Read Goan Konkani AI 6 Bible Online

AI 6 - Goan Konkani bible

AI 6

¹Tedna, xisancho ank vaddot vetana, Grik bhas ulovpi Judev mon’xam Hebrêv bhas ulovpi Judevancher gungunnunk laglim, kiteak dispottim jevonn vaddtanam tancheam vidvanchi favo tê fikirin seva zainasli.

²Hea khatir bara apostlamnim xisanchi êk zomat apoili ani tankam mhonn’lem: “Devachem utor kuxin dovrun, jevonn vaddchi seva amkam bori sobonam.

³Tea pasot tumi, bhavam-bhoinnimnô, tumchê modleam sat dadleank sodun kaddat: te boro man aslele ani Povitr Atmean ani zannvaien bhòrlele zaunche; ani hi jevnnachi seva ami tanchea hatant sompoitelenv.

⁴Magir ami sogllo amcho vêll prarthon korunk ani Devachem utor porgottunk bhettoitelenv”.

⁵Hi ievzônn sogllê sobhen mandun ghetli, ani bhavartan ani Povitr Atmean bhòrlelea Istevak vinchun kaddlo, ani tachê borabôr Filipak, Prokorak, Nikanorak, Timonak, Parmenasak ani Antiokiechea novxisa, Nikolavak.

⁶Hankam tãnnim apostlam mukhar ube kele ani hãnnim magnnem korun tancher hat dovorle.

⁷Sorvesporachem utor ximpddot vetalem ani Jeruzaleant xisancho ank vaddot-choddot vetalo, ani puskoll iadnikamnim porian bhavart manun ghetlo.

⁸Devacheam subham’ denneamnim ani bollan bhòrlolo Istêv loka modem vhoddleô khunna ani vismitam kortalo.

⁹“Svotontr zal’leam mon’xanchem devsthan”, hea nanvachem ek devsthan aslem; hache vangddi asle Sirenache, Aleksandrieche, Silisieche ani Aziechea Prantantle kãi Judev. Tea devsthanantle kãi zann fuddem sorle ani Isteva kodde vad-vivad korunk lagle.

¹⁰Punn to zannvaien ani Atmean bhoron uloitalo dekhun, taka fuddo korunk tanchê lagim ghoddonaslem.

¹¹Tea pasot, tãnnim thoddeam mon’xank sodun kaddle ani tankam oxem mhonnunk xikoilem: “To Moizesacher ani Devacher ninda uloita tem ami aikolam.”

¹²Oxem tãnnim lokak ani zantteank ani xastreank fuloile. Te soglle aile ani Istevak dhorun tãnnim taka Mha-Dhormsobhê mukhar vhelo.

¹³Ani thõi oxem sangunk lottik sakxidarank tãnnim ube kele: “Ho monis hea Povitr Zageacher ani Somurticher add uloit asa. ‘Nazaretkar Jezu hea Povitr Zageachem nisontton kortolo ani Moizesan dil’leô riti-rovisô bodôltolo’ — oxem tannem mhonnlelem ami amcheach kanamnim aikolam.”

¹⁵Ani tellun tacher nodor mar zalear, neaisobhent boslole tankam tachem mukhamoll eka devdutachem mukhamoll koxem distalem.