Read Goan Konkani Rom 10 Bible Online

Rom 10 - Goan Konkani bible

Rom 10

¹Bhavam-bhoinnimnô, tankam taronn mellum mhonn mhojea kallzant hanv otrektam ani Deva lagim magtam.

²Deva sorim tankam khotkhotit hurba asa, punn ti goirsomozacher dhòrleli asa mhonn hanvuch govai ditam,

³Kiteak, Dev Apnnak manovlelim korta tea nitivontponna vixim ollok na zaun ani aplem khaxa dusrem nitivontponn sthapunk sodtana, tannim Devachem nitivontponn manun gheunk na.

⁴Punn Kristan Somurt sompadnnek pavoili ani atam bhavart dhôrtoleam somestank Devachem doiallaiechem nitivontponn mellta.

⁵Somurti thaun ieta tea promannik-ponna vixim Moizesan oxem boroilam: “Somurt palltat tim tichê vorvim jivit ghetelim.”

⁶Punn bhavarta udexim Dev Apnnak manovlelim korta tea dennea vixim to oxem sangta: “Tujeach monant oxem mhonninaka: ‘Konn mhonn voir sorgar choddun vetolo?’ — mhonngê Kristak sokla denvoun haddunk —

⁷vô ‘konn mhonn sokla patallant denvun vetolo?’ - mhonngê Kristak mel’leantlo utthounk.

⁸Tôr Povitr Pustok mhonnta: “Utor tuka laginch asa: tujea tonddant ani tujea kallzant.” Hem utor, ami porgôtt’tanv tem bhavartachem utor.

⁹Khorench, Jezu Somi mhonn tujea tonddan ucharxi ani Devan Taka mel’leantlo punorjivont kelo mhonn kallzant thaun bhavart dhôrxi zalear, tuka taronn melltelem.

¹⁰Kallzant thaun bhavart dhorun ami Devak manovlelim zatanv; tonddan ucharun amkam taronn mellta.

¹¹Kiteak “Tacher bhavart dovortat tim sogllim kodinch lojek sampoddchim nant”: oxem Povitr Pustok sangta.

¹²Mhonntôch Judev ani Grik mon’xam modem koslich ontôr anink na; kiteak soglleancho Somi ekloch. Apnnak ulo martoleam somestank pavunk khup girest To,

¹³kiteak Povitr Pustokar boroil’lem asa tea pormannem, “Somiachem Nanv gheun Taka ulo martat titleank-ui taronn melltelem.”

¹⁴Mhonntôch tannim Tacher bhavart dhorinasla zalear, Taka ulo martelim koxim? Ani Tachi khoboruch aikonasleam zalear, bhavart dovortelim koxim? Konnench sondêx porgôttinasla zalear, aikotelim koxim?

¹⁵Ani tankam dhaddlea xivai porgott kortelim koxim? Tôr Povitr Pustokar oxem boroilolem asa: “Xubh khobor porgôtt’tat tanchim panvlam kitlim sobit!”

¹⁶Punn xubh khobor sogllinch mandun ghenant. Heach pasot Izaias mhonnta: “Sorvespora, ami porgôttlam tem konnem mandun ghetlam?”

¹⁷Mhonntôch sondêx kanar poddun, bhavart utpon zata, ani sodex kanar poddop Krist-porgott’ne vorvim.

¹⁸Tôr hanv vichartam: to sondêx tanchea kanar poddunk na bi? Dubhava virêt poddla, karonn “Xekan’xek prithumecher tancho tallo gazlo, sonvsaracheam ximam porian tancho sondêx pavlo.”

¹⁹Anink ek vichartam: Israelachê porjek hea sondexacho ôrth mell’lo na bi? Khud Moizes apunnuch poilo zobab dita: “Raxttr legun nhoi toslea lokachi tumkam nattkai zaunk kortolom; eka murkea raxttracher tumcho rag pettonk kortolom.”

²⁰Ani Izaias oxem porian mhonnunk pattim sorona: “Mhaka sodinaslim tankam Hanv mell’lam, ani Mhoji khobor kaddinaslim tankam Hanvem Mhojem dorxon dilam.”

²¹Ani Israel-porjê vixim to mhonnta: “Mhojer bhavart dovrina punn portench Mhojer kolpota toslea lokak dis-bhôr Hanvem Mhoje hat vistarleat.”