Read Goan Konkani Rom 2 Bible Online

Rom 2 - Goan Konkani bible

Rom 2

¹Ixtta mhojea, dusreancher tum nitichem formonn martai? Karonn dusrim mon’xam kortat tinch kortubam tum-i adartai; mhonntôch, team dusreanchi tum zhôddti kortai tedna, tum tujeruch tujea guneanvachem khastichem formonn martai dekhun, konn-ui tum zaxi, tuka koslench nib na.

²Oslim kortubam kortoleancher Dev khastichem formonn marta tedna, Tachem formonn nitichem mhonn ami zannonv.

³Ani oslim kortubam korteleancher nivaddo ditai ani tinch kortubam tum kortai tedna, O monxa, Devachi khast vattaitoloi mhonn dista tuka?

⁴Vô Jivit-mon bodlunk tuka oddun haddto Devachi konnvallaiechi khobor nastana, To subham’ konnvallaiecho, vhôdd sosnnikaiecho ani mhatme-ponnacho mhonn, tum Tachi beporva kortai?

⁵Tujem kalliz nibor korun jivit bodlunk tum kobul zainãi; oxem korun, Devacho niticho nirnnoi porgôtt zatolo tea Tachea krodhachea Disak Tachea krodhacho bhar tujea mathear tum vaddoit asai.

⁶Tea disa To zonn-ekleak ap-apleam kornneam pormannem farik kortolo:

⁷jim konn borem tem korit ravtat ani mhoima ani man ani ovinaxiponn sôdtat, tankam To sasnnik jivit ditolo;

⁸punn jim konn aploch adav sôdtat, sot mandun ghenant ani khotteponnak lobhdol’lim asat, tankam krodhacho uzo dovorlolo asa.

⁹Vaitt adartelea zonn-eklea mon’xak Koxtt ani tollmolle ravtat — Judevank poilê svater, punn Grikank-ui;

¹⁰mhoima ani man ani xanti borem kortolea zonn-ekleak - Judevank poilê svater, punn Grikank-ui.

¹¹Tôr Dev hachem-tachem tondd polleun Aplo nirnnoi dina.

¹²Zãnnim Somurti virêt patok kelam, team mon’xancho Somurti virêt nas zatolo; zãnnim Somurt gheun patok kelam, tanchi Somurti pormannem mon’subi zateli.

¹³Somurti vixim aikopi konnuch Devak manov-lelim zainant; punn Somurt palltat tankam ki Dev Apnnak manovlolim kortolo.

¹⁴Somurt naslolim videxi mon’xam soimbachea uzvaddan Somurti pormannem choltat tedna, zorui tankam Somurt na, torui tim apnnankuch somurt zatat.

¹⁵Somurt formaita tem apleam kallzancher boroil’lem asa mhonn tim aplê chalin dakhoitat; tanchem ontoskornn hakach govai dita, kiteak mhollear tanchinch chintnam kedna-kedna tim opradi mhonn ani kedna-kedna tim niropradi mhonn tankam dakhoitat.

¹⁶Hanv porgôtt’tam tea xubhvhortomana porma-nnem, Jezu Krista vorvim mon’xan-cheam gupit chintnam-bhavnanchi porian Dev, tea Disa, mon’subi kortolo.

¹⁷Atam tujem kitem? Tum apunn Judêv mhonntai, Somurticher tum patieun asai, tujea Devacho tuka obhiman asa,

¹⁸Tachi khuxi tum ollkhotai, ani Somurt xiklai dekhun vaitt soddun kitem borem vinchun kaddchem tem tum somzotai;

¹⁹tum kurddeank vatt dakhovpi, kallokant asleleancho tum uzvadd,

²⁰budh-nasleleancho tum xikovpi, sadeam-bholeancho tum guru mhonn tuka tujich khatri zalea, kiteak Somurtint soglli zannvai ani sogllem sot attaplolim tuka melltat.

²¹Tum herank tôr xikoitai, tukach kiteak xikoinãi? Chorchem noiê mhonn dusreank updês ditai, tôr tunch chôrtai?

²²Pordvar korum noiê mhonn sangtai to tum, ani tunch pordvar kortai? Murtim-puttleancho kanttallo dhôrtai to tum ani tunch devllam nagoitai?

²³Somurtichi vhoddvik sangtai to tum tor tunch Somurt môddtai mhonntôch, ti somurt moddun tum Devak okman kortai?

²⁴Tôr Povitr Pustokar oxench boroilolem asa: “Raxttram modem Devachea Nanvachi ninda zata ti tumkanch lagun.”

²⁵Tum Somurt samballtai zalear, sunôt tuka upkarta khori; punn Somurt môddtai zalear, sunôt tunvem kelea astam-i, ti korinaslelê porim zaloi.

²⁶Sunôt korunk na to videxi monis Somurtiche kaide pallta zalear, Deva mukhar to sunôt kel’lea Judêv mon’xa sarko zauncho na?

²⁷Boroileli Somurt hatant gheun ani sunôt korun-ui tum Judêv Somurt môddtai mhonntôch, aplê kuddichi sunôt korunk na to videxi monis Somurt pallun tum opradi mhonn dakhoun ditolo.

²⁸Judev mhonn’lear bhailean dista to nhoi; ani sunot mhonn’lear bhailean, kuddicher asa ti nhoi.

²⁹Portench zalear, bhitorlean zaun aspi, to ki khoro Judev; ani khori sunot, kallzachi, nhoi boroilele somurtichi, punn Devachea Atmeachem kam’ tem. Oslea mon’xak her dusream koddchi nhoi, bogor Devakoddchi vakhann’ni mellta.