunk na; dekhun, tim bhair sortana, Paulun tankam hem nimannem utor sanglem: “Izaias provadea vorvim Povitr Atmean tumcheam purvozank sangleant tim utram khorench sarkim asat:

²⁶‘Hê porjê-xim voch ani tankam sang: Aikat, aikot ravat, punn tumkam kãi somzochem na; polleiat, polleit ravat, punn tumkam kãich dixtti poddchem na. Hê porjechem kalliz nibor zalam.

²⁷Dolleamnim tankam disona zaunk, kanamnim tankam sarkem aikona zaunk, monan tankam somzo iena zaunk, ani tim Mhojê-xim portun ieun Hanvem tankam borim korina zaunk, tanche kan bhere zaleat, tãnnim aple dolle ghott dhampleat.’

²⁸Mhonntôch hem zanno zaiat: Aplea taronnacho nirôp Devan videxeank dhaddla. Tim to aikotolim.”[7]

³⁰Don akhim vorsam Paulu bhaddeachea ghorant ravlo, apnnak mellunk ietalim titleank-ui to borê bhaxen ghetalo ani

³¹kalljidarponnan ani koslich addkhôll nastana Devachem Raj porgôtt’talo ani Somia Jezu Krista vixim xikovnn ditalo.