Read Goan Konkani Rom 8 Bible Online

Rom 8 - Goan Konkani bible

Rom 8

¹Mhonntôch, Jezu Kristachea ekvottant asat tankam atam koslench khastichem formonn na.

²Kiteak Jezu Kristachea jivit dito Atmeachê Somurtin patkachê ani mornnachê Somurtintlim tumkam nivarlim.

³Mon’xasoimbachê osoktaiek lagun jem Somurti kodde ghodd-onaslem, tem Devan kelem: Tannem Apleach Putak dhaddlo. Ho Put, patkacho nas korchê khatir, patki mon’xasoimb gheun ailo ani patka khatir Apunnuch boli zalo. Oxem mon’xa-soimbachea patkacher Devachê khastichem formonn poddlem.

⁴Ami atam patki mon’xasoimb vondaita tê vatten nhoi, punn Povitr Atmo oddun vhorta tê vatten cholun jietanv, tem promannikponn Somurticho hetu, amche sovem pallon ieunchem kam Aplea Putak daddun, Devan kelem.

⁵Jim konn mon’xasoimbacheam vondov-nneam pormannem jietat, tancho iklo mon’xasoimbak avoddta tacheruch dovorlolo asa; punn jim konn Povitr Atmo oddun vhorta tê vatten cholunk axetat, tancho êkuch iklo: Atmeak avoddtat teô vostu.

⁶Mon’xasoimbacher iklo dovorlear, tuka mellta fokot moronn; punn Povitr Atmeacher to dovorlo zalear, tuka mellta jivit ani xanti.

⁷Monxasoimbacher iklo dovortat tim Devachim dusmanam zatat, kiteak amchem mon’xasoimb Devachê khuxek khaltem ravonam, nhoi mhonn tachean khaltem ravunk zaina.

⁸Mon’xasoim-bacheam vondovnniam pormannem choltat tanchean Devak manom nozo;

⁹punn tumchem jivit mon’xasoim-bacheam vondovnniam pormannem nhoi; Devacho Atmo tumchê sovem tthikann korun jieta mhonntôch, tumchem jivit Atmean choloilolem jivit. Khorench, jeam mon’xam sovem Kristacho Atmo na, tim Kristachim nhoi.

¹⁰Punn zôr Krist tumchê sovem asa, tumchi kudd patkak lagun melear-ui, Apnnak manovlelim Devan tukam korun, jivim dovrunk tumchê sovem Atmo asa.

¹¹Zannem Jezuk mel’leantlo punorjivont kela, Tacho Atmo tumchê bhitor rigun asa zalear Zannem Jezu Kristak mel’leantlo punorjivont kela, Toch, tumchê sovem jietelea Aplea Atmea vorvim, tumcheô vinaxi kuddi novean jivont kortolo.

¹²Mhonntôch bhavam-bhoinnimnô, amkam kaido asa khoro, punn mon’xasoimbacheam vondovnneam pormannem jieunchem mhonn amkam mon’xasoimba sorim kaido na.

¹³Kiteak mon’xasoimbacheam vondovnneam pormannem jiexeat zalear, tumi mortelet; punn Atmeachea bollan mon’xasoimbacheam vondovnn-eanchem boll môddxeat zalear, tumkam Jivit astelem.

¹⁴Zankam Devacho Atmo choloita, tim sogllim Devachim bhurgim.

¹⁵Tumkam anink êk pavtt bhirantin bhôrta toslo gulam’ponnacho atmo tumi gheunk na; khorem mhonn’lear, tumkam Devachim apnnailelim bhurgim korta to Atmo ki tumi ghetla; Tachê udexim ‘Ab’ba!’ mhonngê ‘Bapa’, oso ami ulo martanv.

¹⁶Ani oxem ami Devachim bhurgim mhonn Povitr Atmo, amchea otmea borabôr, Apunnuch govai dita.

¹⁷Bhurgim mhonntôch ami daiji; hôi, daiji-bhurgim Devachim ani daiji-bhavbhoinn Kristachim: Tachê mhoimechim ami bhagidar zatelenv zalear, Tacheam koxttanchim-i ami bhagidar zaunk zai.

¹⁸Hea kallache koxtt-dogd ani Dev amkam ugddapi kortolo ti mhoima, hanchê bhitôr koslich sôr zaina, oxem mhaka dista;

¹⁹kiteak Devacheam bhurgeanchê prokasnnek ak’khi rochnna otrekun otrekta.

