Read Goan Konkani Rom 11 Bible Online

Rom 11 - Goan Konkani bible

Rom 11

¹Tôr vichartam: Devan Aplê porjek soddun dili zait! Kodinch zaum nozo! Tôr hanv-ui Israelkar, Abrahamachê sonsticho, Benjaminachea kullacho.

²Apnnem vinchun kaddlele porjek Devan soddun diunk na. Povitr Pustok vachtana, Deva mukhar konn baxen Elijan Israel porjecho guneanv kelo to tumkam ugddas na?

³Tannem mhonn’lem: “Sorvespora, Tujeam provadiank tãnnim jivexim marle ani Tujeô vedi moddun uddoileô. Urlam to ekloch hanv, ani mhozo-i zalear te jiv kaddunk sôdtat.”

⁴Ani Devan taka kitem zobab dilo? “Baala mukhar dimbi moddunk na tosle sat hozar dadle vinchun Hanvem kuxin kaddun Mhaka dovorleat.”

⁵Toxench atam-i Devachê doiallaien vinchleleancho êk urlolo lhan zomo asa.

⁶Favo naslele Devache doiallaiek lagun hem ghodd’ta ani nhoi tanche koslei kornnek lagun. Devache doiallaie bogor tem ghoddum nozo.

⁷Mhonntôch kitem? Israel-porza sôdtali tem tika mellunk na. Vinchun kaddleleank tem mell’lem, punn heranchim kallzam nibor zalim.

⁸Povitr Pustokar oxem boroilelem asa: “Devan tankam zodd monachim keleant; aicho dis porian, Devan tankam dolle dile punn tankam dischem na, kan dile punn tankam aikom ieunchem na.”

⁹Toxench David mhonnta: “Tanchem jevonn tankam ek fas zaum dusreank manddlelea zallant tinch farom, dusreank manddleleam addkhollink adllon tinch khala poddum, dusreank ghal’li birmôt tancheruch poddum.

¹⁰Tankam dixtti poddona toxem tancheam dolleancher kallôk ieum, tancho patticho konno sarko bagovlolo urum.”

¹¹Tôr hanv vichartam, tim pãi adllon poddleant tim, tanchem nisonttonn zaunchem mhonn adllon poddleant tim? Kednanch na! Punn tanchea guneanvak lagun videxiank taronn mell’lem, ani Judevamnim atam hurben tanchi dêkh gheunk zata.

¹²Tanchea guneanvan akhem mon’xakull girest zalem zalear ani tanchea ovisvaxiponnan videxiank subham’ axirvad mell’lo zalear, sogllo Judêv lôk bhavart dhorunk pavtolo tedna somestancher denvtolo to axirvad kitlo odik vhôdd to!

¹³Tôr tumkam, videxiamnô, oxem sangtam: hanv videxiancho apostl mhonntôch, mhojeam Israel-porjentleam bhavam-bhoinnim modem nattkai vaddoun, tanchê modleam kãi zannank taronn favo korche mhoje sevent mhaka obhiman bhogta.

¹⁵Tim bhavarta thaun koddsoron mon’xakullak zôr Deva-xim ieunk favo zalem, tim apunuch bhavart dhorun Deva-xim portun pavtelim tedna, kitem mhonnchem? Khorench, mel’lim mon’xam novean jivont zaleant mhonnpachem!

¹⁶Poilench mhonn, Devak sonv-skarl’lem, mutt-bhôr kaddl’lem pitt povitr zalear, sogllench mollun toiar kel’lem pitt povitr zalem. Toxench Devak sonvskarl’lim, rukhachim pallam povitr zalear, tache khande-i povitr sonvskarlele zale.

¹⁷Ballgil’lea eka olivache thodde khande pendun kaddun, ani tumi, eka zonglli olivacho khando zal’lea porim, tumcho garf korun atam ballgil’lea olivachea palla thaun choddlolê puxtticho vantto mellunk, tumkam tachea bhitôr rigoileant,

¹⁸Toxem zalear, moddun uddoileleam khandeam mukhar mhonngê Judevam mukhar tumi boddai dakhoinakat; tumi boddai dakhoixeat zalear, tumi pallak ghottai-puxtti dinant, pall ki tumkam ghottai-puxtti dita mhonn monant dhorat.

