Read Goan Konkani Rom 4 Bible Online

Rom 4 - Goan Konkani bible

Rom 4

¹Rogta-masa pormannem amchea purvoza, Abrahamak kitem mell’lem ami mhonnchem?

²Zôr apleam kornniam udexim Abraham’ Devak manovlolo zal’lo, tôr tannem boddai dakhoum-iet, punn Deva mukhar nhoi.

³Tôr Povitr Pustok kitem sangta? “Abrahaman Devacher bhavart dovorlo ani, hea tachea bhavartak lagun, taka Devan Apnnak manovlolo kelo.”

⁴Apnnem kel’leam kamancho konn muxaro ghetat tôr, ho tancho muxaro funkeachem dennem mhonn konnuch lekhinant, punn to tankam devo mhonn lêkhtat.

⁵Ufrattim, konnui, apnnem kel’lim kamank lagun nhoi mhonn, ani patkeank porian Dev Apnnak manovlelim korta mhonn hea Devacher bhavart dovortat, toslea tanchea bhavartak lagun, Dev tankam Apnnak manovlelim korta.

⁶Mhonn’toch, Dev Apnnak manovlolim korta tem, tancheam korneam-vaurak lagon nhoi mhonn, Devacher bhavart dortat tim bhagi mhonn, David oso uloita:

⁷“Guneanvachem bhogsonnem zôr mell’lem, patkachem khot zôr dhuun kaddlem, monis kitlo bhagi!

⁸Zancher Dev tancho guneanv tapina, tim mon’xam kitlim mhonn bhagi!”

⁹Hem bhagiem konnank lagta? Sunôt kel’leankuch, vô sunôt korunk na tankam-i? Tôr ‘Abrahamak tachea bhavartak lagun Devan Apnnak manovlolo kelo’, oxem ami mhonntanv.

¹⁰Hem kedna ghòddlem? Tannem sunôt kelea uprant, ki korchê adim? Kelea uprant nhoi, punn ti korchê adim;

¹¹Sunot korche adim, apnnak aslolo tea bhavartak lagun, Devan apnnak manovlolo korpacho ek xik’ko koso sunotichi khunna tannem ghetli. Sunot korche adim bhavart dhortat ani Dev Apnnak manovlelim korta tancho to purvoz zaunche khatir Devan oxem kelem.

¹²Ani sunôt kel’leancho bapui, nhoi fokot sunôt kel’lim asat tancho, punn bogor sunot korche adim amchea puvoza, Abrahamak aslo tea bhavartan choltat tancho-i bapui to.

¹³Abrahaman Somurt pall’leli mhonn nhoi, punn tannem Devacher tthevlelea bhavartak lagun taka Devan funkea Apnnak manovlolo kelo dekhun, sonvsar tanchem daiz zatelem mhonn Devan Abrahamak ani tachê sonstik bhasavnni keli.

¹⁴Kiteak daiz Somurt palltat tanchench zait zalear, bhavart zalo polko ani bhasavnni zali ôrth-nasleli.

¹⁵Khorench Somurt fokot Devachea krôdhak zago korta; punn Somurt zôr na, thõi Somurt moddunk konnuch xokona.

¹⁶Mhonntôch Devachi bhasavnni bhavartak lagun mellta; oxi ti ek funkeachem dennem tem ani Abrahamachê sogllê sonstichi ti jerul zata - mhonngê fokot Devachi Somurt pavlea tanchich nhoi, punn Abrahama porim bhavart dhôrtat tanchi-i ti zata, kiteak Abraham amam-somestancho bapui.

¹⁷Tôr Povitr Pustokar oxem boroilolem asa: “Khub raxttrancho Hanvem tuka bapui kela.” Khorench, zo Dev mel’leank jivit dita ani nant teô vostu aso-xeô korta, Tea Deva mukhar Abrahaman bhavart dhorlo.

¹⁸“Tuji sonsôt itli vhôdd zateli”, oxem taka Devan dil’lea utra pormannem, bhorvanxeachem ek kirnn porian asum nozo aslem tedna, “khub raxttrancho bapui” apunn zatolo mhonn tannem bhorvanso dhorun, bhavart dhorlo.

¹⁹Taka ogllim-unnim xembhôr vorsam zal’lim; tôr apli kudd mel’lea mon’xachê kuddi sarki zalea ani tosoch Saracho kusvo jiv-naslolo zala mhonn polleun-ui, tacho bhavart donvddoll’lo na;

²⁰Devachê bhasavnnê mukhar dubhavun to pattim-fuddem sorlo na; punn bhavartantli tannem ghottai ghetli ani Devak vakhann’nni dili.

²¹Tôr Apnnem bhasailam titlem-i xarti pavounk Devak podvi asa mhonn taka purnn khatri asli;

²²Heach pasot, hea tachea bhavartak lagun, Abrahamak Devan Apnnak manovlolo kelo.

²³Punn “bhavartak lagun taka Devan Apnnak manovlolo kelo”, oxem jem Povitr Pustokar boroilolem asa, tem tachêch pasot nhoi,

²⁴punn amchê-i pasot. Amchea Somia Jezuk mel’leantlo punorjivont kela Tacher ami bhavart dovortanv ani haka lagun amkam-i Dev Apnnak manovlelim kortolo;

²⁵kiteak khorem mhollear amcheam opradank lagun Devan Taka mornnachê adhin kelo ani amkam Apnnak manovlelim korchê pasot Taka punorjivont kelo.