Read Goan Konkani AI 8 Bible Online

AI 8 - Goan Konkani bible

AI 8

¹Hea khunak Sauluchi soglli maniotai asli. Tedna Jeruzaleant aslelê povitr-sobhecher add êk vhôdd piddapidd suru zali ani sogllim, apostl mat bhairaun, Judeiachê ani Samariechê bhonvtonn-cheam ganvamnim ximpo-ddlim.

²Bhoktivont mon’xamnim Istevak nikhipilo ani tachê pasot motto vilap kelo.

³Povitr-sobhechem nisontton korunk Saulu vavurtalo; ghora-ghorant bhitôr sorun, dadleank toxem bailank bhair kaddun to bondkhonnint ghaltalo.

⁴Punn ximpoddlelim tim zollim-mollim xubhvhortoman porgottit gelim.

⁵Oso Filip Samariechea eka nogrant gelo ani tanchê modem Kristak porgôtt kelo.

⁶Tacheam vismitanchi khobor aikun ani khaxa tim polleun sogllea lokan Filip porgôtt’talo to sondêx eka monan mandun ghetlo.

⁷Zaiteam devchar-bosleleam thaun mhelle atme bob marun bhair sortale ani puskoll ar-zal’lim ani thonttim borim zatalim.

⁸Haka lagun tea nogrant vhôdd sontos vostalo.

⁹Teach nogrant Simanv nanvacho êk monis ravtalo ani ghaddiponnam korun Samariekar lokak bhuloitalo. To apunnuch vhôdd mhonn dakhoun uloitalo.

¹⁰Sogllim, vhoddam toxinch lhanam, tachem chitan aikotalim ani mhonntalim: “Devachi xrêxtt podvi mhonntat to hoch.”

¹¹Tim taka chitan aikotalim kiteak zaito kall thaun aplê ghaddividien to tankam bhuloitalo.

¹²Punn Filipan Devachea Rajeachem ani Jezu Kristachea nanvachem xubhvhortoman porgôttlem tedna, dadleamnim toxem bailamnim bhavart dhôrlo ani batism ghetlo.

¹³Simanvan-ui bhavart dhôrlo ani, batism ghetlea uprant, to Filipachi patt sôddinaslo. Khunna ani vhoddlim vismitam zalim tim polleun, to ojap zalo.

¹⁴Samariechea lokan Devachem utor manun ghetlem mhonn Jeruzaleant asleleam apostlamnim aikolem; ani Pedruk ani Juanvak tanchê-xim dhaddle.

¹⁵Thõi denvun pavlea uprant, bhavarteank Povitr Atmo mellum mhonn tãnnim magnnem kelem,

¹⁶karonn tanchê modlea ekleacher porian Povitr Atmo ozun denvunk naslo; tankam fokot Somia Jezuchea nanvan batism dil’lo.

¹⁷Tedna Pedrun ani Juanvan tancher hat dovorle ani tãnnim Povitr Atmo ghetlo.

¹⁸Apostlanchê hat-dovornnê vorvim tankam Povitr Atmo mell’lo mhonn Simanvan pollelem tedna, Pedruk ani Juanvak tannem poixe dile

¹⁹ani mhonn’lem: “Jeam konnancher hanv hat dovrin, tankam Povitr Atmo mellcho mhonn mhaka-i osli podvi diat.”

²⁰Punn Pedrun taka zobab dilo: “Devan funkea dil’lem dan poixeamnim viktem gheunk zata mhonn tum somzoloi dekhun tuka ani tujeam poixeank uzo lai.

²¹Hea denneant tuka bhag na, vantto na, kiteak Deva mukhar tujem mon soroll nhoi.

²²Tujea khotteponnak patt kôr ani tujea monant jem kitem tunvem chintlãi tachem Somia lagim bhogsonnem mag.

²³Koddu pintachem vik tunvem ghetlãi ani patkacho gulam’ tum zalai mhonn hanv polletam.”

²⁴Simanvan zobab diun mhonn’lem: “Tumi sanglam tantlem kãi mhojer iena zaunk mhojê pasot Somia lagim magat.”

²⁵Apli govaiki dilea uprant ani Somiacho sondêx porgôtt kortôch, te portun Jeruzaleak gele. Ani Samarie-karancheam zaiteam gramamnim tãnnim xubhvhortoman porgôttlem.

²⁶Tedna, Sorvesporachea dutan Filipak uloun mhonn’lem: “Utth ani dokhinnek Jeruzalea thaun Gaza denvun veto margan voch.” Hea margan atam konn vochona.

²⁷Mhonntôch to utthun aplê vattek laglo. Ovchituch taka êk Etiopiekar dixtti poddlo; ho êk hizddo ani Etiopiechê Kandaki Ranniechea akhea bhanddaracho odhikari aslo. To Devak bhozunk Jeruzaleak gel’lo ani

²⁸aplê gaddier bosun to ghora portotalo. Vatter Izaias provadeachem pustok to vachtalo.

²⁹Atmean Filipak mhonn’lem: “Voch ani gaddiê lagim sor.”

³⁰Filip dhanvlo ani to Etiopiekar Izaias provadeachem pustok vachta tem aikun tannem vicharlem: “Tum vachtai tem somzotai mum?”

³¹Tannem portipall kelo: “Mhaka somzonni diunk konn na zalear, mhojean koxem somzunk zait?” Mhonntôch, gaddient choddun apnna-xim bos mhonn tannem Filipa lagim maglem.

³²Povitr Pustokantlo to vachtalo to bhag ho aslo: “Marunk vhortat toslea lhan menddrea sarko, apnnak tastelea mukhar ogich ravtelê xelliê bhaxen, tachea tonddantli zap bhair sorunk na!

³³Tachea hinnponnant tachi nit korun ghetolo konn na zalo. Tachem jivit hea sonvsarant veginch toddun kaddlem; Dekhun tachê pinddkechi khobor konn sangunk xoktolo?”

³⁴Tedna tea hizddean Filipak mhonn’lem: “Ho provadi apnnachêch vixim vô dusrea konna vixim uloita, tem tum mhaka sangxi?”

³⁵Tedna aplem tondd ugddun ani Povitr Pustokantlim tinch utram dhorun Filipan taka Jezucho xubh sondêx porgôttlo.

³⁶Fuddem vetam-vetam te udka-xim pavle ani hizddean mhonn’lem: “Polle, hanga thoddem udok asa; hanvem batism gheunk kosli add-khôll asa?”[2]

³⁸Tannem gaddi thamboili ani te dog-ui, Filip ani hizddo, udkant denvle ani Filipan taka batism dilo.

³⁹Udkantle voir sortôch, Sorvesporachea Atmean Filipak ubarun vhelo ani hizddean taka anink polleunk na; ani sogllo sontosbhorit zaun, tannem aplo fuddlo rosto dhôrlo.

⁴⁰Punn Filip Azotak pavlo ani, soglleam nogramnim bhonvun, Xezareiak vocho porian xubhvhortoman porgottit ravlo. S1 Sauluchem Porivorton