¹⁹“Mhaka garf korun olivak lavchê khatir, te khande pendun kaddleat”, oxem tumi mhonntelet.

²⁰Hôi, tem khorem. Tãnnim bhavart dhôrlo na dekhun, tankam pendun kaddleant; tumi ghôtt ubim asat tim tumchea bhavartak lagun. Mhonntôch hachê vixim gorvan bhoronakat, bhirantin cholat.

²¹Devan zôr soimbacheam khandeank soimba pormannem vaddonk dovorle nant, tôr tumkam-i To vaddonk dovrinam zait.

²²Hea pasot, borabôr Devachê dulôbaiê ani khôraiê vixim bariksannen ieuzun polleiat. Bhavart dhorunk na tanche sovem khorai; punn tumche sovem dulôbai, tumi Tachê dulôbaient rauxeat zalear; na zalear, To tumkam-i moddun kaddtolo.

²³Judêv lokan aplo onbhavart soddun dilo zalear, tankam To portim bhitôr kaddtolo; kiteak novean bhitôr kaddunk Devak tank asa.

²⁴Zonglli olivache fantte tumi, tori astanam Tannem tumkam tumchê zati bhair ballgil’lea olivak garf korun laileant; toxem tôr, je zatin ballgil’lea olivache khande asle, te tanchea khaxa olivak porot lavunk Devak kitlem odik sompem!

²⁵Sorv videxi raxttrancho lok bhitor sortit porian, Israel porjecho ek vantto aplea vadeacho zaun gelo, tea gutta vixim tumi nennar zalelim mhaka naka, bhavam-bhoinnimnô, na zalear apunnuch xannim mhonn chintun tumi tumchech sombondim murgott’telet.

²⁶Ani hê bhaxen, “Xiona thaun ietolo Toronn-Dinnar, Jakobachea Ghorannea thaun tanchi obhokti To pois kortolo. Jedna tanchim patkam kaddun uddoitolom, tedna Hanv tanchê kodde ho korar kortolom.”, oxem boroilolem asa tea pormonnem Dev akhea Israelak soddvonn ditolo.

²⁸Bore Khobre sobondim, tãnnim ti manun gheunk na dekhun, tumam-videxeank lagun Judêv lôk Devacho dusman zalo tori tim vinchun kaddloli Devachi porza mhonntôch, tancheam purvozank lagun, tim vixexponnim Devachê chôdd opurbaiechim.

²⁹Karann, dil’lim dennim Dev pattim ghena, zankam apoileant tanchem apovnnem To pattim kaddina.

³⁰Zoxem, tumi-i eka vellar Devacheam adneank khaltim nasleat, punn Judêv lôk Devak khalto na zalo dekhun, tumam videxeank atam Tachi doiallai favo zali;

³¹toxench, tumam videxeank favo zal’li doiallaiê udexim, tankam-i ti Devachi doiallai favo zaunchê khatir, Judev lôk atam Devak khalto na.

³²Soglleank Apli doiallai dakhounchê khatir, sogllim mon’xam Devacheam adneank khaltim zaina zaunk, apnnench kel’lê hê bond-khonnint poddunk Devan tankam nirmilem.

³³Kitlo mhonn khôl Devachê girestkai, Tachê zannvaiechi ani Tachea gineanachi Kitli mhonn kholai! Tacheam nirnnoiancho koso mhonn tthav gheuop! Tacheô vattô koxeo mhonn somzop!

³⁴“Sorvesporachem mon konn tori zanno zala? vo Taka budh diupi konn tori asa?

³⁵Taka konnem adim-poilim dennem dilem, dekhun tacho upkar Devan farik korcho poddlo mhonn asa?”

³⁶Sogllem Tachê koddsun ieta, sogott Tachê udexim ani Tachêch pasot asa. Taka sasnnachea sasnnak mhoima! Amen!