Read Goan Konkani AI 3 Bible Online

AI 3 - Goan Konkani bible

AI 3

¹Ekdam Pedru ani Juanv sanjecheam tin voranchea prarthonak Devmondirant vetale.

²Tedna eka mon’xak ubarun vhortalim. To zolma thaun opangull aslo; ani Devmondirant bhitôr sortoleam lagim tannem bhik magchê khatir, Devmondirachea Sundôr mhonnlelea Darvonttea sorxim dispottim taka dovortalim.

³Pedru ani Juanv Devmondirant bhitôr sortat tem polleun tannem tanchê lagim bhik magli. Pedrun ani Juanvan tacher dolle laile ani Pedrun taka mhonn’lem:

⁴“Amkam polle.” Apnnak tanchem kitem-i tori melltelem mhonn chintun, to axen tanchê vatten polleunk laglo.

⁵Punn Pedrun mhonn’lem: “Mhojê lagim rupem na, bhangar-ui na,

⁶punn jem kitem mhojê lagim asa tem hanv tuka ditam: Nazaretkar Jezu Kristachea nanvan utth ani cholunk lag.”

⁷Tedna Pedrun tachea uzvea hatak dhorun taka ubo kelo. Thõichê-thõich tacheam pãiank ani khubeank ghottai mell’li;

⁸uddi marun to ubo ravlo ani cholunk laglo; ani cholot ani uddiô marit ani Devak vakhannit to tanchê borabôr Devmondirant bhitôr sorlo.

⁹To cholta ani Devak vakhannta mhonn soglleamnim pollelem.

¹⁰Devmondi-rachea Sundôr Darvonttea sorxem bosun bhik magi to hoch mhonn tãnnim taka ollkholo ani tea mon’xak ghòddlem tê vixim tim ojapun tthottaklim.

¹¹To monis Pedruchi ani Juanvachi patt sôddinaslo; itlea mhonnosôr, Solomanvacho Darvontto mhonnlelea zagear sogllo lôk ojap zaun, dhanvun-dhanvun ailo.

¹²Lokak polleun Pedru oso uloilo: “Israel-porjecheam bhavam-bhoinnimnô, tumi hachê vixim kiteak mhonn ojap zatat vô kiteak mhonn amcher dolle lavunuch asat? Ami amchê khaxa podven vô bhoktiponnan hea mon’xak cholunk xokti dilea kitem?

¹³Amcheam purvozam, Abrahamachea, Izakachea ani Jakobachea Devan, Aplea sevoka Jezuk mhoimevont kelo; tumi Taka mon’subidarachê adhin kelo ani, Pilatan Taka soddunk tharail’lem tedna, tachêch mukhar, Jezu apnnank naka mhonn tumi sanglem.

¹⁴Jezu bhoktivont ani Promannik aslo, tori To tumkam naka zalo; eka khuniak mafi diun soddouncho mhonn tumi apnnank upkar maglo, punn Jivit-Datarak tumi jivexim marlo.

¹⁵Tori Devan Taka mel’leantlo punorjivont kelo ani hache ami govai.

¹⁶Tumi hanga hea mon’xak polletat ani taka boro ollkhotat. Tôr Jezuchea Nanvan, Tacher ami bhavart dovorlo dekhun, hea mon’xak ghottai dili; Tacher tthevlolea bhavartan ki hea mon’xak sarko boro kelo mhonn tumi sogllim polletat.

¹⁷Punn hanv zannom, bhavam-bhoinnimnô, jem tumi kelam, tem tumi ani tumcheam fuddareamnim nennarponnan kelam.

¹⁸Punn Aplea Kristan koxtt- dogd bhogunk zai mhonn soglleam provadeam vorvim jem Devan adim sanglelem, tem Tannem hê bhaxen xarti pavoilem.

¹⁹Mhonntôch, jivit -mon bodlun tumi Deva sorxim portun ieiat; hê porim tumcheam patkanchem bhogsonnem tumkam melltelem

²⁰ani Sorvespora koddsun tumkam xanti-somadhanacho kall ietolo. Tedna Apnnem tumchê khatir nemlelea Kristak, mhonngê Jezuk, To tumchê-xim pattoitolo;

²¹kiteak Apleam bhoktivont provadeamchê tonddim Devan orombak thaun porgott kela to soglleam vostunchê novsornnecho kall ie porian Jezu sorgar asunk zai.

²²Moizesan tôr oxem sanglam: ‘Tumcheam bhavam-bhoinnim modlo mhojê sarko êk provadi Sorvespor Dev tumchê khatir upzoitolo; to sangit titlem-i tumi chitan aikunchem.

²³Jim konn tea provadeak aikonant, tankam porjentlim bhairaunchim.’

²⁴Khorench, Samuela thaun suru korun je soglle provadi uloun geleat, tãnnim heam disanchi khobor sangun dovorlea.

²⁵Team provadeamchim tumich tim bhurgim ani Devan amcheam purvozam kodde kel’lea korarachim daiji. Kiteak Abrahamak Devan oxem mhonn’lem: ‘Tujê sonsti vorvim prithumecheam soglleam kuttumbank axirvad melltolo.’

²⁶Tôr tumchea khotteponnantlim soddoun, tumkam soglleank axirvad diunk, Devan Aplea Sevokak punorjivont korun poilo tumchê-xim dhaddlo.”