Read Goan Konkani AI 9 Bible Online

AI 9 - Goan Konkani bible

AI 9

¹Itlea mhonnosôr, Saulu Somia- cheam xisancho apunn jiv kaddtolo mhonn tankam bhenkddaunk bhonvtalo ani hê axen tacheach jivak thar naslo. To porom’-iadnika-xim gelo

²ani hê Vattecheam apnnak melltit team pattlavdarank, dadleank toxench bailank, dhorun Jeruzaleak haddunk Damaska-devsthanancheam vhoddilank diunchim tannem potram maglim.

³Damaskachê vatter, xara lagim pavtam-pavtam, ovchit sorga velo êk uzvadd tachê sobhonvtim porzoll’lo.

⁴To dhornnir xevttolo ani tedna tannem êk tallo aikolo. To Taka oxem mhonntalo: “Saulu, Saulu, kiteak mhonn tum Mhaka piddapidd ditai?”

⁵Tannem vicharlem: “Tum konn, Saiba?” Tallean zap dili: “Hanv Jezu, ani Mhakach tum piddapidd ditai.

⁶Atam utth ani xarant voch ani tunvem kitem korunk zai tem konn tuka sangtolo.”

⁷Tachê borabôr provas kortale te thottakun mone zale, kiteak tãnnim tallo aikol’lo khorem, punn konnakuch polleunk naslo.

⁸Saulu zomni velo utthlo ani, tache dolle ugte asun-ui, taka kãich disonaslem. Tea pasot Damaska porian tãnnim taka hatak dhorun vhelo.

⁹Tin dis porian tachean kãich polleunk nozo aslem ani to kãi jevunk na ani pieunk-ui na.

¹⁰Damaskant Ananias nanvacho êk xis aslo. Dorxonant Somi apnna kodde oxem uloita mhonn tannem aikolem: “Ananias!” Tedna tannem zap dili: “Ho polle hanv asam, Somia.” Somian taka mhonn’lem:

¹¹“Utth ani Ubo mhonntat tea Rostean voch ani Judasachea ghorant, Tarsusachea Saulu mhonnlelea konn-ekleachi khobor kadd; to magnnem korta.”

¹²Ani apnnak novean nodor mellunk Ananias mhonnlolo konn-eklo bhitôr ieun apnnacher hat dovorta mhonn Saulun dorxonant pollelem.

¹³Tedna Ananiasan mhonn’lem: “Somia, hea mon’xa vixim ani Jeruzaleant Tujeam bhoktank tannem kitle koxtt dileat tê vixim zaiteam zannam koddchem hanvem aikolam.

¹⁴Ani Tujem nanv gheteleam somestank dhorunk mhonn mukhel iadnikanchi podvi gheun to hanga aila.”

¹⁵Somian taka zobab dilo: “Tori astana tum voch, kiteak, raxttram toxench razam mukhar ani Israel-porjê mukhar, Mhojem nanv porgottunk ho monis Mhojem vinchun kaddlelem hatiar.

¹⁶Mhojea Nanva pasot tannem kitlem sõsunk poddtelem tem Hanv taka dakhoitolom.”

¹⁷Tedna Ananias gelo. To ghorant bhitôr sorlo ani rokddench Saulucher aple hat dovrun tannem mhonn’lem: “Saulu bhava, tuji nodor tuka porti mellche khatir ani tum Povitr Atmean bhorche khatir, tum ietaloi tê vatter tuka dixtti poddlo tea Somia Jezun mhaka dhaddla.”

¹⁸Thõichê-thõich Saulu-cheam dolleantlim khovollam koxim bhi poddlim ani taka novean nodor aili; ani utthun tannem batism ghetlo.

¹⁹Jevlea uprant taka novean ghottai mell’li. Damaskant xisam borabôr thodde dis sarlea uprant,

²⁰Jezu Devacho Put mhonn to devsthanamnim rokddoch porgottunk laglo.

²¹Taka aikotalim tim sogllim ojap zaun mhonntalim: “Hem Nanv ucharteleancho Jeruzaleant bhosm korunk vavurtalo to ani hanga asleleam xisank dhorun mukhel iadnikam fuddem vhorunk hangasôr ail’lo to monis hoch nhoi?”

