Read Goan Konkani AI 5 Bible Online

AI 5 - Goan Konkani bible

AI 5

¹Ananias mhonnlolo êk monis aslo; tachê bailechem nanv Safira. Tannem aplea bhattacho êk kuddko viklo

²ani, tachi bail bhedi asun, vikrechea duddvancho êk vantto lipoun dovorlo ani urlolo vantto haddun apostlancheam pãiam-xim dovorlo.

³Pedrun taka mhonn’lem: “Ananias, Soitanak tujea kallzant kiteak itlo rigunk dilai tunvem, ki vikrechea duddvancho êk vantto lipoun dovrun Povitr Atmeak fôtt marunk pavloi?

⁴Bhatt vikchê adim tem tujench aslem. Toxem tem viklea uprant, vikrecho duddu-i tuzoch nhoi? Osli khotti kornni tujea kallzant koxi mhonn ievzon aili? Tunvem fôtt marleai ti mon’xank nhoi punn Devak.”

⁵Him utram aikonam fuddem, Ananias bhi poddlo ani melo. Ani hem aikolem titleancher-ui vhôdd bhirant aili.

⁶Uprant kãi tornnatte aile ani tachem pret êkê olin revddailem ani bhair vhorun purlem.

⁷Sumar tin voram uprant tachi bail bhitôr aili, punn kitem-kat ghòddlem tachi tika kãi khobor nasli.

⁸Pedrun tika vicharlem: “Tumi viklam tem bhatt itleach molak viklam?” Tinnem zobab dilo: “Hôi, titleakuch.”

⁹Tedna Pedrun tika mhonn’lem: “Somiachea Atmeachi porikxa korunk koxem mhonn tumi dogam-i zannam kobul zaleant? Polle, tujea ghovak purun aileat tanche pãi darachea umbrearuch asat ani te tuka-i vhortele.”

¹⁰Thõichê-thõich ti tacheam pãiam-xim poddli ani meli. Tedna tornnatte bhitôr aile ani ti tankam meleli mell’li; ani tika bhair vhorun tichea ghovachê kuxik tãnnim purli.

¹¹Hi khobor aikun akhê povitr-sobhecher ani heram soglleancher vhôdd bhirant aili.

¹²Porjê modem apostlamnim khup khunna ani ojapam kelim. Tim sogllim eka monan Solomanvachea Tarangnnant ektthãi zatalim.

¹³Lôk tankam vakhanntalo, punn anink konnuch tanchea zomeant bhitôr sorunk fuddem soronaslo.

¹⁴Somiacher bhavart dovorteleam dadleam ani bailanchi sonkia choddon-vaddon vetali.

¹⁵Ani oxem zatalem ki, Pedru choltana, tachi savlli punn konnam-konnancher poddun tim ap-aplê piddentlim borim zaunchim mhonn lôk piddevontank choukancher vhoro ani khattincher ani antrunnancher tankam dovri.

¹⁶Jeruzalea bhonvtonncheam nograntlo-i lôk zomeamnim ietalo ani apnnam borabôr piddevontank ani mhelle otme bosloleank haddtalo, ani tim sogllim borim zatalim.

¹⁷Tedna porom-iadnik ani tache soglle bhageli, mhonngê Sadukinchea pokxache vangddi, nirdukaien bhòrle,

¹⁸ani Apostlank dhorun tãnnim tankam êkê sarvzonnik bondkhonnint ghale.

¹⁹Punn tê rati Sorvesporachea dutan bondkhonnichim daram ugôddlim ani tankam bhair kaddun oxem mhonn’lem:

²⁰“Vochat ani Dev-mondirant ube ravat ani porjek hea Jivitachi soglli khobor kolloiat.”

²¹Tankam sanglolê pormannem, dis uzvaddchê adim te Devmondirant gele ani xikovnn diunk lagle. Porom’-iadnik ani tanche bhageli pavle tedna, tãnnim Mha-Dhormsobha zomoili, mhonngê Israel-porjecheam zantteanchi ak’khi sobha, ani apostlank bondkhonnintle haddunk laile.

