Read Goan Konkani Rom 16 Bible Online

Rom 16 - Goan Konkani bible

Rom 16

¹Febe bhavartant amchi bhoinn mhonn tumkam tichi ollokh korun ditam. Kenkreiant asa tê povitr-sobhechi ti sevika.

²Somiachea nanvan Devacheam bhoktank sobta toxem tika borê bhaxen gheiat; ani tumchi tika kosli-i goroz poddot zalear, tika adar diat, tôr sobar zannank ani mhaka-i ti pavlea.

³Priskek ani Akuilak hanvem vicharlam mhonn sangat; Jezu Kristachê sevent tim mhojim bhagidaram.

⁴Mhozo jiv rakhunk aploch jiv sonkottant ghalunk tim pattim sorunk nant; dekhun hanvuch nhoi, punn videxeancheô soglleô povitr-sobha tanchea upkarant asat.

⁵Tanchea ghorant zomta tê povitr-sobhek-ui mhozo nomoskar. Epenetak, mhojea ixttak, hanvem vicharlam mhonn sangat; to Aziechea prantan Kristak dil’lem prothom’ foll.

⁶Mariek mhojem noman; tinnem tumchê pasot zaito vavr kela.

⁷Andronikak ani Juniusak mhozo manacho nomoskar; te mhojê bhaxen Judêv porjentle ani mhojea vangdda te bondkhonnint asle; te nanvvoste dhormdut asle ani mhojê adim Kristachê pattlavdar.

⁸Ampliatusak noman: Somia sovem to mhozo chôdd mogacho ixtt.

⁹Kristachê sevent amchea sohovangddia Urbanak ani Stakusa, mhojea mogachea ixttak, noman.

¹⁰Apel’lesak noman: Kristacho apunn visvaxi sevôk mhonn tannem dakhoilam. Aristobolus hachea ghoranneantlea zonn-ekleak noman.

¹¹Herodionak vicharlam mhonn sangat: mhojê bhaxen to-i Judêv. Somiacho pattlav kel’leam Narxizachea ghorann-eantleank noman.

¹²Somiachê sevê-chakrent vaur korpeam, Trifenak ani Trifosak mhozo nomoskar. Perxis, mhojê chôdd mogachê ixttinnik, noman: tinnem-i Somia khatir khup vavr kela.

¹³Somiachea ekvottant vinchlelea sevoka, Rufusak,ani tachê avoik mhozo môg diat: ti mhaka aplo put koso ballgita.

¹⁴Axinkritus, Flegon, Hermes, Patrobas, Hermas, hankam ani tanchea vangdda asleleam amcheam bhavam-bhoinnink hanvem tancho ugddas kela mhonn sangat.

¹⁵Filologusak ani Juliek, Nereusak ani tachê bhoinnik, toxench Olipasak, ani tanchea vangdda asleleam Devacheam somest bhoktank noman kortam.

¹⁶Somiachea ekvottant tumi bhavbhoinn mhonnun, ekamekak tumchea mogachi khunna diat. Kristacheam soglleam povitr-sobhancho tumkam maiêmogacho nomoskar.

¹⁷Bhavam-bhoinnimnô, jim konn tumchê modem futti ghaltat ani tumi ghetlolê xikovnnechê vatter addkholli ghalun tumkam bhavarta thaun koddsoraunk sôdtat, tanchê vixim chotur ravat ani tankam pois dovrat mhonn hanv tumchê lagim magtam.

¹⁸Oslim mon’xam Krista amchea Somiachim nhoi, bogor aplea pottachi chakri kortat. Godd-godd ani bhulov-nnecheam utramnim tim nennteank fosoitat.

¹⁹Tumi bhavartak khaltim mhonn sogllê kodden khobor pavlea dekhun, tumchê vixim hanv dhadoxi; punn tumi fokot borea vixim xannim ani sogllea vaitta vixim nenntim zaiat: itlench mhaka zai.

²⁰Ani xanti dita to Dev Soitanak veginch tumcheam pãiam tolla ghalun mostitolo. Jezu Krist amcho Somi tumkam sodanch Aplem bholeponn dakhoum mhonn magtam.

²¹Mhozo sohokari Timot tumkam noman korta; toxench Luxius, Jason ani Soxipater: he-i mhojê bhaxen Judev.

²²Hanv, Terxius, hem potr boroun kaddlam to, Somiachea ekvottant tumkam noman kortam.

²³Gaiusachea ghora hanv ravtam ani hangach amchi akhi sobha zomta. Tacho-i tumkam nomoskar; Erastus, hea xaracho bhanddari, ani amcho bhav Kuartus tumkam noman kortat.

²⁵Zaito kall adim, lipoun dovorlelea gupit sotache prokasnne pormonnem, punn atam tori, provadeancheam boroupam udexim, ugtteponnim dakhoilam tem sot; ani sogllim bhavart dhorun khaltim zaunche khatir, soglleam raxttrank kollit kelam tench sot, Jezu Krista vixim hanv porgott kortam te Bore Khobre pomonnem, bhavartant tukam ghott korunk tank asa tea Devak, mhonge sorv zannar Ekleach Devak, Jezu Krista udexim mhoima sasnna-sasnnak! Amen.