Read Goan Konkani Rom 6 Bible Online

Rom 6 - Goan Konkani bible

Rom 6

¹Mhonntôch, ami kitem mhonnchem? Devachi doiallai odik subham’ zaunchê khatir, ami patkantuch ravchem?

²Na ki na! Patkak meleanv tim ami koxim mhonn ami ozun patkantuch jietoleanv?

³Jezu Kristachea ekovottant batism ghetla titlim-im ami sogllim Tachea mornant batism ghetla mhonn nokllot tumi?

⁴Tea passot, batisma udexim, Tachea vangdda Tacheach mornnant amkam nikhipileant tem, zoso Bapan Aplê mhoimêbhorit podven Kristak mel’leantlo punorjivont kelo, toxench ami-i jivitache nove chalin ami cholchê khatir.

⁵To mela toso morun, ami Tache bori ek zaleanv zalear, To jivont zala toso ami-i jivont zaun, Tache bori ek zatelenv.

⁶Hea amchea patki soimbacho bhosm korchê khatir ani patkachea gulam’ponnantli amkam suttka mellchê pasot, amchea adlem-pornnem soimb khursar marlam mhonn ami zannonv.

⁷Kiteak meleant tim mon’xam patkachê podventlim suttleant.

⁸Punn Krista borabôr ami meleanv zalear, Tachê borabôr ami jietelenv mhon amkam bhavart asa.

⁹Kiteak Kristak Devan mel’leantlo punorjivont kelo mhonntôch, Taka ani-anink moronn na; mornnak Tacher ani-anink koslich podvi na mhonn ami zannonv.

¹⁰Ani oso To melo dekhun, patkak ani-anink Tacher podvi na, ani To atam jieta tem jivit sogllench Devachea ekcharant jieta.

¹¹Tôr tumchê-i vixim oxench somzat ki tumi-i patkachê podvek mel’lim zaleant, ani Krista Jezu udexim Devachea ekcharant tumchem-i jieop.

¹²Hea pasot tumi tumcheam kuddicheam vondovnneank pallo diunk poddona zauncheak, tumchê mornnadik kuddicher patkan ani-anink raj cholounchem nhoi.

¹³nhoi mhonn tumchê kuddiche sande patkachea khotteponnachim hatiaram zaunk dinakat, portench zalear, mornnantlim jivim zal’lim koxim Devak tumchench somorponn korat ani tumche sande Devan Apnnak manovlelim kel’lea bhesachim hatiaram koxim Devak somorponn korat.

¹⁴ani tedna khoreponnim patok anink tumcher apli podvi cholounchem na, kiteak tumi Somurtichê adhin nhoi, punn Devachê doiallaiechê adhin asat.

¹⁵Mhonntôch kitem? Ami Somurtichê adhin nhoi, punn Devachê doiallaiechê adhin asanv dekhun, ami atam patok korchem? Na ki na!

¹⁶Jea konn-ekleacheô adnea pallunk tumi tumkanch gulam’ koxim ditat tedna, tea-ekleachim, zaum mornnak vhorto patkachim, zaum Apnnak monovlelim kel’lea bhesak vhorto adnea-pallnnêchim gulam tumi zatat mhonn nokllot tumi?

¹⁷Ekdam patkachim gulam’ zaunui, tumkam dil’lê bhavartachê xikovnnek kallzant thaun tumi khaltim zaleant mhonn Devak un-unit argam;

¹⁸Patkachea gulam’po-nnantlim sutton, tumi Devak man’ta toslea jivitachê chakrek lagleant.

¹⁹Tumchea soimbachê osoktaiek lagun, mon’xancheam chalteam utramnim uloitam: khotteponnache ani odik fuddem vhorto khotteponnache gulam koxe tumchê kuddiche sandhe vompun dil’le, mhonn’toch povitrponnak lagun Devan Apnnak manovlelim kel’lea bhesache gulam koxe tumche sande vompun diat.

²⁰Tumi patkache gulam’ asleat tedna, Dev Apnnak manovlelim korta tea bhesa vixim tumi aplê sot’techim asleat.

²¹Tumkam atam loz dista team kortubancho tumi tedna koslo fôll kaddlo? Moronn xevôtt tancho.

²²Atam patkantlim mekllim zaun ani Devachê sevek laglea uprant, tumcho fôll povitrtai ani hicho xevôtt Sasnnik Jivit.

²³Patok dita to muxaro moronn; Dev dita tem funkeachem dennem amchea Somia Jezu Kristachea ekvottant Sasnnik Jivit.