Read Goan Konkani AI 7 Bible Online

AI 7 - Goan Konkani bible

AI 7

¹Porom’-iadnikan Istevak vicharlem: “Te sangtat tem khorem?”

²Istevan portipall kelo: “Mhojeam bhavamnô, mhojeam vhoddilamnô, mhojem utor aikat: Harran ganvant tthikann korunk vechê adim, Mezopotamient astana, amchea bapa Abrahamak mhoimecho Dev dixtti poddlo.

³Tannem taka mhonn’lem: ‘Tuzo dês sôdd, tujea ghoranneantlo bhair sor, ani Hanv tuka dakhoitolom tea desant voch.’

⁴Tedna to Kaldeikaranchea desantlo bhair sorlo ani Harran ganvant ravunk gelo. Ani tacho bapui mortôch, Devan taka thõisorlo bhair kaddlo ani hea tumi atam ravtat tea desant haddlo.

⁵Tori hea desant êk vet bhôr porian taka daiz dilem na. Punn taka ozun bhurgo naslo tedna, taka ani tachê uprant tachê sonstik Apunn to dês ditolo mhonn Devan bhasailem.

⁶Tôr Dev Abrahama kodde oso uloilo: ‘Tuji sonsôt porkea desant videxi koxi jieteli. To lôk tankam charxim vorsam gulam’ponnant dovrun dogdaitolo.’

⁷Sorvesporan anink-ui mhonn’lem: ‘Jem raxttr tankam gulam’ponnant dovortelem, tea raxttrachi Hanv nit kortolom, ani uprant tim thõisorlim bhair sortelim ani hê svater tim Mhaka bhôztelim.’

⁸Ani Devan Abrahamak sunoticho korar dilo; ani hê porim Izak tacho put zolmotôch, atthvea disa tannem tachi sunôt keli: magir Izakan Jakobachi sunôt keli, ani uprant Jakoban bara porzapotinchi sunôt keli.

⁹He porzapoti, aplea bhava Juzechê nattkaien bhoron, taka gulam’ koso viklo ani oso to Ejiptak pavlo, punn Dev tachê sovem aslo;

¹⁰ani Tannem taka soglleam vignantlo vattailo ani Ejiptachea raza Farao mukhar itlo taka axirvadan bhôrlo ani xanno kelo, ki Faraon Ejiptacho ani aplea akhea ghoranneacho karbhar tachea hatant ghalo.

¹¹Tedna akhea Ejiptant ani Kanaanant dukôll poddun, lokak zaite hal ani upodre bhògche poddle, ani amcheam purvozank jevonn-khann mellona zalem.

¹²Punn Ejiptant orôv asa mhonn Jakobachea kanar poddlem tedna, poilê pavtti amcheam purvozank tannem thõi pattoile.

¹³Dusrê pavtti gele tedna, Juzen apleam bhavank apunn konn to dakhoun dilem, ani Juzechea kuttumbachi soglli khobor Faraok gomli.

¹⁴Tedna Juzen aplea bapaik Jakobak ani soglleam apleam soiream-dhaireank apounk dhaddlim; tim sogllim mellun ponchastôr zannam aslim.

¹⁵Ani Jakob Ejiptak denvun gelo; ani uprant, to ani amche purvoz mele.

¹⁶Tancheô kuddi Xekem’ ganvant porteô vheleô ani Abrahaman thõi Xekemant kimôt farik korun Hemoracheam putam koddli vikti ghetleli tê somadhint teô ghaleô.

¹⁷Devan Abrahamak bhasail’lo kall lagim pavtam-pavtam, Ejiptant porjecho ank vaddot-choddot gelo.

¹⁸Itlean Ejiptant dusro eklo raza razvoddki cholounk laglo; taka Juzechi khoboruch nasli.

¹⁹Tannem amchê porjek naddbudhin vagoili ani amcheam purvozank itli piddapidd dili, ki nigtech zolmol’leam ballank, te vanchche nhoi mhonn, osadd ghalunk tankam hukum’ ghalo.

²⁰Oslea vellar Moizes zolmolo ani Devak manovlo: tin mhoine porian taka aplea bapaichea ghorant pôslo.