²²Punn subedar bondkhonnint pavle tedna, bhitôr tankam konn mellunk na; dekhun, portun ieun tãnnim sanglem:

²³“Amkam bondkhônn sarki dhampleli mell’lea, ani paredar daram mukhar paro korun ube asle; punn ti ugôddtôch bhitôr amkam konnuch mellunk na.”

²⁴Hi khobor aikun, Devmondiracho sordar ani mukhel iadnik tankam kitem ghòddlem kai mhonn chintunk poddle.

²⁵Tednach konn-eklo hi khobor gheun ailo: “Tumi bondkhonnint ghal’le te monis he polleiat Devmondirant ube asat ani porjek xikovnn ditat.”

²⁶Tedna sordar apleam subedarank gheun gelo, punn, lôk apnnank fatrait mhonn bhieun, boll korinastanam tãnnim tankam haddle.

²⁷Tankam Mha-Dhormsobhê mukhar haddun ube kortôch, porom’ -iadnikan tankam oxem vicharlem:

²⁸“Hea nanvan anink xikovnn dina zaunk ami tumkam khôr xiddkavnni dil’li, tori, polleiat, tumchê xikovnnen tumi Jeruzalem bhôrlam ani hea mon’xachea mornnachi zobabdari tumi amcher ghalunk sôdtat.”

²⁹Portipall korun, Pedrun ani apostlamnim oxem mhonn’lem: “Mon’xanchi adnea nhoi, punn Devachi adnea ki ami pallunk zai.

³⁰Eka rukhar umkollavun tumi jivexim marlo tea Jezuk amcheam purvozanchea Devan punorjivont kelo.

³¹Taka Fuddari ani Soddvonnar korunk ani Tachê vorvim Israelak jivit-mon bodlop ani patkanchem bhogsonnem diunk, Aplê podven Devan Taka voir ubarlo.

³²Heam soglleam ghòddnneanche ami govai asanv ani Devan Apleô adnea pallteleank zo Povitr Atmo dila, To-i amchê borabôr govai.”

³³Hem aikun, tancho rag itlo pettlo ki te tankam nattak korunk sôdtale.

³⁴Tedea vellar Mha-Dhormsobhecho êk vangddi ubo zalo: to Gamaliel nanvacho êk Farizêv, ani nanvvosto xastri mhonn akhi porza taka lekhtali. Team mon’xank thoddo vêll bhair kaddat mhonn tannem maglem.

³⁵Magir Mha-Dhormsobhek heam utramnim to uloilo: “Israel porjecheam mon’xamnô, heam mon’xam vixim tumi kitem korunk sôdtat tachi tumi borich chotrai dhôrat.

³⁶Tumi zannont, hea adim Teudas nanvacho konn-eklo upzolo ani apunn konn mhotvacho mhonn sangunk laglo; ani sumar charxim monis tachê pattlean gele; punn taka jivexim marlo ani tache pattlavdar ximpoddle ani nanch zale.

³⁷Uprant, lôkgonntechea somoiar, Galileikar Judas upraslo ani apnna pattlean zaitea lokak tannem ôddlo; taka-i jivexim marlo ani tache-i xis zollim-mollim ximpoddle.

³⁸Tôr hanv tumkam sangunk sôdtam tem hem: heam mon’xam thaun pois sorat ani tankam sôddat.

³⁹Kiteak hem kam’ mon’xam thaun upzolam zalear, tem apxinch fiskotton vetelem; punn tem Deva thaun ieta zalear, tumchean tem nattak korunk zaunchem na; tea bhair, tumi Devacher add zhuzunk pavxeat.” Tachem tãnnim manun ghetlem.

⁴⁰Tãnnim apostlank apounk dhaddle, tankam mar dilo, Jezuchea Nanvan anink uloina zaunk tankam xiddkaile ani sôddle.

⁴¹Jezuchea Nanva pasot beman sõsunk apnnank bhag mell’lem mhonn khuxal zaun, te Mha-Dhormsobhentle bhair sorun gele.

⁴²Te dispottim Devmondirant ani ghoram-ghoramnim xikovnn diit ani Jezu Kristachem xubhvhortoman porgottit ravle.