Read Goan Konkani Rom 13 Bible Online

Rom 13 - Goan Konkani bible

Rom 13

¹Sogllim mon’xam sorkari odhikareank khaltim ravchim, kiteak Devan dilea xivai odhikar na, ani team odhikareank Devanuch nemleat.

²Mhonntôch, jim konn odhikar choloitoleank virôdh kortat, tim Devachê sthapnnek virôdh kortat; virôdh kortat tim apunnuch apnnancher khastichem formonn oddun haddtat.

³Borem korteleank nhoi, punn vaitt korteleank ki odhikareanchi bhirant asunk zai. Odhikareank bhienastanam asunk sôdtai? Tôr borem tem kôr ani tanchi tuka vakhann’nni asteli.

⁴Tujea boreak tim Devachi seva kortat. Vaitt mat korxi zalear bhieun rav, kiteak khast launk niz tanchi podvi; tim Devachi seva kortat dekhunuch, vaitt kortat tankam Devachi khast launk tim Devache chakor.

⁵Mhonntôch, Devachea krodhachê bhirantikuch lagun nhoi, punn tumchea ontoskornnak lagun tumi odhikareank khaltim ravchem poddta.

⁶Tumi dôndd farik kortat tachem karonn tench; kiteak sorkari mon’xam ghas gheun ho aplo kaido palltat tedna, tim Devachi seva kortat.

⁷Zonn-ekleak farik korchem asa tem taka farik korat: dôndd farik korunk zai taka dôndd farik korat; xidav farik korunk zai taka xidav farik korat; bhidda dhorunk zai tanchi bhidda dhôrat; man diunk zai tankam man diat.

⁸Konn eklo peleacho mog korta tannem somurt pall’lea dekhun, peleachea moga bhair konnacheach kosleach rinnant ravonakat.

⁹Heo adnea: “Pordvar korum noiê; jivexim marum noiê; chorum noiê; axa dhorum noiê; ani asat titlêo her soglleô adnea hê êkêch adnent attaploleô asat: “Tuzo môg kortai toso tujea peleacho kôr.”

¹⁰Môg peleak kãich vaitt korina; mhonntôch, jim konn môg kortat, tim Somurt sopurnnaien palltat.

¹¹Kall pavlo mhonn tumi tôr zannont; nhidentlim utthcho vogôt zalo. Ami bhavart dhôrlo tea disa poros amchi soddvonn atam odik lagim asa.

¹²Rat sorot aili, dis lagim pavlo; dekhun kallokacheô vaitt kornneô soddun dium-ia ani zhuzachim hatiaram gheun disa-uzvaddacheam kornneank lagum-ia.

¹³Disa-uzvaddak sobta toxem, mannsugen ami cholum-ia; mouza naka, bebdikai naka, pozoddponn vô bemoriad naka, zhogddim ani nattkaiô nakat.

¹⁴Tumchea patki soimbacheam vondovnneam pormannem cholum nakat; punn tancher zhuz korunk, khud’ Somia Jezu Kristak chittkun ravat.