Read Goan Konkani AI 4 Bible Online

AI 4 - Goan Konkani bible

AI 4

¹Pedru ani Juanv loka lagim uloitat thõich astana, iadnik ani Devmondiracho karbhari ani Saduki tanchê-xim aile.

²He apostl lokak xikoitale ani mel’leantlo punorjivont zal’lea Jezu vorvim sogllim punorjivont zatelim mhonn te porgôtt’tale dekhun, tankam borench vaitt dislem.

³Tãnnim tankam dhôrle ani, sanz zali mhonn, dusrea disa porian tankam bond-khonnint dovorle.

⁴Punn tanchem utor aikol’lem tantleam zaiteam zannamnim bhavart dhôrlo ani dadleanchoch ank sumar panch hozarancher pavlo.

⁵Dusrea disa Judevanche fuddari, zannte ani xastri Jeruzaleant zomle ani tanchê borabôr porom’-iadnik An’nas, Kaifas, Juanv, Aleksandr ani porom’-iadnikanchea ghoranneantle soglle.

⁷Apostlank modem ube korun, tãnnim vicharlem: “Konnachê podven vô konnachea nanvan tumi hem kelam?”

⁸Tedna, Povitr Atmean bhoron, Pedrun tankam mhonn’lem: “Porjecheam fuddareamnô ani zantteamnô!

⁹Eka piddevonta thãi ami êk doiall kornni keli mhonn tumi az amchi zhôddti kortat ani to konnachê podven boro zalo tem tumi zanno zaunk sôdtat.

¹⁰Tôr soglle tumi ani Israelache akhe porje, hem zanno zaunchem: tumi khursar marlo punn Devan mel’leantlo punorjivont kelo tea Nazaretkar Jezu Kristachea nanvan ani Tachêch podven ho monis hanga tumchê mukhar boro zaun ubo asa.

¹¹Tumi bandpeamnim soddun dil’lo fatôr To, punn atam khorem mhonn’lear Taka Devan konnxea-sondhicho fatôr kela.

¹²Ani dusrea konnachêch vorvim soddvonn mellunk xokona, kiteak amkam soddvonn diunk xokta toslem anink dusrem nanv mollba khala Devan mon’xank diunk na!”

¹³Pedruchem ani Juanvachem kalljidarponn polleun sobheche vangddi ojap zatale, kiteak te oxikxit ani chalte monis mhonn te somzotale; punn te Jezu borabôr astale mhonn tankam khobor asli.

¹⁴Punn boro kel’lea ani tanchê modem ubo aslelea mon’xak polleun tanchean kãich add sangunk zainaslem.

¹⁵Tãnnim tankam Mha-Dhorm-sobhentle bhair ravunk hukum’ ghalo ani magir te apnnam modem oxi bhasabhas korunk lagle:

¹⁶“Heam mon’xank ami kitem korum-ia? Tanchê vorvim ghòddlam tem mottem vismit Jeruzaleant ravteleam soglleank kollit zalam ani amchean tem na mhonnunk zaina.

¹⁷Punn hi khobor loka modem anink ximpoddnam zaunchê khatir, hea nanvan konnakuch anink uloina zaunk ami tankam dhomkavnni dium-ia.”

¹⁸Tankam bhitôr apoun, Jezuchea Nanvan koxêch bhaxen anink uloina zaunk ani xikovnn dinam zaunk tãnnim tankam formailem.

¹⁹Punn Pedrun ani Juanvan porti-pallun mhonn’lem: “Tumkam aikun Devak aikonam zaunk, hem Devacheam dolleam mukhar sarkem zalear tumich nirnnoi diat.

²⁰Ami kitem dekhlam ani aikolam tem porgott korinastana amchean ravunk zaina.”

²¹Tãnnim tankam anink êk pavtt dhomkaile ani sôddle; khõichêch vatten tankam khast lavunk mellonasli, kiteak sogllo lôk ghòddlam tachê khatir Devak vakhanntalo.

²²Vismita vorvim boro zal’lo tea mon’xak challis vorsam voir aslim.

²³Pedruk ani Juanvak sôddlea uprant, te aplea zomea-xim gele ani mukhel-iadnikamnim ani zantteamnim tankam sanglelem titlem-i tãnnim tankam kollit kelem.

²⁴Tem aikolea uprant, tãnnim soglleamnim borabôr aplo tallo Devak ubarun mhonn’lem: “Dhonia, sôrg, prithum’, somdir ani tachê bhitôr asa titlem-i Tunvem rochlãi.

²⁵Ani Povitr Atmea vorvim, amchea bapa Tujea sevoka Davidachê tonddim sanglãi: ‘Raxttram kiteak challovtat? Kiteak heô porza bextteô gunngunntat, kunnkunntat?

²⁶Pritumeche raza uprastat, Sorvesporacher ani Tachea Kristacher kunvor guddmêll kortat.’

²⁷Khorench, Herod ani Pons Pilat raxttram ani Israelachê porjê borabôr ektthãi zaun, Jezucher, Tunvem makhlelea Sevokacher, add guddmêll kelo,

²⁸ani oxem, jem ghòddchem mhonn Tujê podven ani zannvaien Tunvem adim-fuddench tharail’li, tem tãnnim xarti pavoilem.

²⁹Ani atam, Sorvespora, tancheô dhomkavnneô Tum polle ani sogllea kalljidarponnan Tuzo nirôp porgottunk Tujeam sevokank nirmi;

³⁰ani Tujea povitr Sevoka Jezuchê nanvim pidda kaddun uddounk ani ochoream ani vismitam korunk Tujea hatachi podvi dakhoi.”

³¹Oxem magnnem kortastanam tim zomlelim ti dhornn kampli, tim sogllim Povitr Atmean bhòrlim ani kalljidarponnan Devachem utor porgottit ravlim.

³²Bhavarteancho akho zomo eka kallzacho ani eka monacho aslo; apnna lagim kitem aslem tem apnnachench mhonn konn dhorinaslo, punn tanchê lagim aslem tem sogllem soglleanchem mhonn tim dhôrtalim.

³³Apostl vhodda bollan Somia Jezuchea punorjivont-ponnak govai ditale ani tankam soglleank vhôdd man aslo.

³⁴Tanchê modem gorjek sampoddlelim konn naslim, kiteak, zanchê lagim bhattam vô ghoram aslim, tim vikun tim tancho vikrecho duddu haddun

³⁵apostlan-cheam pãiam-xim dovortalim. Magir zonn-ekleak ap-aplê gorjê pormannem ho duddu vantt’talim.

³⁶Oxem Juze nanvacho Xiprusacho êk Levit aslo; taka apostlamnim Barnabas (mhonngê “dhir divpi”) mhonn nanv ghalem.

³⁷Tacho êk bhattacho kuddko aslo to tannem viklo ani vikrecho duddu haddun apostlancheam pãiam-xim dovorlo.