Read Goan Konkani Rom 1 Bible Online

Rom 1 - Goan Konkani bible

Rom 1

¹Mon’xasoimban To Davidachê kullientlo; punn povitr korta tea Atmeachê podven Taka mel’leantlo punorjivont korun, Devan Taka Aplo bollvont Put mhonn sthapun porgôtt kelo tea Amchea Somia, Tachea Puta, Jezu Krista vixim Apleam provadeam udexim Povitr Pustokamnim Devan adim-fuddem bhasail’le, Devache Bore Khobre pasot kuxin kaddlolo, Devan ek apostl zaunk apoilolo, Jezu Kristacho sevôk, hanv Paulu, Jezuchea nanvak man zoddun gheunk sogllim videxi raxttram bhavartan Devak khaltim zaunchê khatir, Tachê vorvim favo zalem amkam hem vortem dennem, mhonngê apostlachem sevokponn ani tanche modem tumam-somestam, Romak asleleam, Jezu Kristachim zaunk apoileant tankam hem potr boroitam. Tumi Devachea mogachim ani Tachi povitr porza zaunk apoilelim. Tôr Deva amchea Bapachi ani Somia Jezu Kristachi doiallai ani xanti tumkam favo zaum.

⁸Poilê svater, tumchea bhavartachi khobor sogllea sonvsarar gazot asa dekhun, Jezu Krista udexim, tumam-somestam pasot mhojea Devak hanv dhin’vastam.

⁹Tachea Putachem xubhvhortoman porgottun mhojea otmean hanv Devak bhôztam; hanv thambonastanam tumcho ugddas kortam mhonn toch Dev mhozo govai.

¹⁰Tumche xim ieunk, atam nimnne kodden, Devachi khuxen mhaka koxei baxen vatt ugtti zaunk hanv Taka sodanch vinoti korit asam.

¹¹Mhojê bhettê vorvim Devachea Atmeachem dennem tumkam mellun tumi ghott zaunchim mhonn hanv tumkam polleunk axetam;

¹²odik borem oxem sanglear: mhaka ani tumkam asa tea ekach bhavarta vorvim ami ekamekak dhir diuncho mhonn mhoji axa.

¹³Bhavam-bhoinnimnô, zoxem heram videxeam modem mhaka fôll mell’la, toxench tumchê-i modem koslo tori fôll mhaka melltolo mhonn patieun, tumkam bhett diunk sobar pavttim mhojem mon aslem mhonn tumi zanno zal’lim mhaka zai; punn hê vô tê addkhollik lagun tem mhojê lagim ozun porian ghòddlem na.

¹⁴Grik mon’xam sorim toxench heram sorim, zannaram toxench nennaram sorim mhaka toch kaido asa,

¹⁵hea pasot, mhojean zata tê bhaxen, Romak asleleam tumkam-i xubhvhortoman porgottunk mhaka vhôdd hurba asa.

¹⁶Bhavart dhôrtoleam soglleam mon’xank, poilim Judevank, uprant Grikank-ui xubhvhortoman taronn divpi Devachi xokti dekhun, xubhvor-tomanacho mhaka purnn visvas asa,

¹⁷Hea pasot, “Dev Apnnak manovlolo korta to monis bhavartan jietolo”, oxem boroilelem asa tea pormonnem, tantunt Jezuche Bore Khobrent, bhavarta sun bhavartak Devan Apnnak manovto korop ugddapem zalam.

¹⁸Khorench, khotteponnan sot damun dhôrtat team dêv-bhokti nasleleam mon’xanchea sorv khotte-ponnacher Devacho krôdh sorgar thaun denvlolo dixtti poddun ieta.

¹⁹Karonn Deva vixim jem ollkhunk zata, tem tim borim zannont, kiteak Devanuch tankam tem ugtem kelam.

²⁰Tôr polleunk zainant te Tache gunn, mhonngê Tachi sasnnik podvi ani devponn, sonvsar rochla tê meren rochleleam vostum vorvim gineanacheam dolleank nivoll dixtti poddtat; dekhun hê aplê vagnnukecho apnnank guneanv na mhonn koxêch bhaxen tanchean mhonnunk zaina.

²¹Kiteak mhonn’lear, Devak ollkhun-ui favo to man tãnnim Taka diunk na. Tache upkar-ui tãnnim attounk nant; punn tanchem sogllem chintopuch holkem-polkem zalem ani tanchem ok’kol-naslelem ginean kallokant buddlem.

²²Apunn xannim mhonn dakhounk sôdtat, punn khorem mhonn’lear tim pixim;

²³ani ovinaxi Devachi mhoima soddun, vinaxi mon’xancheam, suknneancheam, chovpãii mon’zatincheam ani sorpancheam rupnneamnim murti-puttle tãnnim korun ghetle.

²⁴He khatir, tãnnim ekameka lagim apleanch kuddincho man hogddauncho mhonn, tancheam kallzancheam vondovnneam pormannem Devan tankam pozoddponnachê adhin sôddlim;

²⁵ani Deva vixim sota bodlek tãnnim fôtt mandun ghetli, ani Rochnnarak bhôzchê bodlek tim rochnnek bhôzlim. Hea Rochnnarak sasnnak vakhann’nni. Amen!

²⁶Heach pasot, Devan tankam lojecheam khor vondovnneanchê adhin sôddlim; tôr tancheô bailô legun, soimbacho linga-sombond sanddun, soimbacher add sombond dhôrtat;

²⁷toxench dadle bailam lagim soimbacho linga-sombond sôddtat ani ekameka lagim kamcharachea ujean lastat: dadle dadleam lagim kanttalleachim kortubam kortat ani aplê khottê vagnnukecho purto muxaro apleach mathear ghetat.

²⁸Heach khatir, Devak lekhunk tim kobul zalim nant dekhun, Devan tankam apleam khotteam chintpam pormannem cholunk ani sobonam tosli jivitachi chal dhorunk sôddleant.

²⁹Tim sogllea torechea khotteponnan, mhonngê kusddaien, apsvartan, noxtteponnan, buddlolim asat; nattkaien, khunamnim, zhogddeamnim, fottingponnamnim, vikottaien, bhòrlam tanchem jivit; tim zaleant chaddio sangpi,

³⁰ekamekacher boglanttam ghalpi; Devacho dvês dhôrpi; urmottaiechi, gorvachi ani mijaxichi tanchi chal; vaitt korpacheô manddnneô tim sodun kaddit asat; avoibapaik man dinant;

³¹somjikai naslelim, patieum-zainaslim, mog naslelim, kakut naslelim tim zaleant, dil’lem utor tim pallinant;

³²Oxem vagtoleank Devachea nirnnoia pormannem moronn favo mhonn tim besborim zannont; tori, nhoich apunn toslim kortubam korit ravtat, punn toxench vagteleank-ui borê bhaxen manun ghetat.