²⁰Aplo xevôtt xarti pavounk rochnnechean nozo zalem tem tichêch khuxen nhoi, punn Apli ievzônn pallun haddchea bhorvanxean Devanuch oso nirnnoi ghetlo.

²¹Ho to bhorvanso: Apleam bhurgeanchea mhoimêbhorit svadhinponnant rochnnek vantto diunchê pasot, khud Dev tika kusddeponnachea gulam’ponnantli soddoun svotontr kortolo.

²²Akhi rochnna ballontiche vollvolle ozun porian bhôgta mhonn ami zannonv;

²³ani fokot rochnna nhoi: bogor ami-i amchêch bhitôr pirgon asanv, kiteak Devan Aplo Atmo prothom’ foll mhonn amkam dila, ani tea pasot To amkam sopurnnaien Aplim bhurgim kortolo, mhonngê amcheam kuddink suttka ditolo tea disachi vatt ami polleun asanv.

²⁴Kiteak mhollear, bhorvanxean amkam taronn mell’lam; ravtanv tem dixtti poddlelem zalear, tantum bhorvanso na; tôr dixtti poddta tacho konn anink bhorvanso dhôrta?

²⁵Punn dixtti poddonam tacho ami bhorvanso dhôrtanv tedna, sosnnikaien ami tachi vatt polleun ravtanv.

²⁶Têch porim, ami osokt mhonnun, Povitr Atmo amchea adarak ieta. Favo tê bhaxen kitem magchem tem ami nokllonv dekhun, utramnim ucharunk zainant tosle haskar-suskar soddun, Atmo amchê khatir Apunnuch vinoti korta.

²⁷Dev kallzam topasun ollkhota, ani Povitr Atmeachi axa konn ti To borem zanno, kiteak Devachêch khuxê pormannem povitr kel’leam pasot To vinovnni korta.

²⁸Jim konn Tacho môg kortat ani jeam konnank Tannem Aplê ievzonnê pormannem apoileant, tanchê borabôr soglleam vostumnim Dev tanchea boreak vavurta mhonn ami zannonv.

²⁹Mon’xamnim Devachea Putacho rupkar gheunchê khatir ani oso To somest bhavam-bhoinnim modlo Malgoddo zaunchê khatir, Devan tankam adim-fuddench mogan ollkhun kaddleant ani nemleant.

³⁰Jeam konnank adim-fuddem Tannem nemleant, tankam Tannem apovnnem-i kelam; jeam konnank Tannem apovnnem kelam, tankam Tannem Apnnak manovlelim-i keleant; jeam konnank Tannem Apnnak manovlelim keleant, tankam Tannem mhoimevont-ui keleant.

³¹Hem sogllem dolleam mukhar dovrun, atam ami kitem mhonnchem? Dev zôr amchê vatten asa, amcher add konn asot?

³²Aplea khaxa Putak legun Devan vattaunk na, punn amam-somestam pasot Taka dilo mhonntôch, Tachê borabôr koso To amkam sogott funkea diuncho na?

³³Devan vinchun kaddleant tancho konn guneanv kortolo? Tim atam guneanva-mekllim mhonn khud Dev nirnnoi dita nhoi? Tôr khastichem formonn martolo konn?

³⁴Khastichem formonn marpi to konn? Amchê khatir melo Jezu Krist nhoi? Itlench nhoi, To punorjivont-ui zala, ani atam To Devachea uzvea hatak bosla ani Deva mukhar amchê khatir vinoti-i korta.

³⁵Mhonntôch Kristachea moga thaun konn amkam toddun kaddit? Upodre toddun kaddtele? Oddchonni vô dhumallo bi? bhuk ani vinglleponn? sonkoxtt vô torvar bi?

³⁶Oxem tôr Povitr Pustokar boroil’lem asa: “Tujêch pasot amkam dis-bhôr vollvollaun martat, marunk toiar kel’leam xelliam vori amkam lêkhtat.”

³⁷Punn amcho môg kela Taka lagun heam sorv ghodditamnim ami bharim zoitivont.

³⁸Khorench, Jezu Krista amchea Somia udexim Devacho môg ami onnbhovunk pavleanv tea moga koddsun zaum moronnachean vô jivitachean, devdutchean vô ontralla veleô xokti ani podveo asat tanchean, sonvsarant atam ghòddta ani fuddarak ghoddon iet titleaichean, prithvê voir vô prithvê pondak asa tea sogttachean amkam toddun kaddunk koxêch bhaxen zaunchem na mhonn mhaka dubhavuch na!