Read Goan Konkani Rom 7 Bible Online

Rom 7 - Goan Konkani bible

Rom 7

¹(Somurtichi ollokh asa tankam hanv uloitam dekhun), monis jivo asot porian, Somurtik tacher odhikar asa mhonn nokllot tumi, bhavam-bhoinnimnô?

²Oxem ek kazari bail aplo ghôv jivo asot porian, ti bail tea aplea ghôvak somurti pomonnem bandon urta. Punn to ghôv morot zalear, ti ghôv-bailechea kaidea meklli zata.

³Mhonntôch aplo ghôv jivo astana dusrea dadlea lagim ti vochot zalear, tika lôk pordvarinn mhonntolo; punn ticho ghôv melo zalear, ti ghôv-bailechea kaidea meklli zata, ani dusrea dadlea lagim ti kazar zait zalear ti pordvarinn zaina.

⁴Toxench, mhojeam bhavam-bhoinninmô, tumi dusreakodde, mhonngê Devak foll uttpon korchê pasot, mel’leantlo punorjivont zala Tachim tumi zauncheak Kristachê kuddi udexim tumi-i Somurti sorim mel’lim zaleant.

⁵Ami amchea mon’xasoimba pormannem jietaleanv tedna, amchem jivit mornnachê sevek upkartalem zaunk, Somurtin zagoiloleô patki vondovnneô amcheam kuddicheam sandheamnim vavurtaleô.

⁶Punn boroiloleam nemanchê adlê manddavolli pormannem nhoi, punn Povitr Atmeachê novê manddavolli pormannem ami chakri korchê pasot, Amkam bandun dovortali tê Somurtik morun, tê Somurtintlim ami atam suttleanv.

⁷Tôr kitem mhonnchem atam? Somurtuch patok, oxem mhonnchem? Na ki na! Ji mhaka patkachi ollokh mell’lea, ti Somurti udexinch mell’lea, kiteak “axa dhorum noiê”, oxem zôr Somurtin mhonnunk naslem, tôr axa kitem tem mhaka gomchem naslem.

⁸Somurti bhair patkak jivuch na dekhun, adneachi sondi dhorun, patkan sogllê torecheô axa mhojê bhitôr upzoileô.

⁹Adim, Somurt nasli tedna, hanv jivo aslom; adnea aili tedna, patkak jiv ailo,

¹⁰ani hanv melom. Jiv diunchê khatir dil’lê adneanuch mhaka zalear mornnak pavoilo.

¹¹He adneachi ek sondi dhorun, patkan mhaka fosoilo ani adnea udexim mhozo jiv kaddlo.

¹²Mhonntôch Somurt povitr mhonn dubhav na, ani adnea-i povitr, neaii ani bori.

¹³Tôr kitem borem tench mhaka mornnachem karonn zalem? Na ki na! Patok tem patok mhonn zanna zaunchê khatir borê vostucho—mhonngê adneacho— upêg korun, patkan mhaka moronn haddlem; ani hê porim, adnea udexim patkan sogllea mapa-bhaili apli bhoikôr patki podvi choloili.

¹⁴Somurt atmik mhonn ami zannonv, punn hanv zalear patkachea gulam’ponnant vikun soddlolo masa-rogtacho monis.

¹⁵Hanv kortam tem mhaka somzonam; tôr jem borem mhaka zai, tem hanv korinam; punn jem vaitt mhaka bilkul naka, tench hanv kortam;

¹⁶mhaka naka tench hanv kortam zalear, Somurt bori mhonn hanv man’tam-xem zalem.

¹⁷Punn khorem mhonnlear, kitem kortam tem, hanv nhoi toxem zalem, punn mhojê bhitôr rigun ravlam tem patok.

¹⁸Jem kitem borem tem mhojê bhitôr, mhonngê mhojea mon’xasoimbant, tthikann korun ravona mhonn hanv zannom; kiteak boreachi axa dhorunk mhojea hatant asa khorem, punn tem korunk hanv xokona;

¹⁹mhonntôch jem borem korunk hanv axetam, tem hanv korina; punn jem vaitt mhaka naka, tench hanv kortam.

²⁰Mhaka naka tem hanv kortam zalear, mhojea kallzant rigun ravlam tem patok ki tem korta; hanv ani-anink nhoi to.

²¹Hea pasot, ho nêm’ mhojea jivitant cholta mhonn hanv dekhtam: borem korunk sôdtam tedna, vaitt tench hanv vinchun kaddtam.

²²Devachê Somurti pasot mhojem mon anondan bhoron ieta;

²³punn mhojea mon’xasoimbant êk veglloch nêm’ hanv polletam: mhojea gineanan hanv mandun ghetam tê Somurticher to zhuz korta ani mhojea mon’xasoimbant asa tea patkachea nemacho mhaka koidi korta.

²⁴Kitlo nirbhagi monis hanv! Mhaka mornnachê vatten oddun vhorta tea mon’xasoimbantlo konn mhaka nivarunk xoktolo?

²⁵Amchea Somia Jezu Krista udexim Ekloch Dev! Taka vakhann’nni! Mhonntôch hi mhoji gôt: ginean aslolo monis koso Devachê Somurticho chakôr zaunk hanv kobul; punn hanv patki mon’xasoimbacho dekhun, patkachea nemacho hanv gulam’.