²¹Magir, taka osadd ghalchea vellar, Faraochê dhuven taka apnnailo ani aploch put koso taka lhan-vhôdd kelo.

²²Ejiptkaranchi vidhya asli titli-i Moizesak xikoili ani to utramnim ani kornneamnim bollvont zalo.

²³Challis vorsanchê piraier, apleam bhavam-bhoinnink, mhonngê Israelacheam putam-dhuvank, bhett diunk tachea monant ailem.

²⁴Tanchê modlea ekleak konn-eklo Ejiptkar zulum’ kortalo mhonn polleun, Moizes tachea adarak gelo ani, Ejiptkarak jivexim marun, piddapidd bhôgloleacho tannem sudd ghetlo.

²⁵Apnna vorvim Dev tankam suttka diunk veta mhonn aplim bhavbhoinn somzotelim mhonn Moizes chint’talo; punn khorench mhollear hem tankam somzonk na.

²⁶Dusrea disa, dog zann Israelkar zhogoddtale tedna, Moizes novean thõi dixtti poddlo, ani tanchê modem xanti korunk mhonn tannem mhonn’lem: ‘Ixttamnô, tumi ekamekache bhav; kiteak tôr ekamekak dukhoitat tumi?’

²⁷Punn aplea bhavak opman kortalo tea mon’xan Moizesak dhuklun uddoilo ani mhonn’lem: ‘Amchê voir fuddari ani nitidar tuka konnem nemla?

²⁸Kal tea Ejiptkarak jivexim marloi tosoch mhaka-i bi marunk sôdtai kitem?’

²⁹Hem aikun Moizes pollun gelo ani Madian ganvant ravlo; thõi taka dog put zolmole.

³⁰Challis vorsam bhòrlea uprant, Sinai dongra lagchea oronneant, eka zolltea jhilkuttantlea agtteant eka devdutachem taka dorxon mell’lem.

³¹Tem polleun Moizesak ojap dislem. Bariksannen polleunk lagim voch zalear,

³²Sorvesporacho tallo taka aikunk ailo: ‘Tujeam purvozam, Abrahamacho, Izakacho ani Jakobacho Dev Hanv.’ Moizes koddkoddlo ani tea fuddem mhenotin polleunk taka kalliz zalem na.

³³Tedna Sorvesporan taka mhonn’lem: ‘Tujeam pãiancheô vhannô kadd, kiteak tum ubo asai ti svat povitr.

³⁴Mhoji porza Ejiptant kitli piddapidd bhôgta ti Hanvem dekhlea ani tancheô huieli Hanvem aikoleat ani tika suttka diunk Hanv denvun ailam. Atam ie, Hanv tuka Ejiptant dhaddunk vetam.’

³⁵‘Tuka fuddari ani nitidar konnem nemla?’, oxem mhonnun pois kel’lo to konnak? Moizesak nhoi? Tori jhilkuttant devdut konnak dixtti poddlo? Ani tea devduta vorvim Devan konnak mhonn porjecho fuddari ani soddvonnar zaunk dhaddlo? Teach Moizesak!

³⁶Ejiptant ani Tambddea Doriant ani challis vorsam bhôr odbhutam ani vismitam korun konnem tankam bhair kaddlim? Teach Moizesan.

³⁷‘Tumcheam bhavam-bhoinnim modlo mhojê sarko êk provadi tumchê khatir Dev upzoitolo’, oxem Israel porjek uloilo to konn? Toch Moizes.

³⁸Sinai Dongrar devdut uloilo to konna kodde uloilo? Moizesa kodde nhoi? Ani oronneant sobha bhòrtali tedna, porje borabôr, amcheam purvozam borabôr ani devduta borabôr aslo to konn? Ani jivitachim utram, amkam diunk, ghetlim to konn? To toch Moizes!

³⁹Tori amche purvoz taka aikunk kobul na zale, tãnnim taka patt keli, ani portun Ejiptak vochpachi khuxi dakhoun tãnnim Aaronak sanglem:

⁴⁰‘Amchê mukhar vochunk amkam dèv korun di; kiteak amkam Ejiptantlim bhair kaddlim tea Moizesachem kitem zalam tachi amkam khoboruch na.’

