Read Goan Konkani 1 Kor 10 Bible Online

1 Kor 10 - Goan Konkani bible

1 Kor 10

¹Bhavam-bhoinnimnô, amcheam purvozank kitem zalem tem tumi sarkem somzun ghetlelem mhaka zai: tim sogllim eka kupa khal aslim ani doriantlean fuddem gelim.

²Hê toren kupant ani doriant tancho batism zalo ani oxem tim Moizesachim pattlav-daram zalim;

³ani sogllim Devan dil’lem ekuch jevonn jevlim,

⁴ani Devan dil’lem ekuch pivonn pielim; Devan dakhoil’lem khoddop tanchê pattlean vetalem ani hea khoddpantlem tim udok pietalim; ani tem khoddop mhonn’lear khud Krist.

⁵Tori astana tanchê modlim chodd zonnam Devak manonk nant, ani Devan tankam oronneant marun uddoilim.

⁶Vaitt vostunchi tãnnim axa dhôrli toxi ami dhorum noiê mhonnun hem sogott ghòddlem: amkam xiddkaunk hi êk Devan adinch dil’li khunna.

⁷Tanchê bhitorleam thoddeamnim kelem tê porim, tumi murti-puttleank bhozum nakat; kiteak tanchê vixim Povitr Pustokar oxem boroil’lem asa: “Jevunk ani pieunk porza bosli ani mouza marunk utthli.”

⁸Tanchê bhitorleam kãi zannamnim kelem toxem, ami pozoddponn korchem nhoi: tantlim tevis hozar zanna ekach disa-bhitôr morun poddlim.

⁹Tanchê modleam kãi zannamnim kelem toxem, ami Somiachi porikxa korum noiê; sorop chabun tim melim.

¹⁰Tanchê bhitorleam thodde-amnim kelem toxem, tumi gunngunnum noiê: Bhosm-Kornnaran tancho nas kelo.

¹¹Tankam budh xikounchê khatir hem sogllem ghòddlem; ani kallam-iuganchê sompadnnek pavleleam amkam xiddkaunchê khatir heô vostu boroun dovorleat.

¹²Mhonntôch konn apunn thir ubim asat mhonn somzotat? Tôr tãnnim chotrai dhôrchi, na tôr tim bhi poddtit.

¹³Az porian tumcher aileat teô tallnneô soglleam mon’xank ietat tosleôch. Devacher visvas dovrat: tumchean sõsunk zata tea-vôn khôr tallnni tumcher ieunk To kednanch nirmicho na; punn kosli-i tallnni aili zalear, ti sõsunk To tumkam boll ditolo ani oxem tantlim bhair sorunk To tumkam vatt dakhoitolo.

¹⁴Bhov priticheam ixttam-ixttinnimnô, murtim-puttleanchi puza samkich soddun diat.

¹⁵Tumi somji-kaiechim mon’xam mhonn dhorun hanv tumchê lagim uloitam; hanv tumkam kitem sangtam tem tumich chintun polleiat.

¹⁶Jea patracher Devacho axirvad magun, ami tantlem pietanv tedna, tem axirvadachem patr Kristachea rogta kodde amcho sombond korta nhoi? Ani ami môddtanv to unddo Kristachê kuddi lagim amcho sombond korta nhoi?

¹⁷Êkuch unddo dekhun, zaitim zannam zaun-ui êkuch kudd ami, kiteak ami sogllim tea ekach unddeant vantto ghetanv.

¹⁸Judêv lôk kitem korta ani sotman’ta tem monant haddat. Bhettoil’leam bolianchem khatat tim vedi lagim sombond zôddinant?

¹⁹Punn hanv kitem sangunk sôdtam? murtim-puttleank bhettoil’lea khannak koslem tori mol asa mhonn sangtam? Vô teach murti-puttleak koslem tori mol asa mhonntam?

²⁰Na ki na! Mhozo ôrth oso: Povitr Pustokacheam utramnim, je iodn onbhavarti bhettoitat, te devcharank bhettoitat, Devak bhettoinant. Devcharam lagim tumkam sombond aslolo mhaka naka.

²¹Somiachea patrantlem ani devcharanchea patrantlem tumchean borabôr pieunk zaina. Somiachea jevnnak ani devcharanchea jevnnak tumchean borabôr bosunk zaina.

²²Ami Sorvesporachi premaxa challounk sôdtanv kitem? Tachê poros ami odik bollixtt?

²³Konn-konn mhonnot: “Amchean sogllem korum-ieta.” Hôi, punn sogllench amchea adavak poddona; amchean sogllem korum-ieta khorem, punn sogllench amchem bhavartachem jivit ghott korunk upkarona.

²⁴Konnench aplo faido sodum noiê, punn peleacho.

²⁵Maskaranchea manddar viktat titlem-i khaiat; koslech anink vichar korinastana tumchem ontoskornn somadhan asum-di.

²⁶Kiteak, Povitr Pustokacheam utram pormannem, “prithum’ Sorvesporachi ani ticher asa tem sogllem.”

²⁷Konn-konn onbhavarti tumkam jevnnak apoitit zalear ani tanchem amontronn tumi mandun ghexat zalear, koslech vichar korinastana tumchea fuddeant dovortit titlem-i khaiat, tumchem ontoskornn somadhan asum-di.

²⁸‘Hem devank bhettoil’lem’, oxem tumkam konnem-konnem sanglem zalear, sanglam team mon’xam khatir ani ontoskornna khatir tem khainakat.

²⁹Tumchea ontoskornnachi hanv khobor korina, punn tanchea ontoskornnachi. Punn konn vicharit: “Dusrim mon’xam aplea ontoskornnak lagun mhoji sot’tea kiteak mhonn bandun dovortolim?

³⁰Dhin’vaxi monan jevtam zalear, Devak dhin’vasun ghetlelea jevnna pasot konnachean mhoji ttika korum-iet?”

³¹Mhonntôch tumi jevtat vô pietat vô kitem-i dusrem kortat, tem sogllem Devak mhoima diunchê khatir korat.

³²Zudevank vô Grikank vô Devachê povitr-sobhek khotti dêkh dinakat.

³³Hanv kortam toxench tumi-i korat: mhojeach faideachem kãi chintinastana punn soglleancho faido polleun, somestanchem taronn zaunche khatir, soglleam mhojeam kornneamnim hanv soglleank khuxi korunk vavurtam.