Read Goan Konkani Rom 12 Bible Online

Rom 12 - Goan Konkani bible

Rom 12

¹Mhonntôch, bhavam-bhoinn- imnô, Devachê vhôdd konnva-llaiecho ugddas korun, tumchê lagim hanv magtam tem hem: povitr ani Devak man’ta tosli êk jivi boli koxi tumchench Taka somorponn korat — tumchi khori bhokti mhollear hich zaunchi.

²Hea atanchea sonvsaracheam nemam pormannem tumi cholum nakat; punn, zoxem Devan tumchea monachi novsornni kelea, toxench tumchea jivitachi chal-ui sarki novi zaum-di. Oxem Devachi khuxi konn ti, kitem borem, kitem Taka man’ta, ani kitem sopurnn tem tumi ollkhunk pavtelet.

³Karann, favo tachê poros odik tumchêch vixim chintinakat; punn, Devan mapun dil’lea bhavarta pormannem, zonn-eklean moriadin aplem mol korchem mhonn mhaka Devan funkea dil’lê doiallaiê udexim, tumkam zonn-ekleak sangtam.

⁴Zoxem amchê kuddik sobar sandhe asat, punn soglle sandhe tench kam’ korinant;

⁵toxench, ami sobar zannam zaun-ui, Krista sovem amcho ekchar zal’lean, ami êkuch kudd, ani amchê-modlo zonn-eklo hê kuddicheam dusream soglleam sandheank zôddlolo asa.

⁶Devan zonn-ekleak dil’lê doiallaiê pormannem, amkam veg-vegllim dennim asat: Devacho sondêx diunchem dennem zalear, ap-aplea bhavartachea mapa pormannem tacho upêg korcho;

⁷sobhechi seva korchem dennem zalear, zotnaien ti seva korchi; xikovpachem dennem zalear, fikirin xikounchem;

⁸dusreank dhir diunchem dennem zalear, hurben dhir diuncho. Dusreank kitem-i ditai tedna, udar monan di; tuka dusreancher odhikar dil’lo asa zalear, bhar gheun kaido pall; doiall kornneô kortai tedna, hanstea tonddan teô kôr.

⁹Tumcho pritimôg dhông-naslolo zaum-di. Vaittacho dvês dhorun, borem tench korit ravat.

¹⁰Khorim bhavbhoinn mhonn, moipasan ekamekachi opurbai korun dakhoiat; apnnam poros chôdd dusreank man diat.

¹¹Sogllea monan, besarmai korinastana, kallzachê hurben Somiachi seva korat.

¹²Tumkam bhorvanso asa mhonnun khuxal ravat; koxttam-dogdamnim thir ravat; thambonastanam magnnem korat;

¹³gorjek sampoddleleam tumcheam bhavam-bhoinnink modôt korat; vattsuran udarponn dakhoiat.

¹⁴Tumkam dhumallo diteleank axirvad diat: hôi, axirvad mhonntam, tancher xirap ghalum nakat.

¹⁵Khuxal asteleam borabôr khuxal zaiat; dukhest asteleam borabôr dukhest zaiat.

¹⁶Soglleankuch êkêch toren manan vagoiat. Gorvan fulon bhonvum nakat, punn lhanank-khalteank lagim gheiat. Apunnuch xannim mhonn chintinakat.

¹⁷Konnakuch vaitt vaittan farik korinakat, punn soglleam mon’xanchê nodrek kitem vortem tem korunk sôdat.

¹⁸Ghòddta zalear, soglleam lagim xantin jieunk tumchê kodde zata titlem korat.

¹⁹Mogacheamnô, peleachi sudd gheunk sodinakat, farikponn ghevpi Dev asa. Povitr Pustokar oxem boroilelem asa: “Farikponn ghetolo to Hanv; diunk zai tem ditolo to Hanv, uloita to Sorvespor.”

²⁰Anikui oxem boroilelem asa:”Tuzo dusman bhukela zalear, taka jevunk di; tanela zalear, taka pieunk di; kiteak oxem korun tum taka apleam kornneanchi loz bhogo-xi kortoloi.”

²¹Vaittak tujer zoit vhorunk dium naka, punn borem tem korun vaittak haroi.