Read Goan Konkani Rom 3 Bible Online

Rom 3 - Goan Konkani bible

Rom 3

¹Mhonntôch Judêv zaun ogllo adav koslo? Vô sunôt korun upêg koslo?

²Khup, soglleam vattamnim. Poilê svater, Devan Aplo sondêx tanchê svadhin kelo.

³Tanchê bhitorlim thoddim zannam ovisvaxi zalim zalear, kitem zalem? Tim ovisvaxi zalim mhonnun, Devachem-i visvaxiponn bhongtolem kitem?

⁴Na ki na! Sogllim mon’xam fottkirim zalear-ui, Dev sotevont zaunkuch zai; tôr Povitr Pustokar oxem boroil’lem asa: “Mhojer formonn martai tedna, Tujem formonn nitichem; mhoji zhôddti kortai tedna, chuki virêt Tuji zhôddti.”

⁵Punn zôr jitlim ami onitivont zatanv titlo odik Dev Tachê doiallaien nitivont mhonn dokhol zata, tôr ami kitem mhonnchem? Mon’xachê chaltê bhaxen vichartam: Aplea krodhachi xikxa Dev amcher tapta tedna, To oneai korta mhonn amchean sangum-ieta?

⁶Na ki na! Dev zôr onit korta, koso mhonn To sonvsaracho Mon’subidar zatolo?

⁷Zôr hanv fottkiro dekhun Dev sotevont mhonn odikuch dokhol zata ani oxi Tachi mhoima vaddta, tor mon’subent hanv guneanvkar mhonn mhojer formonn kiteak?

⁸Oxem zal’lem tôr, borem kitem utpon zaunchê khatir kiteak vaitt korchem nhoi? Oxench hanv xikoitam mhonn sangun mhojer kãi zannam boglanttam ximpddaitat. Osleam mon’xank ki guneanv asa mhonn sanglear onit na.

⁹Mhonntôch kitem? Videxeanchê poros Judevanchi poristhiti odik bori? Kednanch na. Judev ani Grik, sogllinch ami patkachê adhin asanv mhonn hanvem tôr spoxtt sangun dakhoilam.

¹⁰Povitr Pustokar oxem boroilolem asa: “Boro mhonnlolo monis eklo porian na,

¹¹Somzota toslo konnuch na, Devak sôdta to konn-êklo na!

¹²Sogllim kuxin sorleant, soglleanchi chal zaun gelea noxtti. Borem korta to konnuch na, na, eklo porian na!

¹³Ugtea fondda sarko tancho gollo, tanchê jiber fokot ghatki utram. Onttantlean gollta furxeachem vikh;

¹⁴tanchem tondd xirapamnim ani koddsannin bhòrlam.

¹⁵Niropradi rogot vikraunk tanche pãi suddsuddit dhanvtat,

¹⁶vetat thõisôr fokot nisonttonn ani odruxtt.

¹⁷Xantichea margachi tankam khoboruch na,

¹⁸tancheam dolleam mukhar Devachi bhirant mhonn’lear nanch!”

¹⁹Apleam kortubank konnench koslinch nibam diunk zaina zaunk ani soglleam mon’xamnim Devachê mon’subecho nirnnoi gheunchê khatir, Somurt sangta titlem-i Somurtichê adhin asat tankanch lagu zata mhonn ami zannonv.

²⁰Somurti udexim patkachi ollok asta dekhun, Somurtichim kortubam korun, konnuch Devak manovlelim zainant.

²¹Punn atam Somurtichê manddavolli bhair, Jezucher bhavart dhorteleam monxank, Dev Apnnak manovlelim korta tem zalam ani te vixim Somurtin ani Provadeamnim-i govai dilea.

²²Dev koslich ontôr korina dekhun, tench Devachê doiallaiechem nitivontponn Jezu Kristacher bhavart tthevtoleam somestank pavta.

²³Khorench, sogllim patki zalim, ani Aplê mhoiment vantto gheunk jem Devan mon’xank nirmil’lem tem tankam chuklem.

²⁴Atam, Devachê funkott-doiall kurpen, Jezu Kristan mon’xank dil’le suttke udexim, tim funkea Devak manovlelim zatat.

²⁵Bhavart dhôrteleam khatir Devan Jezuk Aplê rogot varoun bhogsonnem divpachi boli zaunk nemla: oxem korun Tannem Aplem doiallaiechem nitivont-ponn porgott kelem, poilê svater adlea kallar kel’leam patkam pasot, kiteak tea kallar Tannem sosnnikai dhorun patkank favo asleli xikxa lavunk na;

²⁶ani toxench atam hea amchea kallar kel’leam patkam pasot, kiteak Aplem nitivontponn doiallaiechem mhonn ani Jezucher bhavart tthevteleam somestank Apunnuch Apnnak manovlelim korta mhonn Dev dokhol korta.

²⁷Mhonntôch boddai anink khõi asa tor? Ti kuxin dovorli. Kosle somurti vorvim? Vaura-korneam somurti vorvim? Na. Bhavartach vorvim.

²⁸Kiteak Somurtiche kaide pallun nhoi, punn bhavarta udexim ki mon’xam Devak manovlolim zatat: hi amchi khatri.

²⁹Dev Judevanchoch Dev tôr? Videxiancho-i nhoi To? Videxiancho-i to Dev mhonn dubhavuch na.

³⁰Kiteak Dev Ekloch: To sunôt kel’leank, tanchea bhavartak lagun, Apnnak manovloeim korta; ani Toch sunôt korunk na tankam-i, tanchea bhavarta udexim, Apnnak manovlelim korta.

³¹Mhonntôch kitem? Bhavart bhitôr kaddun ami Somurticho ôrth bhair martanv? Na ki na! Ufrattim, ami Somurticho khoro ôrth dakhoun ditanv.