²²Punn Saulu odik-odik bollixtt zait vetalo ani, Jezu Krist mhonn ruzu korun, Damaskant ravteleam Judevank gondhollak ghaltalo.

²³Zaiteam disam uprant, Judeva-mnim Sauluk jivexim marunk guddmêll kelo;

²⁴punn hi khobor Sauluk pavli. Tacho prann kaddunk darvonntteam-xim te rat-dis paro korun asle,

²⁵punn xisamnim taka vhelo ani êkê panttlent ghalun taka ratcho kotta velean denvoilo.

²⁶Jeruzaleant pavlo tedna, xisanchea zomeak ektthãi zaunk to proitn kortalo, punn tim sogllim taka bhietalim: to khorench êk xis zala mhonn sotmanunk tim pattim sortalim.

²⁷Barnabasan taka ghetlo ani apostlam-xim vhelo, ani vatter astana Somi Sauluk koso dixtti poddlo ani kitlea kalljidarponnan Saulun Damaskant Jezuchea nanvan xubhvhortoman porgôttlem, hem sogllem Barnabasan tankam sanglem.

²⁸Tedna Saulu tanchê borabôr Jeruzaleant bhonvunk laglo ani hurben Somiachea nanvan tannem provochon korunk suru kelem.

²⁹Punn Grik bhas ulovpi Judevam kodde uloun vad-vivad zalea uprant, te taka jivexim marunk ievjitale.

³⁰Hem aikun bhavam-bhoinnimnim taka Xezareiak vhelo ani hanga thaun taka porot Tarsusak dhaddun dilo.

³¹Ak’kea Judeiant, Galileiant, ani Samarient povitr-sobha sovosthaien jietali ani Somiachi bhokti korun ani Povitr Atmeachê ghottaien ani urben bhoron ti vaddot vetali.

³²Ganvam-ganvamnim bhett diunk vochun Pedru xekim Lid’dent ravteleam bhoktam-xim pavlo.

³³Thõi taka Eneias nanvacho êk arkar mell’lo; atth vorsam to khattir poddlolo aslo.

³⁴Pedrun taka mhonn’lem: “Eneias, Jezu Krist tuka boro korta. Utth ani tujem bixannem sarkem kôr.” Ani to rokddoch utthlo.

³⁵Lid’dent ani Xaronant ravteleamnim taka dekhlo ani tim sogllim Somiachim pattlavdar zalim.

³⁶Jop’pa nogrant Tabita nanvachi êk bhavarti asli (tichea nanvacho ôrth chitoll). Aplea jivitant ti sodanch khup doiall kornneo kortali ani bhik ditali.

³⁷Team disamnim ti bori na zali, ani meli; tãnnim tika dhuli ani uprant voilea vosreant dovorli.

³⁸Lid’da Jop’pak lagim mhonntôch, Pedru thõi asa mhonn xisamnim aikolem tedna, “Vegim-vegim amchê-xim ie.”, oxem sangun dogam dadleank tachê-xim pattoile.

³⁹Pedru utthlo ani tanchê borabôr gelo. Thõi pavona fuddem taka tãnnim unchlea vosreant vhelo. Taka veddho ghalun soglleô vidva roddtaleô ani apnnank Tabitan anglim ani avoronnam kel’lim tim taka dakhounk lagleô.

⁴⁰Pedrun tankam soglleank bhair dhaddleô ani dimbier ravun magnnem kelem; uprant mel’lê kuddi vatten porton, tannem mhonn’lem: “Tabita, utth!” Tinnem aple dolle ugôddle ani Pedruk polleun ti bosli.

⁴¹Hat diun tannem tika ubi keli ani uprant bhavarteank ani vidvank apoilim ani tankam ti jivi zal’li dakhoili.

⁴²Hi khobor sogllea Jop’pak gazli ani zaiteamnim Somiacher bhavart dovorlo.

⁴³Ani Pedru konn-eka Simanv chamarager Jop’pant zaite dis ravlo.