Read Goan Konkani Rom 14 Bible Online

Rom 14 - Goan Konkani bible

Rom 14

¹Bhavartant ghott nhoi tankam lagim gheiat, punn tancheam khasgi motanchê babtint vad korinakat.

²Konn-konn aplea bhavarta pormannem apnnanchean sogllem khaum-ieta mhonn somzotat; punn dusrim, osokt tim, fokot xak-bhaji khatat.

³Jim konn apnnanchean kitem-i khaum-ieta mhonn somzotat, tãnnim kitem-i khainant tanchi beporva korchi nhoi; toxench jim konn kitem-i khaunk toiar nant, tãnnim kitem-i khatat tanchi zhôddti korchi nhoi, kiteak Devan hankam mandun ghetleant.

⁴Ani tum, dusreacheam chakranchi zhôddti korunk tum konn? Tim ubim asat ki bhi poddleant tem tancheach dhonian polleunchem; ani tim ubim ravtelinch, kiteak tankam ubim dovrunk Somiak podvi asa.

⁵Konn-konn disam modem ontôr kortat; dusrim soglle dis ekach mhotvache mhonn dhôrtat. Zonn-eklean ap-apli khatri korun gheunchi.

⁶Disam modem ontôr kortat tim Somiachea manak ti ontôr kortat; ani kitem-i khatat tim Somiachea manak khatat ani apunn khatat tea pasot Devak dhin’vastat. Toxench kitem-i khainant tim Somiachea manak khainant ani apunn khainant mhonn Devak dhinvastat.

⁷Amchê bhitorlim konnuch apnnan-chêch khatir jienant, ani konnuch apnnanchêch khatir moronant.

⁸Ami jivim asanv tim Somia khatir jietanv, ani morun vetanv zalear, Somia khatir mortanv. Mhonntôch, zaum jivim zaum melelim, ami Somiachim.

⁹Heach karannak lagun, mhonngê morun geleant tancher, toxench jivim asat tancher, Apnnem Aplo odhikar cholounchê pasot, Krist melo ani punorjivont zalo.

¹⁰Tôr kiteak mhonn tum tujea bhavachi vô bhoinnichi zhôddti kortai? Ami sogllim Devachea neai-asona mukhar ubim ravteleanv.

¹¹Kiteak Povitr Pustokar oxem boroilolem asa: “Mhojea jivachean — uloita to Sorvespor — sogllim Mhaka dimbi môddtelim; ani soglleô jibô Devak mhoima diteleô.”

¹²Mhonntôch, amchê bhitorlea zonn-eklean ap-apnnacho hixôb Devak diuncho poddtolo.

¹³Hea pasot, ami ekamekachi zhôddti ani-anink korchi nhoi; portench zalear, khõicheach bhavachê vô bhoinnichê vatter addkhôll ghalun tankam sokla uddoina zaunk vô patkant poddunk tankam soêg dina zaunk tumi tharav gheuncho.

¹⁴Somia Jezuchea ekcharant asun hanv hem sogllê khatren zannom: koslich vôst apnnapinch mhelli nhoi, punn ti mhelli mhonn chint’tat team mon’xank ti mhelli.

¹⁵Jevnna-khanna udexim tuzo bhavak vô bhoinnik dukhoilea zalear, tunch pritimogan cholonãi. Jea bhava vô bhoinni pasot Krist mela, tea bhavacho vô bhoinnicho tujea jevnna-khannak lagun nas zaunk dium naka

¹⁶Jem kitem borem mhonn tumi dhôrtat, tachem konnuch vaitt ulounk pavum noiê.

¹⁷Kiteak Devachem Raj mhonn’lear, khann-pivonn nhoi; punn Dev amkam Apnnak manovlelim korta to amcho bhês ani Povitr Atmeachea ekcharant ami bhogtanv ti xanti ani sontos.

¹⁸Kiteak hê ritin Kristachi seva kortat tim Devak manovtat ani mon’xam modem borem nanv zôddtat.

¹⁹Mhonntôch, xanti bhogunk ani ekamekak dhir diunk pavoita tê vatten cholum-ia.

²⁰Jevnna-khannak lagun, Devan kela to vaur padd korinaka. Jevnna-khannacheô soglleô vostu xud’dh, khorem; punn omkem tem khaun peleak patkant ghaltai mhonn tuka dista zalear, tem ki vaitt.

²¹Mas khainastana, vô soro pienastana, vô tujea bhavak vô bhoinnik patkant ghalta tem korinastam ravlear odik borem.

²²Jem tum khatren manun ghetai, tem tujê bhitôr Deva mukhar samball. Jeam konnank apunn kortat tem aplea mona pormannem sarkem asa mhonn dista, tim mon’xam bhagi.

²³Apunn khatat tachê vixim dubhav dhôrtat tim Deva mukhar guneanvkar zatat, kiteak tanchi kornni bhavartachê khatrecher dhòrloli na, ani bhavartachê khatrecher dhòrlelem na tem sogllem patok.