⁴¹Tedna tãnnim êk paddkulo kelo ani hê murtik iôdn bhettoilo. Apleanch hatamnim kel’lea kamam pasot tim murgottlim.

⁴²Punn Devan tankam patt vôll’li ani ontralla velê foujechi puza korunk tankam soddun dilim. Tôr oxem provadianchea pustokar boroil’lem asa: ‘Israelachea Ghorannea, challis vorsam porian oronneant boliô ani bolidanam tunvem Mhaka bhettoileant? Na.

⁴³Punn Molokacho tombu ani Refan devachem noketr tumcheam khandar tumi vhelim, heôch teô bhozunk kel’leô murti. Tôr atam, Babiloniê pelean Hanv tumkam pordesant dhaddunk vetam.’

⁴⁴Amcheam purvozam sangatim oronneant Govaikecho Tombu aslo; Devan Moizesak formail’lem toxem ani taka nomuno dakhoil’lo tea pormannem, to Tombu kel’lo.

⁴⁵Magir to gheun, amcheam purvozamnim pinddkê-pinddkent samball’lo; xekim, jedna amcheam purvozank zago diunk, Devan tanchea fuddeant raxttrank dhanvddailim ani team raxttrancho dês amchea purvozanchea tabeant kelo, tedna Joxuachea fuddariponna khal to Tombu hea desant bhitôr kaddlo. Davidachea kalla porian to hanga aslo.

⁴⁶David Devak manovlo ani Jakobachea Deva khatir ek mondir toiar korunk tannem maglem,

⁴⁷punn hem mondir Solomanvan Taka bandlem.

⁴⁸Toripunn Bhov-Vorto Dev mon’xancheam hatamnim bandleleam mondiramnim ravona, kiteak provadi oxem mhonnta:

⁴⁹‘Sôrg Mhojem xinvason ani prithvi Mhojeam pãianchi monnoi: Koslem mhonn mondir tumi Mhaka bandtelet? oxem mhonnta Sorvespor. Vô Hanvem visôv gheunchê khatir koslo mhonn zago tumi Mhaka toiar kortelet?

⁵⁰Heô soglleô vostu Mhojea hatan vrochleat ki na?’

⁵¹Tumchem kanttem kitlem mhonn nibor! Tumchim kallzam ani kan Devachea Korarak ovisvaxi! Tumi tôr Povitr Atmeak sodam virôdh kortat; tumcheam purvozamnim kelem toxench tumi-i kortat.

⁵²Khõichea tori provadeak tumcheam purvozamnim dhumallo dinastana dovorla? Devak Manovlolo a ieuncho asa mhonn adim-fuddem porgôtt’tale tankam tãnnim jivexim marle. Ani atam tuminch, Tacho ghat gheun, Taka jivexim marlo.

⁵³Devdutam udexim tumi Somurt ghetleli, tori ti pallunk na te tumich!”

⁵⁴Hem aikun tanchea kallzant rag xiztalo ani te tacher add aple dant korkoraunk lagle.

⁵⁵Punn Istêv, Povitr Atmean bhòrlolo zaun, sorgak tellun polleunk laglo ani tannem Devachem tez dekhlem, ani Devachea uzvea hatak ubo aslolo Jezuk tannem pollelo.

⁵⁶Tannem mhonn’lem: “Ho polleiat, sôrg ugto zal’lo ani Mon’xacho Put Devachea uzveak ubo aslolo mhaka dixtti poddta.”

⁵⁷Punn tãnnim vhoddlean huieli marleô, hatamnim aple kan dhample, ani soglle borabôr tachea angar gele.

⁵⁸Uprant taka Xara bhair oddun vhelo ani fatramnim marunk lagle. Ani sakxidaramnim aplim avoronnam Saulu nanvachea eka tornnatteacheam pãiam-xim dovorlim.

⁵⁹Istevak fatramnim martale tedna, tannem oxem magnnem kelem: “Somia Jezu, mhozo otmo Tujea hatant ghe.”

⁶⁰Magir, dimbi ghalun, vhoddlea tallean tannem oxi bob marli: “Somia, tankam hea patkache guneanvkar korinaka.” Ani hem mhonnun to ontorlo.