Read Goan Konkani Rom 9 Bible Online

Rom 9 - Goan Konkani bible

Rom 9

¹Kristachea ekvottant asun hanv sot uloitam, fôtt sangina; Povitr Atmea udexim mhojem ontoskornn-ui mhaka govai dita:

²jim masa-rogta pormannem mhojêch porjechim, team mhojeam bhavam-bhoinnim pasot, mhaka êk vhôdd khônt asa ani thar dina tosli dukh mhojea kallzant asa. Hea pasot tankam upkarot zalear, Devacho xirap mhojer poddun mhakach Krista thaun toddun kadd mhonn hanv magtalom.

⁴Tim Israelkar, tankam Devan Aplim bhurgm korun ghetleant, tankam Aple mhoiment vantto dila, tanche lagim korar keleat; Somurt tanchea hatant ghalea, Devachi bhozonn tankam xikoilea, ani tankam bhasavnneo keleat;

⁵porzapoti tanche, ani tanche thaun rogta-masa pormannem Krist utpon zala: To sogtta-sorvam poros vorto Dev, Taka sasnnachea sasnnak vakhann’ni! Amen!

⁶Devan dil’lem utor nirfôll zal’lea porim nhoi tem. Zolman Israelachê kulliechim tim sogllinch khori Israel-porza nhoi. Toxench Abrahamachê sonstichim tim sogllinch tacheô put-dhuvô nhoi, punn “Heach somoiar Hanv portun ietolom ani tedna Sarak bhurgo zatolo.”, heam utramnim bhasavnni kel’li asa dekhun, “Izaka vorvim tujê sonstik tujem nanv melltolem.” Mhonngê masa-rogta pormannem zolmol’lim bhurgim Devachim bhurgim nhoi, punn bhasavnnê pormannem zolmol’lim bhurgim ki khori sonsôt mhonn lekhun ietelim. Kiteak bhasavnni heam utramnim kel’li asa: “Heach somoiar Hanv portun ietolom ani tedna Sarak bhurgo zatolo.”

¹⁰Itlench nhoi, eklea ghova, amhchea purvoza, Izaka udexim Rebek’kanui dogam zonvlleam putancho gorbh samballolo tedna oxench ghoddlem.

¹¹Te zolmunchê adim ani tãnnim kitench borem vô vaitt korchê adim, kornneam udexim nhoi punn Dev Apunn korta tea apovnnea udexim, Aple venchnnukecho xevôtt pallon ieunche khatir, Devan tika mhonn’lem: “Vhoddlo bhav dhaktteachi chakri kortolo.”

¹³Hench dakhoun, Povitr Pustokar oxem boroil’lem asa: “Jakobacho Hanvem môg kelo, punn Ezaucho Hanvem dvês dhôrlo.”

¹⁴Tôr kitem mhonnchem? Dev onit korta mhonn sangchem? Na tem na!

¹⁵Tôr Moisesak To oxench sangta: “Mhaka zai tankam Hanv doia dakhoitolom, ani Mhaka zai tanche Hanv churchure dhôrtolom.”

¹⁶Mhonntôch mon’xam kitlim axetat vô proitn korun kitlim khorxetat, hacher kãich dhòrlolem na, sogllem fokot doiallai dakhoito Devacher dhòrlelem asa.

¹⁷Tôr Povitr Pustok Faraok sangta: “Tujê sorim Mhoji podvi dakhounchê khatir ani Mhojem Nanv sogllea sonvsaracher porgott zaunchê pasot, Hanvem tuka mud’dom’ upzoila.”

¹⁸Mhonntôch Apnnak zai tanche To churchure dhôrta ani Apnnak zai tanchem kalliz To nibor korta.

¹⁹Toxem zalear, tum mhaka mhonnxi: “Koso Tachean konnachoch guneanv korum-iet? Tôr Konnachean Tachê khuxecher add vochunk zata?”

²⁰Mon’xa, Deva lagim vad-vivad korunk tum konn ga? Ek matiechem aidon apnnak kel’lea kumbharak “Tunvem mhaka hê baxen kiteak kelãi?”, oxem vichartelem?

²¹Êkêch matiechem ek aidon kherit somoiar vaprunk ani dusrem sadharonn upegak korunk kumbharak aplê matiecher sot’tea na kitem?

²²Devan kelam tem-i toxench. Aplo krôdh dakhounk ani Apli podvi porgôtt korunk Tachi khuxi asli. Tea pasot, Aplea krodhachim hatiaram kelea uprant, zancho To nas korunk sôdtalo, tankam Tannem tokôs kaddun sõslim.

²³Dusrê vatten, Aplê mhoimechi girestkai dakhounk sôdtalo dekhun, amkam Tannem adinch thaun Aplê mhoimek toiar kelim ani heach pasot Apli doiallai amkam bhogunk dili.

²⁴Tannem apoiloli porza ti ami, fokot Judêv lokantli nhoi punn videxi-i lokantli.

²⁵Tôr Hoseiasachea pustokar Toch oxem mhonnta: “Mhojea porza nhoi asli tika mhoji porza mhonntolom: Ani Mhojea mogachi nhoi asli tika: Mhojea mogachi mhonntolom!”

²⁶Ani zõi tankam Hanvem mhonnlelem: ‘Tumi Mhoji porza nhoi!’, teach zagear tankam lôk oxem pachartolo: ‘Him jivea Devachim bhurgim!’ ”

²⁷Ani Israela vixim Izaias oso arddota: “Israelacheam bhurgeanchi sonkia vellechê renvê itli zait zalear-ui, fokot eka urlolea zomeak soddvonn mellteli,

²⁸kiteak veginchê vegim Sorvespor Aplem xikxechem formonn prithumecher sadhun haddtolo to haddtoloch.”

²⁹Izaiasan toxench bhakit korun sanglem: “Dolbharanchea Sorvesporan amchê modleam thoddeam zannank rakhun dovrunk naslim zalear, ami Sodoma sarkim zavpachim, Gomorra bhaxen ami zaun vochpachim.”

³⁰Mhonntôch, ami kitem mhonn-chem? Itlench: mon’xank promannik korta tem Devache doiallaiechem nitivontponn videxi raxttram sodinaslim; punn tem tankam bhavarta vorvim mell’lem.

³¹Portem, Israel-porza apunn Devak manovleli zaunchea monan kaide palltali, punn oxem korun ti Devak manovleli zaunk pavunk na.

³²Kiteak na? Kiteak ti bhavartacher nhoi, punn apleanch kornneancher patietali. Addkhôll zaunk Devan tanchê vatter ubo kel’lea adlloto fatrak adllon tim poddleant.

³³Povitr Pustokar oxem boroilolem asa: “Polleiat, Xionant Hanv lokachê vatter addkhôll zavpacho êk fatôr ubo kortam, mon’xam adllon poddtat toslo fatôr; punn tacher bhavart dovortat tim lojek sampoddchim nant.”