Read Goan Konkani Rom 15 Bible Online

Rom 15 - Goan Konkani bible

Rom 15

¹Ami ghott asanv tannim, osokt asat tancheô osoktaiô sõsun gheunk amcho kaido; amchich khuxi ami korchi nhoi.

²Bhavam-bhoinnink bhavartant ghott korchê khatir tankam kitem borem tem polleun, zonn-eklean dusreank man’ta tem korchem.

³Tôr Kristan-ui Apnnakuch man’ta tem korunk sôdlem na. Portench zalear, Povitr Pustokar boroilelem oxem asa: “Tuka kênddtat tancheô kênddnneô mhojer poddleô.”

⁴Jem sogllem adim boroun dovorlam, tem amcho bhorvanso upzounk boroilam, kiteak Povitr Pustokar boroilelem asa tem amkam thir ravunk xikoita ani dhir dita.

⁵Tumi Krista Jezucho pattlav kortat dekhun, sosnnikaiechea ani ghottaiechea Devan tumkam tumchêch modem, eka monachim korum;

⁶oxem tumi borabôr eka tallean Devak, amchea Somia Jezu Kristachea Bapak, vakhannunk pavtelet.

⁷Mhonntôch, zoxem Kristan tumkam moipasan lagim haddleant, toxench, Devak mhoima diunchê pasot, tumi-i ekameka thãi moipaxi zaiat.

⁸Hoi, hanv tumkam sangtam: porzapotink kel’leo bhasavnneo visvasponnan pallche khatiruch nhoi, bogor vedexeamnim Devak Tache doiallaie pasot vakhannche khatir, Krist sunot kel’leam Judevancho chakor zalo. Tor Povitr Pustok sangta: “Hea pasot raxttram modem Tuka nanvaddtolom, Tujea Nanvachea manak stotram-gitam gaitolom.”

¹⁰Ani dusrea eka zagear oxem sangta: “Raxttramnô, Tachê porjê borabôr anondbhorit zaiat.”

¹¹Ani anink êkê kodden oxem sangta: “Somest raxttramnô, Sorvesporak vakhannat; sorvoi porzamnô, Taka nanvaddat.”

¹²Tea bhair, Izaias-ui mhonnta: “Jes’sechem Pall ubem zatelem, raxttrancher odhikar cholounk To dixtti poddtolo: Tacher raxttram aplo bhorvanso dovortelim.”

¹³Bhorvanso dita to Dev tumchea bhavartant tumkam anondan ani xantin bhorum; oxem Povitr Atmeachea bollan tumcho bhorvanso odik-odik vaddot vochum.

¹⁴Mhojeam bhavam-bhoinnimnô, tumchê vixim mhaka mhojea monant kosloch dubhav na: tumi khorench borim mon’xam, soglleachi tumkam bori ollokh asa, ani hea pasot tumchean ekamekak budh diunk zata.

¹⁶Videxean-chem somorponn Devak man’ta toslem ani Povitr Atmean sonvskarlelem zaunk, Devachi bori khobor porgottunk, iadnikponnache zababdaren, videxeank Jezu Kristacho hanv sevok zaunk, Devan mhaka dil’ea doiallaieachea hea dennaek lagun,tumkam novean ugddas korunk, mhonnun thoddê kodden kalljidarponnan hanvem tumkam boroilam.

¹⁷Tôr, hanv Deva pasot vavurlam tê vixim, Jezu Kristachea ekvottant mhaka obhiman bhogunk nimit asa.

¹⁸Videxeank Devak khaltim korunk, mhojeam utram ani kornneam vorvim, jem Kristan kelam, tachi mat khobor hanv dhir dhorun sangtam:

¹⁹mhoje udexim Tannem vhodd-vhodd khunna ani vismitam kelim ani mhojê sovem Devachea Atmeachi xokti fankoili. Oxem Jeruzalea thaun Ilirikuma porian bhonvun kaddun Kristachea Xubvor-tomanachi hanvem porgottni kelli.

²⁰Punn, “Zankam Tachi khobor porgott zaunk na, tim Taka polletelim; ani zãnnim Tachê vixim aikunkuch na, tim somzotelim.”, Oxem Povitr Pustok sangta tea pomonnem, Her dusreanche buneadir hanvem bandina zauche pasot, zõi Kristak porgottinasla, thõi bori khobor porgottunk hanvem mhozo hetu kela.

²²Heach karannak lagun, tumche-xim ieunk, zaite pauttim addvon urlam.

²³Punn atam heam ganvamnim mhozo vaur korun zala, ani sobar vorsam thaun, tumchê sorxem ieunk, mhaka axa aslea,

²⁴te khatir, Ispaniek hanv vochon tedna, vatter tumkam bhett diunk sôdtam. Ani tumcho sangat thoddo vêll bhôglea uprant, fuddem vochunk tumi mhaka adar diteleat mhonn ravtam.

²⁵Punn atam sodeak, Jeruzaleant asteleam Devacheam bhoktanchi seva korunk hanv thõi vochunk asam.

²⁶Jeruza-leacheam Devacheam bhoktantleam gorib-dublleam pasot êk bhavponnachi vorgonni zomoun dhaddunk Maxe-doniek ani Akaient asleleam povitr-sobhamnim udar monan tharailam.

²⁷Hôi, oxem hãnnim ap-khuxen tharailam, punn khorem mhollear tim tanchea rinnant asat; kiteak tancheam atmik denneamnim bhavarti videxiank vantto mell’la mhonntôch, hea sonvsaracheam denneamnim tankam bhav-bhoinnponnan modôt korun videxi bhavarti ek rinn farik kortat.

²⁸Hem kam’ sompoitôch ani zoma kel’li ani mhozo xik’ko asleli akhi vorgonni tanchea hatant dilea uprant, hanv tumchê vatten sorun Ispaniek vetolom.

²⁹Tumchê-xim ietolom tedna, Kristachea axirvadachi bhorti gheun pavtolom mhonn mhaka khatri asa.

³⁰Judeiant ravtat ani amcho bhavart manun ghenant team Zudevanchea hatantlo hanv suttom mhonn ani Jeruzaleant hanvem korchi asa ti seva Devacheam bhoktank manche khatir, ani oxi, Devachi khuxi zalear, tumchê sorxem khuxalkaien ieun tumchê sangatim mhozo jiv somadhan zaunk, Bhavam-bhoinnimnô, mhoje khatir, amchea Somia Jezu Kristachea nanvan, ani Povitr Atmean kallzamnim ghalta tea moga pasot, mhojea vangdda ravun ani khotkhotit magnneamnim Devak vinoti korunk, hanv tumkam ulo kortam.

³³Xanti dita to Dev tumam-somestam sovem asum. Amen.