Read Goan Konkani Rom 5 Bible Online

Rom 5 - Goan Konkani bible

Rom 5

¹Bhavarta vorvim Devan amkam Apnnak manovlelim keleant dekhun, amchea Somia Jezu Krista udexim Deva thaim ami xantin jietanv;

²tôr ami atam onnbhovtanv ti Devachi doiallai Tannench amkam bhavarta vorvim bhogunk pavoileant; ani Takach lagun Devachi mhoima amkam mellteli mhonn bhorvanso dhorun ami murgott’tanv.

³Titlench nhoi; dhumalleam thaun sosnnikai upzota, sosnnikaiê vorvim amchi topasnni zaun Devak ami manonk pavtanv; ani topasnnen Devak manovleanv mhonntôch, amcheam kallzamnim bhorvanso upzota mhonn zanna zaun. ami dimalleamnim murgott’tanv

⁵Amkam dil’lea Povitr Atmea udexim, Devan amcheam kallzamnim Aplo môg ôtla dekhun, bhorvanso amkam fottoina,

⁶Zorui amchean samkench kainch korunk zainaslem torui Kristan, Aplo nemlolo vêll pavtôch, khotteam pasot Aplo jiv dilo.

⁷Eka promannik mon’xa pasot legun jiv diunk konnak-ui kotthin; tori eka borea mon’xa pasot konn-êk eka vellar morunk fuddem sortolo.

⁸Punn ami patki zaunui, Krist amchê pasot melo te vixim Dev amkam Aplea mogacho puravo dita.

⁹Tachea bolidanik mornnak udexim Devak ami atam manovlelim zaleanv mhonntôch, Taka lagun, Aplea krodhantlim Dev amkam odikuch nivartolo.

¹⁰Ami dusman asleanv tedna tor, Aplea Putachea mornna udexim Devan amkam Aplea mogachê vengent portun ghetlim tor; amkam Aplea mogachê vengent portun ghetlea uprant, teach Aplea Putachea jivita udexim To amkam purnn taronn ditolo.

¹¹Itlaenuch nhoi, punn Tachê vorvim amkam atam Aplea mogachê vengent portun ghetleant mhonn amchea Somia Jezu Krista udexim Deva sovem ami sontostanv ani murgott’tanv!

¹²Hea pasot, eka mon’xa udexim patok hea sonvsarant bhitôr sorlem ani patka udexim moronn; ani oxem, soglleamnim patok kelem dekkhun soglleam mon’xank moronn pavlem.

¹³Devan Somurt diunchê adim patok sonvsarant aslem. Somurt nasli mhonntôch, Somurt môddlea mhonn konnachoch guneanv korunk zainaslo.

¹⁴Tori astanam, dil’lo kaido mon’xamnim Adanva porim moddunk nastanam-i, Adanva thaun Moizesa porian mornnan somestancher raj choloilem. Adanv mhollear ieuncho aslo tea Mon’xacho purv-rupkar.

¹⁵Adanvachem patok ani Devachi funkea dakhoiloli doiallai, hanchê modem sôr korunkuch zaina. Eka mon’xachea guneanvan soglleam mon’xank moronn pavlem zalearui, eka mon’xa Jezu Krista vorvim somest mon’xank tea von odik subham’ponnan funkea favo kel’lem, Devachê doiallaiechem tem dennem zalem!

¹⁶eka mon’xachea guneanvan monxank kitem mell’lem tem, Devachea dennean monxank kitem mell’lem taka sôr korunkuch zainam! Kiteak mhonn’lear, eklea mon’xachea patka uprant zhôddti zali ani khastichem formonn poddlem, punn khub-khub guneanvam uprant, mon’xank Devak manovlelim korta tem funkea Devan dil’lem dennem ailem!

¹⁷Eka mon’xa vorvim, tachea opradak lagun, somestancher mornnan raj choloilem zalearui, Ekleach Jezu Krista udexim Aple subham’ doiallien Devan Apnnak manovlelim korta tim somest monxam tea von odik chodd jivitchem raj choloitelim.

¹⁸Mhonntôch, zoxem eka mon’xachea guneanvan somest mon’xancher khastichem formonn poddlem, tech porim, eka mon’xache Devak monovto purnn kornne udexim Dev Apnnak monovlelim korta tem funkea dennem somest mon’xank mell’lem.

¹⁹Eklo monis Devachê adneak khalto ravlo na dekhun sogllim mon’xam patki zalim; toxench eklo monis Devachê khuxek khalto ravun, sogllim mon’xam Devak manovlelim zatelim.

²⁰Somurt bhitôr sorli ki guneanv choddon-vaddon gelo; punn zõi patok choddlem-vaddlem, thõi Devachi doiallai tachê-von odik choddli-vaddli;

²¹hê porim, zoxem patkan mornna vorvim raj choloilem, toxench atam Devachi doiallai, amchea Somia Jezu Krista udexim, amkam Sasnnik Jivitak pavoita ani amkam Devak manovlelim korun raj choloita.